ថៃ៖កិច្ចប្រជុំកំពូលអាស៊ានលើកទី៣៥ និងអាស៊ានជាមួយដៃគូនឹងគ្មានលោកដូណាល់ ត្រាំ
ប្រទេសថៃធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន និងអាស៊ានជាមួយប្រទេសដៃគូលើកទី៣៥ រយៈពេល ៣ថ្ងៃដោយចាប់ផ្តើមពីថ្ងៃសៅរ៍ ទី២ ដល់ថ្ងៃចន្ទ ទី៤ វិចិ្ឆកា។ ក្រៅពីកិច្ចប្រជុំកំពូលអាស៊ាន និងអាស៊ានជាមួយដៃគូ ក៏នៅមានគម្រោងជំនួបជាលក្ខណៈទ្វេភាគី ឬត្រីភាគីជាច្រើនផ្សេងទៀត។ ក៏ដូចជានៅក្នុងជំនួបកំពូលលើកទី៣៣កាលពីឆ្នាំ ២០១៨ ក្នុងប្រទេសសិង្ហបុរីដែរ លោកប្រធានាធិបតីអាមេរិកដែលជាតួអង្គម្នាក់ដែលគ្រប់គ្នាបានរង់ចាំជាងគេបានលុបចោលការចូលរួមរបស់លោកនៅនាទីចុងក្រោយ។ លោកត្រាំបានបញ្ជូនទីប្រឹក្សាសន្តិសុខជាតិថ្មីលោក Robert O’Brien និងរដ្ឋមន្រ្តីក្រសួងពាណិជ្ជកម្មលោក Wilbur Rossឲ្យចូលរួម។ ភាពជាដៃគូសេដ្ឋកិច្ចថ្នាក់តំបន់គ្រប់ជ្រុងជ្រោយជាប្រធានបទអាទិភាពដែលអាស៊ាន និងក្រុមប្រទេសដៃគូចង់សម្រេចឲ្យបាននៅក្នុងកិច្ចប្រជុំកំពូលលើកទី៣៥ នេះ។
ចុះផ្សាយនៅថ្ងៃ៖
អ្វីៗបានត្រៀមរួចរាល់អស់ហើយសម្រាប់ប្រទេសថៃក្នុងនាមជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៣៥ និងអាស៊ានជាមួយប្រទេសដៃគូ។ ដើម្បីធានាសន្តិសុខ និងសុវត្ថិភាពនៅក្នុងកិច្ចប្រជុំកំពូលដែលមានមនុស្សចូលរួមប្រមាណជា ៣ ០០០នាក់ រដ្ឋអំណាចថៃមិនញញើតនឹងប្រើមធ្យោបាយចាស់ដៃដោយដាក់ពង្រាយកម្លាំងប៉ូលិសចំនួន ១ ៥០០នាក់ និងភ្នាក់ងារសន្តិសុខចំនួន ២ ០០០នាក់។ ការប្រើមធ្យោបាយចាស់ដៃលើកនេះ គឺដើម្បីចៀសវាងកុំឲ្យកើតមានព្រឹត្តិការណ៍បំផ្ទុះគ្រាប់បែកដូចនៅក្នុងកិច្ចប្រជុំថ្នាក់រដ្ឋមន្រ្តីការបរទេសអាស៊ានកាលពីខែសីហាកន្លងទៅ។ គួរបញ្ជាក់ថា កិច្ចប្រជុំកំពូលពេលនេះត្រូវបានរដ្ឋអំណាចថៃរៀបចំនៅជាយក្រុងបាងកក ពោលមិនមែនចំកណ្តាលក្រុងបាងកកទេ។
កំណត់សម្គាល់មួយទៀត រដ្ឋាភិបាលបានអនុញ្ញាតឲ្យមន្រ្តីរាជការដែលធ្វើការក្នុងក្រុងបាងកកឈប់សម្រាកចំនួន ២ថ្ងៃ គឺថ្ងៃចន្ទ ទី៤ និងថ្ងៃអង្គារ ទី៥ វិច្ឆិកា។ គោលដៅ គឺកាត់បន្ថយការកកស្ទះចរាចរក្នុងទីក្រុងដើម្បីជួយសម្រួលដល់ការធ្វើដំណើរចេញ ចូលរបស់អ្នកដែលមកចូលរួមនៅក្នុងកិច្ចប្រជុំកំពូលពេលនេះ។ ភាពជាដៃគូសេដ្ឋកិច្ចថ្នាក់តំបន់គ្រប់ជ្រុងជ្រោយត្រូវបានគេមើលឃើញថា ជាប្រធានបទអាទិភាពដែលអាស៊ាន និងក្រុមប្រទេសដៃគូចង់សម្រេចឲ្យបានលឿនបំផុត។ មានការលើកឡើងថា គឺបរិបទសង្រ្គាមពាណិជ្ជកម្មរវាងអាមេរិក និងចិនដែលកំពុងរុញអាស៊ាន និងក្រុមប្រទេសដៃគូឲ្យពន្លឿនកិច្ចចរចាលើភាពជាដៃគូសេដ្ឋកិច្ចតំបន់គ្រប់ជ្រុងជ្រោយដែលមានសមាជិកអាស៊ានទាំង ១០ប្រទេសបូកនឹងដៃគូសន្ទនា ៦ប្រទេស គឺ ចិន ជប៉ុន កូរ៉េខាងត្បូង ឥណ្ឌា អូស្ត្រាលី និងនូវែលសេឡង់។
ក្រៅពីប្រធានរឿងស្តីពីភាពជាដៃគូសេដ្ឋកិច្ចតំបន់គ្រប់ជ្រុងជ្រោយ កិច្ចប្រជុំក៏គ្រោងជជែកលើប្រធានបទតំបន់ និងអន្តរជាតិជាច្រើនផ្សេងទៀត រួមមានបញ្ហានៅឧបទ្វីបកូរ៉េ ជម្លោះនៅសមុទ្រចិនខាងត្បូង បញ្ហាជនភៀសខ្លួនរ៉ូហ៊ីងយ៉ានៅភូមា ឬមួយការបម្រែបម្រួលអាកាសធាតុជាដើម។ ដោយឡែក និងក៏ដូចជានៅក្នុងកិច្ចប្រជុំកំពូលលើកទី៣៣ ក្នុងប្រទេសសិង្ហបុរីកាលពីឆ្នាំ ២០១៨ ដែរ ប្រធានាធិបតីអាមេរិកលោកដូណាល់ ត្រាំមិនបានមកចូលរួមទេ ដោយលោកបានបញ្ជូនទីប្រឹក្សាសន្តិសុខជាតិថ្មី និងរដ្ឋមន្រ្តីក្រសួងពាណិជ្ជកម្មឲ្យចូលរួម។ ទោះជាយ៉ាងនេះក្តី អវត្តមានលោកត្រាំមិនបានធ្វើឲ្យមានការផ្លាស់ប្តូរកម្មវិធីនៃកិច្ចប្រជុំកំពូលពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ