OMS ៖ ជារៀងរាល់៤០វិនាទីម្តង មានមនុស្សម្នាក់ធ្វើអត្តឃាត
ក្នុងមួយឆ្នាំៗ មានមនុស្សចំនួន ៨សែននាក់ បានបញ្ចប់ជីវិតដោយសម្លាប់ខ្លួនឯង នៅលើពិភពលោក ពោលគឺក្នុង៤០វិនាទីម្តង មានមនុស្សម្នាក់បានធ្វើអត្តឃាត។ ថ្វីបើអត្រាអត្តឃាតបានថយចុះ ជាទូទៅ ក្នុងកំរិតពិភពលោកមែន តែសម្រាប់អង្គការសុខភាពពិភពលោក OMS នេះជាតួលេខដ៏ច្រើន គួរឱ្យព្រួយបារម្ភដដែល។ សម្រាប់រយៈពេលមួយខែនេះ អង្គការសុខភាពពិភពលោកនឹងបើកយុទ្ធនាការបង្ការការធ្វើអត្តឃាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
នៅក្នុងរបាយការណ៍ ចេញផ្សាយមួយថ្ងៃមុនទិវាបង្ការការធ្វើអត្តឃាតពិភពលោក ថ្ងៃទី ១០កញ្ញា អង្គការសុខភាពពិភពលោកបានពន្យល់លម្អិតថា នៅរវាងពីឆ្នាំ២០១០ ដល់ឆ្នាំ២០១៦ ករណីអត្តឃាតនៅលើពិភពលោកបានធ្លាក់ចុះ -៩,៨%។ តំបន់ដែលមានករណីអត្តឃាតចុះខ្លាំងជាងគេ ដល់-១៩,៦%នៅក្នុងតំបន់ប៉ាស៊ីហ្វិកខាងត្បូង ហើយត្រឹមតែ-៤,២%នៅតំបន់អាស៊ីអាគ្នេយ៍។ មានតែតំបន់អាមេរិក មួយទេដែលករណីអត្តឃាត (ភាគច្រើនដោយប្រើកាំភ្លើងជាអាវុធសម្លាប់ខ្លួនច្រើន)បានកើនឡើង ដល់ទៅ+៦%។
អត្រាអត្តឃាតពិភពលោកធ្លាក់ចុះ ដោយសារតែបណ្តាប្រទេសមួយចំនួនធំបានដាក់ឱ្យដំណើរការយុទ្ធសាស្ត្របង្ការការធ្វើអត្តឃាត។ ប៉ុន្តែ គេរាប់ឃើញជារៀងរាល់៤០វិនាទីម្តងមានករណីស្លាប់ដោយទង្វើអត្តឃាតម្នាក់ តាំងពីឆ្នាំ២០១៤មក។
ករណីអត្តឃាតភាគច្រើន មានកើតឡើង នៅក្នុងប្រទេសក្រីក្រនិងមធ្យម តែនៅប្រទេសអ្នកមាន អត្រាអត្តឃាតមានកំរិតខ្ពស់ខ្លាំងគេ។ នៅទ្វីបអាហ្វ្រិក អឺរ៉ុប និងអាស៊ីអាគ្នេយ៍ អត្រាអត្តឃាត មានកំរិត១០,៥នាក់ ក្នុងចំណោមប្រជាជន១០ម៉ឺននាក់ ពោលគឺខ្ពស់ជាមធ្យមភាគពិភពលោក។ បើតាមការប្រៀបធៀបអន្តរជាតិ ប្រទេស ហ្គីយ៉ាន អតីតប្រទេសក្រោមអាណានិគមនិយមអង់គ្លេស ស្ថិតនៅក្បែរប្រទេសវ៉េណេស៊ុយអេឡា គឺជាប្រទេសដែលមានអត្រាអត្តឃាតខ្ពស់ជាងបំផុតនៅលើពិភពលោក (៣០,២នាក់សម្រាប់ពលរដ្ឋ១០ម៉ឺននាក់) ដោយប្រើថ្នាំបំពុលសម្លាប់សត្វល្អិត។ រុស្ស៊ីជាប់លំដាប់ទីពីរ ដោយហេតុតែផឹកស្រាច្រើនជ្រុល។ លីទុយអានី ឡេសូតូ អ៊ូហ្កង់ដា ស្រីលង្កា កូរ៉េខាងត្បូង ឥណ្ឌា និងជប៉ុន សុទ្ធសឹងជាប្រទេសជាប់លំដាប់មានអត្រាអត្តឃាតខ្ពស់បន្តបន្ទាប់គ្នា។
បុរសសម្លាប់ខ្លួនច្រើនជាងស្ត្រី។ ប្រទេសកាន់តែមាន គំលាតមានកាន់ខ្លាំង។ ចំណែកមធ្យោបាយសម្លាប់ខ្លួន ដែលប្រើច្រើនជាងគេគឺការចងក លេបថ្នាំបំពុលសម្លាប់សត្វល្អិត និងដោយកាំភ្លើង។
បើតាមអង្គការសុខភាពពិភពលោក ការកាត់បន្ថយការប្រើថ្នាំសម្លាប់សត្វល្អិត បានកាន់បន្ថយករណីអត្តឃាតបានយ៉ាងច្រើន។ ស្រីលង្កា និងកូរ៉េខាងត្បូងបានអនុវត្តគំនិតផ្តួចផ្តើមនេះ និងបានបញ្ចុះអត្រាអត្តឃាតបាន៧០%នៅស្រីលង្កា ជាឧទាហរណ៍ជាក់ស្តែង។
ជាងពាក់កណ្តាលនៃអត្តឃាតជន មានអាយុក្រោម៤៥ឆ្នាំ។ អត្តឃាតបានក្លាយជាមូលហេតុទីពីរនៃមរណភាពរបស់យុវជនអាយុពី ១៥-២៤ឆ្នាំ បន្ទាប់ពីគ្រោះថ្នាក់ចរាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ