ហុងកុង ៖ បាតុកម្មនៅមុខស្ថានកុងស៊ុលអង់គ្លេស ដើម្បីសុំការគាំទ្រពីអន្តរជាតិ
សកម្មជនប្រជាធិបតេយ្យហុងកុង រាប់រយនាក់ បាននាំគ្នាទៅធ្វើបាតុកម្មនៅមុខស្ថានកុងស៊ុលអង់គ្លេសប្រចាំក្រុងហុងកុង នៅថ្ងៃអាទិត្យទី ១៥ កញ្ញា ដើម្បីសុំការគាំទ្រពីទីក្រុងឡុងដ៍ និងខ្លះបានស្នើសុំឱ្យពលរដ្ឋហុងកុងអាចទទួលបានសញ្ជាតិអង់គ្លេស ឬសញ្ជាតិណាមួយនៃប្រទេសដែលស្ថិតនៅក្នុងក្រុមCommonwealth។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ទង់ជាតិអង់គ្លេស កំពុងលេចត្រដែតលាយលំជាមួយនឹងឆ័ត្រ ដែលជានិម្មិត្តរូបនៃចលនាប្រឆាំងនៅហុងកុង។ បាតុកររាប់សិបរយនាក់ បានមកប្រមូលផ្តុំនៅមុខស្ថានកុងស៊ុលអង់គ្លេសប្រចាំក្រុងហុងកុង ដើម្បីសុំការគាំទ្របន្ថែមពីក្រុងឡុងដ៍។ ចម្រៀងជាតិអង់គ្លេស លាន់រងំចេញពីបបូរមាត់ហ្វូងបាតុករ ដែលស្រែកលាយលំបន្ទោសអង់គ្លេសថាមិនបានដាក់គំនាបលើប៉េកាំងឱ្យបានសមនឹងទង្វើ។ ខ្លះស្រែកជ័យឃោស និងបដាដែលមានខ្លឹមសារជាអាទិ៍ថា “សេចក្តីថ្លែងការរួមចិន-អង់គ្លេស គ្មានន័យ ! សូមជួយហុងកុង !”។
បាតុករជាច្រើនផ្សេងទៀត បានស្នើសុំឱ្យពលរដ្ឋហុងកុងមានលទ្ធភាពទទួលសញ្ជាតិអង់គ្លេស ឬសញ្ញាតិរបស់ប្រទេសណាមួយដែលស្ថិតនៅក្នុងក្រុមប្រទេសCommonwealth (១៥ប្រទេសដែលមានព្រះមហាក្សត្រីយានីអេលីហ្សាបែត ២ ជាប្រមុខរដ្ឋ មានជាអាទិ៍ កាណាដា អូស្ត្រាលី ឬនូវែលហ្សេឡង់ ...)។ តាំងពីមុននិងក្រោយការផ្ទេរហុងកុងមកឱ្យចិន ពលរដ្ឋហុងកុងអាចទទួលលិខិតឆ្លងដែនពិសេស ដូចពលរដ្ឋអង់គ្លេសរស់នៅបរទេសដែរ ប៉ុន្តែលិខិតឆ្លងដែននេះ ពុំបានផ្តល់សិទ្ធិឱ្យស្នាក់នៅនិងប្រកបការងារជាអចិន្ត្រៃយ៍នៅអង់គ្លេសទេ។ ហេតុដូច្នេះហើយបានក្រុមបាតុករយល់ថា អង់គ្លេស គួរតែប្តូរលក្ខន្តិកៈនៃការផ្តល់លិខិតឆ្លងដែនអង់គ្លេសនៅឯនាយសមុទ្ទ។ សមាជិកសភាអង់គ្លេស ១៣០រូប ក៏បានចុះហត្ថលេខាលើលិខិតចំហមួយដែរ នៅសប្តាហ៍នេះស្នើសុំឱ្យអង់គ្លេស និងប្រទេសក្នុងក្រុមCommonwealth ទទួលយកពលរដ្ឋហុងកុងដែលចង់និរទេសខ្លួន។
តាំងពីខែមិថុនាមក ហុងកុងបានឆ្លងកាត់វិបត្តិយ៉ាងធ្ងន់ធ្ងរបំផុតមិនធ្លាប់មានទេ គិតចាប់តាំងពីឆ្នាំ១៩៩៧ ឆ្នាំដែលអង់គ្លេសបានប្រគល់ហុងកុងមកឱ្យចិនវិញ។ បាតុកម្មមានស្ទើរជារៀងរាល់ថ្ងៃ ទាមទារឱ្យមានកំណែទម្រង់ប្រជាធិបតេយ្យ និងដើម្បីបរិហារទង្វើបង្ក្រាបដ៏ហិង្សារបស់ប៉ូលិសមកលើបាតុករ។ នារយៈពេលប៉ុន្មានថ្ងៃចុងក្រោយនេះ បាតុករហុងកុងបានបង្កើនសកម្មភាពដើម្បីទាក់ទាញសហគមន៍អន្តរជាតិឱ្យជួយគាំទ្រ។ តំណាងសកម្មជនប្រជាធិបតេយ្យ Joshua Wong បានធ្វើដំណើរទៅសហរដ្ឋអាមេរិក និងទៅជួបតំណាងរាស្ត្រអាមេរិកដើម្បីឱ្យលោកត្រាំ បញ្ជូលករណីសិទ្ធិមនុស្សនៅហុងកុងទៅក្នុងការចរចាពាណិជ្ជកម្មជាមួយប៉េកាំង។ ហើយក្រោយបាតុកម្មនៅមុខស្ថានកុងស៊ុលអង់គ្លេស បាតុករហុងកុងបានដង្ហែក្បួនទៅកាន់សង្កាត់ពាណិជ្ជកម្មកណ្តាលកោះ ដែលប៉ូលិសហាមឃាត់។ ការប៉ះទង្គិចបានកើតឡើងនៅវេលាម៉ោង៦ល្ងាច (ម៉ោងនៅហុងកុង) ដោយប៉ូលិសបានបាញ់គ្រាប់បែកផ្សែង និងកាណុងទឹក បំបែកបាតុករដែលបាននាំគ្នាគប់ដុំថ្ម និងដបសាំងមកលើប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ