អន្តោប្រវេសន៍ស្លាប់ក្នុងឡានកាមីញ៉ុងនៅអង់គ្លេស អាចជាជនជាតិវៀតណាម
នៅអង់គ្លេស ការអង្កេតជុំវិញករណីរកឃើញសាកសពមនុស្ស៣៩នាក់ក្នុងឡានទ្រុងមួយ នៅជាយក្រុងឡុងដ៍កំពុងតែបន្តយ៉ាងប្រញឹក។ នៅល្ងាចថ្ងៃសៅរ៍ម្សិលមិញ ប៉ូលិសអង់គ្លេសបានប្រកាសជូនដំណឹងថាអ្នកបើកបរឡានកាមីញ៉ុងនោះ ត្រូវរងការចោទប្រកាន់ជាផ្លូវការពីបទ មនុស្សឃាត ដោយអចេតនា និងមានការឃាត់ខ្លួនបានមនុស្សបីនាក់ផ្សេងទៀត។ ចំណែកជនរងគ្រោះវិញ ពុំទាន់វែករកឃើញអត្តសញ្ញាណអស់ទេ ប៉ុន្តែក្នុងចំណោមសាកសពទាំងអស់នោះ ទំនងជាមានជនជាតិវៀតណាម ចំនួនពាក់កណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
អាយុ២៥ឆ្នាំ អ្នកបើកបរជនជាតិអង់គ្លេស រស់នៅអៀរឡង់ខាងជើង Maurice Robinson ត្រូវរងការចោទប្រកាន់ ពីបទសម្លាប់មនុស្ស៣៩នាក់ ដោយអចេតនា និងពីបទជួញដូរមនុស្ស ជួយឱ្យមានអន្តោប្រវេសន៍ខុសច្បាប់ និងលាងលុយ។ ជនជាប់ចោទត្រូវបង្ហាញខ្លួននៅមុខតុលាការនៅថ្ងៃចន្ទស្អែកនេះតែម្តង។
ទាក់ទងនឹងជនរងគ្រោះបាត់បង់ជីវិតក្នុងរថយន្តកាមីញ៉ុងវិញ ក្រុមអ្នកអង្កេតបានចាប់ផ្តើម វិភាគរកអត្តសញ្ញាណហើយ។ ការជូនដំណឹងនិងសេចក្តីសន្និដ្ឋានដំបូង ក្រុមអ្នកអង្កេតអង់គ្លេស គិតថាមនុស្សស្លាប់ទាំង៣៩នាក់ (ប្រុស៣១នាក់ និងស្រ្តី៨នាក់) ជាជនជាតិចិន ប៉ុន្តែពេលនេះភាពសង្ស័យស្តីអំពីសញ្ជាតិរបស់សាកសពកំពុងកើតមាន។ មានគ្រួសារវៀតណាមជាច្រើន បានចេញមុខសម្តែងក្តីព្រួយបារម្ភ គិតថាកូនចៅរបស់ពួកគេស្ថិតក្នុងចំណោមជនរងគ្រោះស្លាប់នោះ។ គ្រួសារខ្លះបានបញ្ជាក់ថាបានទទួលទូរស័ព្ទកូនប្រាប់ថាសុំលា។ បើតាមBBC តាំងពីរកឃើញឡានកាមីញ៉ុងមានសាកសពមក សមាគមវៀតណាមនៅអង់គ្លេសបានទទួលរូបថត ជនជាតិវៀតណាមប្រមាណ២០នាក់ ដែលគេបាត់ដំណឹង។
ឯកអគ្គរដ្ឋទូតវៀតណាម Tran Ngoc An បានទទួលជួបដោយអ្នកទទួលខុសត្រូវនិងជាអាជ្ញាធរប៉ូលិសមូលដ្ឋាន ព្រមទាំងរដ្ឋមន្ត្រីក្រសួងមហាផ្ទៃអង់គ្លេសរួចហើយនៅថ្ងៃសៅរ៍ម្សិលមិញ។ ជាសរុបក្នុងចំណោមសាកសពទាំង៣៩នាក់ មានប្រមាណ២០នាក់អាចជាជនជាតិវៀតណាម។ ពួកគេភាគច្រើនជាពលរដ្ឋវៀតណាមរស់នៅភាគកណ្តាលនៃប្រទេស ដែលជាតំបន់ក្រីក្រខ្លាំងជាងគេមួយ។ ដើម្បីស្វែងរកជីវិតនិងអនាគតប្រសើរឡើង ពលរដ្ឋតំបន់នេះជាច្រើនបាននាំគ្នាចាកចេញពីស្រុកកំណើត ប្រថុយប្រថានជីវិតនៅបរទេស។
ការរត់ភៀសខ្លួនរបស់ជនជាតិវៀតណាមតំបន់នេះ ច្រើនប្រព្រឹត្តទៅតាមបណ្តាញផ្លូវឆ្លងកាត់រុស្ស៊ី ឬចិន ដោយប្រើក្រដាសស្នាមក្លែងក្លាយ។ ជាដំណើរដ៏គ្រោះថ្នាក់ខ្លាំង និងត្រូវការចំណាយថវិកាច្រើនបំផុត ដោយខ្លះត្រូវបង់ថ្លៃឱ្យមេខ្យល់ដល់ទៅប្រមាណ៣៦០០០អឺរ៉ូ សម្រាប់មនុស្សម្នាក់។ សូមបញ្ជាក់ថានៅវៀតណាម ប្រាក់ខែមធ្យម មានលើសពី២ពាន់ដុល្លារទេក្នុងមួយឆ្នាំ។
បណ្តាញជួញដូរនិងដឹកជញ្ជូនអន្តោប្រវេសន៍ខុសច្បាប់ ច្រើនមានទិសដៅនាំទៅអង់គ្លេស ដើម្បីនាំចូលធ្វើការនៅក្នុងហាងកាត់ក្រចក ឬនៅតាមកសិដ្ឋានខុសច្បាប់លួចដាំកញ្ឋាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ