នៅមហាសន្និបាតអង្គការសហប្រជាជាតិ ចិនបញ្ជាក់ពីការមិនចុះញ៉ម និងមិនលុតក្រាប
នៅក្នុងទីក្រុងញូយ៉ក សហរដ្ឋអាមេរិក ថ្នាក់ដឹកនាំបរទេសកំពុងបន្តឡើងថ្លែងសុន្ទរកថាម្តងម្នាក់ៗនៅលើវេទិកានៃមហាសន្និបាតអង្គការសហប្រជាជាតិ។ ចិនតាមរយៈប្រមុខការទូតលោកវ៉ាង យីបានឡើងថ្លែងនាថ្ងៃសៅរ៍ ទី២៨ កញ្ញាដោយប្រើសម្តីធ្ងន់ៗថា ចិននឹងមិនខ្លាចការគំរាមកំហែង និងក៏មិនលត់ជង្គង់នៅចំពោះមុខសម្ពាធឡើយ។ ទោះបីជាលោកវ៉ាង យីមិនបាននិយាយចំឈ្មោះប្រទេសណាមួយក៏ដោយក៏គេដឹងថា លោកចង់ឆ្លើយតបនឹងសម្តីវាយប្រហាររបស់ប្រធានាធិបតីអាមេរិកលោកដូណាល់ ត្រាំដែលបានថ្លែងនៅលើវេទិកាអង្គការសហប្រជាជាតិដដែលនេះកាលពី ៣ថ្ងៃមុន។
ចុះផ្សាយនៅថ្ងៃ៖
ស្តាប់ - ០២:៣៨
គឺនៅលើវេទិកានៃមហាសន្និបាតអង្គការសហប្រជាជាតិដដែលនេះដែលកាលពីថ្ងៃអង្គារ ទី២៤ កញ្ញា ប្រធានាធិបតីអាមេរិកលោកដូណាល់ ត្រាំបានថ្លែងវាយប្រហារចិនដោយចាត់ទុកជាគូប្រជែងមិនស្មើភាពរហូតដល់ចង្អុលមុខចិនជាចារកិច្ចឧស្សាហកម្ម។ គេត្រូវរង់ចាំដល់ថ្ងៃសៅរ៍ ទី២៨ កញ្ញាទើបដល់វេនចិនឡើងថ្លែងសុន្ទរកថាវិញម្តង។ ជាមួយនឹងសម្តីធ្ងន់ៗ និងមិនបាននិយាយចំឈ្មោះអាមេរិក ប្រមុខការទូតចិនលោកវ៉ាង យីបានបញ្ជាក់ៗថា ចិននឹងមិនខ្លបខ្លាចការគំរាមកំហែង ហើយក៏នឹងមិនលុតក្រាបនៅចំពោះមុខការដាក់សម្ពាធដែរ។
បន្ទាប់មក លោកវ៉ាង យីបានលើកឡើងពីសង្រ្គាមពាណិជ្ជកម្មដែលចិន និងអាមេរិកកំពុងមានដោយបញ្ជាក់ថា សង្រ្គាមមួយនេះអាចនឹងរុញពិភពលោកឲ្យធ្លាក់ក្នុងវិបត្តិសេដ្ឋកិច្ចមួយធ្ងន់ធ្ងរ។ គួររម្លឹកថា ពិតមែនតែអាមេរិកក្នុងជំនាន់លោកត្រាំបានចាត់ទុកប្រទេសវ៉េណេស៊ុយអេឡាជាសត្រូវប្រចាំតំបន់ ចាត់ទុកប្រទេសអ៊ីរ៉ង់ជាសត្រូវនៅតំបន់មជ្ឈិមបូព៌ា និងចាត់ទុកប្រទេសរុស្ស៊ីជាគូប្រជែងនៅអន្តរអាត្លង់ទិកក៏ដោយ ក៏ប្រមុខការទូតអាមេរិកលោកម៉ៃ ប៉ូមប៉េអូបានអះអាងដោយមិនលាក់លៀមថា គូប្រជែងជាយុទ្ធសាស្រ្តពិតប្រាកដរបស់អាមេរិកសម្រាប់រយៈពេលវែង គឺចិន។
តើការប្រឈមមុខដាក់គ្នារវាងអាមេរិក និងចិនដែលជាមហាអំណាចសេដ្ឋកិច្ចទី១ និងទី២ ក្នុងលោកមិនមែនកំពុងពុះចែកពិភពលោកជាពីរទេ ឬយ៉ាងណា?។ ពិតជាមានមែន នេះជាចំណាប់អារម្មណ៍ និងការមើលឃើញរបស់អគ្គលេខាធិការអង្គការសហប្រជាជាតិលោក Antonio Guterres។ ថ្លែងបើកមហាសន្និបាតអង្គការសហប្រជាជាតិលើកទី៧៤ ក្នុងថ្ងៃដំបូង លោក Guterres បានសម្លឹងឃើញពិភពលោកពុះចែកជាពីរដោយមានការប្រជែងរវាងមហាអំណាចសេដ្ឋកិច្ចទាំងពីរដែលម្នាក់ៗមានរូបិយវត្ថុរៀងៗខ្លួន មានច្បាប់ពាណិជ្ជកម្ម និងហិរញ្ញវត្ថុដាច់ដោយឡែកពីគ្នា មានអ៊ីនធ័រនែត និងបញ្ញាសិប្បនិម្មិតរៀងៗខ្លួន ព្រមទាំងមានយុទ្ធសាស្រ្តភូមិសាស្រ្តនយោបាយ និងយោធាដាក់ដោយឡែកពីគ្នា។
គួររម្លឹកថា អាមេរិកក្នុងជំនាន់លោកដូណាល់ ត្រាំបានបើកការវាយប្រហារចិនលើគ្រប់សមរភូមិទាំងអស់។ ក្រៅពីពាណិជ្ជកម្ម និងសេដ្ឋកិច្ច នៅមានវិស័យជាច្រើនផ្សេងទៀតដែលទីក្រុងវ៉ាស៊ីនតោនមិនញញើតបរិហារទីក្រុងប៉េកាំងតាំងពីអនុភាពការទូត និងយោធារបស់ចិនរហូតដល់ការរំលោភសេរីភាពសាធារណៈ និងសិទ្ធិជនជាតិភាគតិច។ តែទីក្រុងប៉េកាំងតែងបដិសេធ និងវាយបកវិញដោយចាត់ទុកជាការលូកដៃចូលជ្រៀតជ្រែកកិច្ចការផ្ទៃក្នុងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ