អង្គការសហប្រជាជាតិ ៖ រ៉ូហ៊ីងយ៉ានៅភូមា រស់ក្រោមគំនាប “ប្រល័យពូជសាសន៍”
ជនជាតិរ៉ូហ៊ីងយ៉ា ទាំង៦សែននាក់ នៅភូមា កំពុងរស់ក្រោមការគំរាមកំហែង “ប្រល័យពូជសាសន៍” ជារៀងរាល់ថ្ងៃ ! បើមានស្ថានភាពយ៉ាងដូច្នេះ តើធ្វើដូចម្តេចនឹងអាច ធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ា ជាង៧សែននាក់នៅបង់ក្លាដែសបាន ! នេះបើតាមសម្រែកអាសន្នរបស់ក្រុមអ្នកអង្កេតអង្គការសហប្រជាជាតិ ដែលអំពាវនាវឱ្យតុលាការព្រហ្មទណ្ឌអន្តរជាតិ បើកសវនការប្រឆាំងនឹងអ្នកទទួលខុសត្រូវភូមា ពីបទប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្នុងរបាយការណ៍ ដែលនឹងត្រូវដាក់ជូនក្រុមប្រឹក្សាសន្តិសុខអង្គការសហប្រជាជាតិនៅថ្ងៃអង្គារនេះ ក្រុមអ្នកអង្កេតបានអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិនាំករណីភូមា ឡើងទៅតុលាការព្រហ្មទណ្ឌអន្តរជាតិ ឬបង្កើតតុលាការពិសេសមួយ ដូចករណីអតីតយូហ្កោស្លាវី និងរវ៉ាន់ដា។ បន្ថែមពីលើឈ្មោះឧត្តមសេនីយ៍៦នាក់ក្នុងរបាយការណ៍លើកមុន ក្រុមអ្នកអង្កេតមានបញ្ជីសម្ងាត់មួយទៀត មានឈ្មោះ ១០០ នាក់ ក្នុងនោះខ្លះអ្នកទទួលខុសត្រូវក្នុងរដ្ឋាភិបាលភូមាផង ថាជាប់សង្ស័យប្រព្រឹត្តអំពើប្រល័យពូជសាសន៍ អំពើឧក្រិដ្ឋប្រឆាំងមនុស្សជាតិ និងឧក្រិដ្ឋកម្មសង្គ្រាម។
នៅក្នុងរបាយការណ៍ថ្មីនេះ គេមានភស្តុតាង និងមូលហេតុសមរម្យ ដែលអាចសន្និដ្ឋានបានអំពីឆន្ទៈបែបប្រល័យពូជសាសន៍របស់រដ្ឋ កាន់តែច្បាស់ណាស់ និងមានសញ្ញាហានិភ័យដ៏ធ្ងន់ធ្ងរបញ្ជាក់ថាសកម្មភាពប្រល័យពូជសាសន៍ អាចនឹងកើតឡើង ឬអាចកើតឡើងសាជាថ្មី។
កាលពីឆ្នាំទៅ អង្គការសហប្រជាជាតិធា្លប់បានអំពាវនាវឱ្យនាំមេឧត្តមសេនីយ៍ភូមាគ្រាក់ៗ រាប់ទាំងអគ្គមេបញ្ជាការកងទ័ព មីន អូនឡាំងផង ទៅតុលាការ ពីបទប្រល័យពូជសាសន៍។ ក្រុមប្រឹក្សាក៏បានអំពាវនាវជាញឹកញយឱ្យភូមាបញ្ឈប់ប្រតិបត្តិការយោធានិងរៀបចំការវិលត្រលប់របស់រ៉ូហ៊ីងយ៉ាប្រកបដោយសុវត្ថិភាព ប៉ុន្តែគ្រប់គំនិតផ្តួចផ្តើមសុទ្ធតែត្រូវរារាំងដោយចិន ដែលមានសិទ្ធិប្រឆាំងវ៉េតូ។
សម្រាប់ក្រុមអ្នកអង្កេតដែលពុំត្រូវបានអនុញ្ញតឱ្យចូលទៅដល់ផ្ទាល់ដល់កន្លែងកើតហេតុ ស្ថានភាពកាន់តែបន្ទាន់ខ្លាំងទៀត ព្រោះភូមាកំពុងតែបន្តប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ ប្រឆាំងនឹងជនជាតិរ៉ូហ៊ីងយ៉ា។ ជនជាតិរ៉ូហ៊ីងយ៉ាប្រមាណ៦សែននាក់ដែលកំពុងរស់នៅក្នុងទឹកដីកំណើតរបស់ខ្លួន កំពុងរងទុក្ខទណ្ឌជាស្វ័យប្រវត្តិនិងរស់ក្រោមគំនាបនិងការគំរាមកំហែងប្រល័យពូជសាសន៍ជាប់ជានិច្ច។ លក្ខខណ្ឌរស់នៅរបស់ពួកគេ ធ្លាក់ដុនដាបកាន់តែធ្ងន់ធ្ងរយ៉ាងខ្លាំង ក្នុងរយៈពេលមួយឆ្នាំនេះ។ នេះបើក្រុមអ្នកអង្កេតអង្គការសហប្រជាជាតិដដែល ដែលពន្យល់ថា ដោយសារមូលហេតុនេះទើបការធ្វើមាតុភូមិនិវត្តន៍របស់ជនភៀសខ្លួនរ៉ូហ៊ីងយ៉ានៅបង់ក្លាដែសមកភូមាវិញមិនអាចដំណើរការទៅកើត។
របាយការណ៍នេះក៏បានចោទប្រកាន់ក្រុមយោធា ថាបានរំលោភជាថ្មីលើជនស៊ីវិលនៅតំបន់ភាគខាងជើងរដ្ឋរ៉ាឃីន។ តំបន់ដែលមានជម្លោះប្រដាប់បានផ្ទុះជាថ្មីឡើងវិញរវាងទាហានភូមាជាមួយនឹងពួកឧទ្ទាមប្រដាប់អាវុធអារ៉ាខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ