រដ្ឋមន្ត្រីការពារជាតិអាមេរិកទៅអាហ្វហ្កានីស្ថានដោយស្ងាត់ៗ អឺរ៉ុបអំពាវនាវឱ្យមានបទឈប់បាញ់
លោក Mark Esper រដ្ឋមន្ត្រីក្រសួងការពារជាតិអាមេរិក បានធ្វើដំណើរទៅដល់ប្រទេសអាហ្វហ្កានីស្ថាន នៅថ្ងៃអាទិត្យនេះ។ ជាទស្សនកិច្ចដោយឥតព្រាងទុកដែល ប្រព្រឹត្តទៅតែមួយខែកន្លះក្រោយពីលោកដូណាល់ ត្រាំ បានប្រកាសផ្តាច់ការចរចាសន្តិភាពជាមួយពួកការលីបង់។ ក្នុងពេលទន្ទឹមគ្នានេះ តំណាងពិសេសរបស់សហភាពអឺរ៉ុបស្តីអំពីអាហ្វហ្កានីស្ថានបានអំពាវនាវឱ្យមានការឈប់បាញ់នៅអាហ្វហ្កានីស្ថាន ដោយពន្យល់ថាការផ្អាកការចរចាជាឱកាសនៃបញ្ឈប់ជម្លោះ។
ចុះផ្សាយនៅថ្ងៃ៖
ទស្សនកិច្ចលើកដំបូងនៅអាហ្វហ្កានីស្ថាន ក្នុងនាមជារដ្ឋមន្ត្រីក្រសួងការពារជាតិអាមេរិករបស់លោក អេស្ពែរ ប្រព្រឹត្តទៅក្នុងបរិបទដ៏ស្រពិចស្រពិលបំផុតនៃជោគវាសនារបស់កងទ័ពអាមេរិកនៅអាហ្វហ្កានីស្ថាន ក្រោយពីលោកដូណាល់ ត្រាំ បានសម្រេចបញ្ឈប់ងក់ការចរចាសន្តិភាពអាមេរិក-តាលីបង់។
បើតាមលោករដ្ឋមន្ត្រី កម្មវត្ថុនៃទស្សនកិច្ចដោយស្ងាត់ៗនេះមានតែមួយនិងដដែល គឺស្វែងរកកិច្ចព្រមព្រៀងសន្តិភាព និងកិច្ចព្រមព្រៀងនយោបាយឱ្យអាហ្វហ្កានីស្ថាន។ ប៉ុន្តែ រាល់កិច្ចពិភាក្សានិងចរចាតាមផ្លូវទូត ជាបន្ទុករបស់ក្រសួងការបរទេស។ នេះបើតាមការគូសបញ្ជាក់បន្ថែមរបស់លោកអេស្ពែរដែលនឹងត្រូវជួបពិភាក្សាជាមួយអ្នកទទួលខុសត្រូវជាន់ខ្ពស់ ដើម្បីបានរបាយការណ៍ពីយោធានៅអាហ្វហ្កានីស្ថាន។
ការនាំកងទ័ពអាមេរិកត្រលប់ទៅប្រទេសវិញ ជាអាទិភាពដ៏ចំបងមួយនៃនយោបាយការបរទេសអាមេរិក ដែលលង់ក្នុងសង្គ្រាមនៅអាហ្វហ្កានីស្ថានអស់រយៈពេល១៨ឆ្នាំមកហើយ។ ការចរចាស្តីពីការដកកងទ័ពអាមេរិកចេញពីអាហ្វហ្កានីស្ថាន ជាថ្នូរនឹងការធានាផ្តល់សុវត្ថិភាពប្រទេស កាត់បន្ថយអំពើហិង្សា វិះតែនឹងបានសម្រេចទៅហើយ ស្រាប់តែលោក ដូណាល់ត្រាំ បានប្រកាសបិទបញ្ឈប់ទៅវិញ ក្រោយពីមានភេរវកម្មរបស់ពួកតាលីបង់ នៅក្រុងកាប៊ូល ស្លាប់ទាហានអាមេរិកម្នាក់ និងជនស៊ីវិល១១នាក់ កាលពីថ្ងៃទី៧កញ្ញា។ ការចរចាក្រៅផ្លូវការ ទើបចាប់ផ្តើមឡើងវិញ តាំងពីថ្ងៃទី ៤ តុលាមក នៅក្រុងអ៊ីស្លាម៉ាបាដ រវាងតំណាងតាលីបង់និងអន្តរការីពិសេសរបស់អាមេរិក។
មិនជាដោយចៃដន្យឬយ៉ាងណា ក្នុងថ្ងៃតែមួយនេះ តំណាងពិសេសអឺរ៉ុបនៅអាហ្វហ្កានីស្ថាន បានអំពាវនាវឱ្យមានបទឈប់បាញ់ ព្រោះ ឱកាសហុចឱ្យហើយ! ប៉ុន្តែតើធ្វើម្តេចមានបទឈប់បាញ់ទៅកើត បើតាលីបង់ដាច់ខាតមិនទម្លាក់អាវុធនោះ ?! បើតាមមន្ត្រីទូតនេះ តាលីបង់អាចត្រលប់មកកាន់អំណាចវិញ ក្នុងទម្រង់ណាមួយ ក្នុងពេលខាងមុខដ៏ខ្លី និងអាចទទួលយកបទឈប់បាញ់ ដើម្បីសាងទំនាក់ទំនងជាធម្មតាជាមួយបស្ចឹមលោកឡើងវិញ។ អាហ្វហ្កានីស្ថានកំពុងស្ថិតក្នុងស្ថានភាពតានតឹង ក្រោយការបោះឆ្នោតប្រធានាធិបតីថ្ងៃទី ២៨កញ្ញា។ លទ្ធផលត្រូវប្រកាសនៅថ្ងៃសៅរ៍ ត្រូវលើកពេលទៅធ្វើថ្ងៃក្រោយ។ ការលើកពេលមួយថ្ងៃពីរ ជារឿងធម្មតា តែបើយូរទើបជាបញ្ហា។ នេះបើតាមតំណាងអឺរ៉ុបដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ