ព្យុះសង្ឃរា ហាជីប៊ី សម្លាប់មនុស្សយ៉ាងតិច ៧០នាក់ នៅប្រទេសជប៉ុន
រហូតមកដល់ល្ងាចថ្ងៃអង្គារ ក្រុមជួយសង្រ្គោះ ជប៉ុន នៅបន្តស្វែងរកប្រជាជនដែលកំពុងបាត់ខ្លួន និងដែលអាចជាប់គាំង ដោយសារគ្រោះទឹកជំនន់ ដែលបង្កឡើងដោយខ្យល់ព្យុះសង្ឃរា ហាជីប៊ី។ តាមតុល្យការចុងក្រោយ ដែលប្រកាសដោយទូរទស្សន៍រដ្ឋជប៉ុន NHK មនុស្សយ៉ាងហោច ៧០នាក់ បានស្លាប់បាត់បង់ជីវិត នៅក្នុងគ្រោះមហន្តរាយធម្មជាតិ បង្កឡើងដោយព្យុះកំណាច ហាជីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ក្រុមជួយសង្រ្គោះ ជាង១ម៉ឺននាក់ ដែលមានតាំងពីទាហាន ប៉ូលិស ឆ្មាំសមុទ្រ កំពុងបន្តប្រតិបត្តិការស្វែងរក អ្នករួចរស់ជីវិត ដែលនៅជាប់គាំង នៅក្នុងតំបន់ដែលជន់លិចដោយមហាទឹកភ្លៀង ដែលអ្នកឧតុនិយមជប៉ុនវាយតម្លៃថា មិនធ្លាប់កើតមាន នៅប្រទេសជប៉ុន។
មានប្រភពចេញពីមហាសមុទ្រប៉ាស៊ីហ្វិក ព្យុះសង្ឃរា ហាជីប៊ី ដែលវិល ក្នុងល្បឿន ២០០គីឡូម៉ែត្រក្នុងមួយម៉ោង បានពាំនាំទឹកភ្លៀង ទៅជន់លិចតំបន់ភាគខាងកើត និងខាងជើងប្រទេសជប៉ុន តាំងពីយប់ថ្ងៃសៅរ៍។ នៅថ្ងៃ អង្គារនេះ ភ្លៀងធ្លាក់មិនឈប់ អាចគំរាមកំហែងសាជាថ្មី ប្រជាជនជប៉ុន ហើយនិងដំណើរការស្វែងរករបស់ក្រុមជួយសង្រ្គោះ។
អ្នកនាំពាក្យរដ្ឋាភិបាល លោក Yoshihige Suga បានព្រមានពីកំពស់ទឹកជំនន់កើនឡើង ហើយនិងគ្រោះថ្នាក់រលំបាក់ដី ដោយសារទឹកភ្លៀង។ អាជ្ញាធរជប៉ុនបានអំពាវនាវផងដែរឲ្យប្រជាជនជប៉ុនបន្តប្រយ័ត្នប្រយែង ឲ្យបានខ្ពស់បំផុត។ មនុស្សជាច្រើនម៉ឺននាក់ កំពុងជ្រកកោន ក្នុងមណ្ឌលបណ្តោះអាសន្ន។
នៅក្នុងសុន្ទរកថា ទៅកាន់សមាជិកព្រឹទ្ធសភាជប៉ុននៅថ្ងៃនេះ លោកនាយករដ្ឋមន្រ្តីស៊្ហីនហ្សូ អាបេបានសន្យាបើកការស៊ើបអង្កេត បន្ទាប់ពីមានសេចក្តីរាយការណ៍ដែលថា ជនអនាថា ជប៉ុន២នាក់ ត្រូវបានអាជ្ញាធរមូលដ្ឋាន បដិសេធមិនឲ្យចូលក្នុងជំរកណ្តោះអាសន្ន នៅពេលមានព្យុះភ្លៀង។
ទឹកភ្លៀងធ្លាក់មិនឈប់ កំពុងធ្វើឲ្យទឹកស្ទឹងប្រមាណ ១៨០ ហៀរចូលទៅក្នុងភូមិ និងទីក្រុង ដែលសំបូរមនុស្សរស់នៅ។ ផ្ទះសម្បែងរាប់រយខ្នង រងការបំផ្លាញ ដោយសារខ្យល់ព្យុះ ហាជីប៊ី ចំណែក សាលារៀន មជ្ឈមណ្ឌលមនុស្សចាស់ ស្ថានីយរថភ្លើង និងស្ថាប័នរដ្ឋ ជាច្រើនកន្លែងត្រូវជន់លិចយ៉ាងធ្ងន់ធ្ងរ ដោយសារទឹកភ្លៀង។
តំបន់ដែលរងគ្រោះខ្លាំងជាងគេ គឺ Miyagi និងFukushima ដែលរងគ្រោះស្លាប់ជីវិតមនុស្ស ម្តងហើយ ដោយសាររលកយក្សស៊ូណាមី កាលពីឆ្នាំ ២០១១។ គេកំពុងបារម្ភផងដែរ ពីគ្រោះថ្នាក់ រសាត់អណ្តែតស្បោងខ្មៅ ដែលខ្ចប់ ដី និងស្លឹកឈើ ដែលប្រមូលបានពីតំបន់មានលេចសាយភាយ សារធាតុវិទ្យុសកម្ម នៅក្នុងគ្រោះថ្នាក់ ផ្ទុះរោងចក្រនុយក្លេអ៊ែរនៅFukushima។ តាមអ្នកនាំពាក្យរបស់ក្រសួងបរិស្ថាន គេបានប្រមូលមកវិញ ស្បោង ដី មានសារធាតុវិទ្យុសកម្ម ចំនួន៦ ក្នុងចំណោមស្បោង ១០ ដែល បានរសាត់អណ្តែត ដោយសារទឹកជំនន់ ហៀរចេញពីស្ទឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ