កូរ៉េខាងជើងបាញ់មីស៊ីល ពេលកំពុងត្រៀមចរចានុយក្លេអ៊ែរសាជាថ្មីជាមួយអាមេរិក
ពិតជាទង្វើផ្គើនដ៏អស្ចារ្យមែន ! កូរ៉េខាងជើង បានធ្វើការបាញ់សាកល្បងមីស៊ីលបាលីស្ទិក នៅព្រលឹមថ្ងៃពុធទី ២តុលានេះ តែពីរបីម៉ោងប៉ុណ្ណោះក្រោយសេចក្តីប្រកាសត្រៀមបើកកិច្ចចរចាសាជាថ្មីឡើងវិញ ជាមួយសហរដ្ឋអាមេរិក។ បំបែកមីស៊ីលមួយគ្រាប់ បានហោះទៅធ្លាក់ក្នុងតំបន់សេដ្ឋកិច្ចផ្តាច់មុខរបស់ជប៉ុនផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
រយៈពីរឆ្នាំមកនេះ កូរ៉េខាងជើងមិនដែលធ្វើការសាកល្បងមីស៊ីល ក្នុងទ្រង់ទ្រាយដូច្នេះឡើយ។ ប្រភពកូរ៉េខាងត្បូង បានអះអាងនៅព្រឹកមិញថា កូរ៉េខាងជើងទើបបានធ្វើការសាកល្បងមីស៊ីល ដែលបាញ់ចេញពីនាវាមុជទឹក។ ទីតាំងបាញ់ស្ថិតនៅក្នុងក្រុងកំពង់ផែ Wonsan ក្រុងដែលស្ថិតនៅទល់នឹងសមុទ្ទជប៉ុន និងទំនងជាផែបណ្តែតទឹកផង។
ទំនងជាប្រភេទមីស៊ីលថ្មី ឬមីស៊ីលបាលីស្ទិក Pukguksong-1 ដែលព្យុងយ៉ាងធ្លាប់បានធ្វើការសាកល្បងបានសម្រេចកាលពីថ្ងៃទី ២៤សីហា ២០១៦ម្តង មីស៊ីលបាញ់ហោះឡើងកម្ពស់៩១០គីឡូម៉ែត្រ និងហោះបានក្នុងរយៈចម្ងាយ ៤៥០គីឡូម៉ែត្រ មុននឹងធ្លាក់នៅក្នុងតំបន់សេដ្ឋកិច្ចផ្តាច់មុខរបស់ជប៉ុន។ នេះគឺជាលើកទីមួយហើយ ដែលគ្រាប់មីស៊ីលកូរ៉េខាងជើង បាញ់បានឆ្ងាយយ៉ាងដូច្នេះ។ ប្រសិនបើកូរ៉េខាងជើងបាញ់បន្ទាបខ្លាំង គ្រាប់មីស៊ីល នឹងអាចបាញ់បានកាន់តែឆ្ងាយខ្លាំង។
ជប៉ុន ដែលទទួលបំបែកមីស៊ីលមួយគ្រាប់ ក្នុងតំបន់ដែនទឹករបស់ខ្លួន បានបញ្ចេញប្រតិកម្មថ្កោលទោសភ្លាម ថា “ទង្វើបាញ់មីស៊ីលនេះជារំលោភសេចក្តីសម្រេចចិត្តអង្គការសហប្រជាជាតិ”។
ហេតុអ្វីបានជាកូរ៉េខាងជើងធ្វើការសាកល្បងមីស៊ីល ក្រោយសេចក្តីប្រកាសភ្ជាប់កិច្ចចរចាជាមួយអាមេរិកឡើងវិញនៅថ្ងៃទី ៤តុលាខាងមុខ យ៉ាងដូច្នេះ ? ទង្វើផ្គើនរបស់ព្យុងយ៉ាងនេះ ត្រូវបានគេបកស្រាយថាមធ្យោបាយប្រកាសអំពីសមត្ថភាពយោធារបស់ខ្លួនផង និងជាមធ្យោបាយដាក់សម្ពាធលើសហរដ្ឋអាមេរិក មុននឹងចាប់ផ្តើមចរចានុយក្លេអ៊ែរទ្វេភាគីឡើងវិញ។ ការចរចា ដែលជាការរង់ចាំអស់ជាច្រើនខែមកហើយ នឹងចាប់ផ្តើមសាជាថ្មី នៅថ្ងៃសៅរ៍ខាងមុខ។ កូរ៉េខាងជើង ចង់ចូលអង្គុយតុចរចា ក្នុងនាមជាអ្នកមានប្រៀប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ