ប៉ាគីស្ថានបើកច្រកព្រំដែន ជាប្រវត្តិសាស្ត្រ ឱ្យពលរដ្ឋឥណ្ឌាចូលធ្វើធម្មយាត្រា
ជាកិច្ចសហប្រតិបត្តិការប្រកបដោយនិម្មិត្តរូបបំផុតសម្រាប់ឥណ្ឌានិងប៉ាគីស្ថាន ដែលកំពុងមានភាពតានតឹងគ្នាដោយហេតុវិបត្តិកាស្មៀរ។ នៅថ្ងៃសៅរ៍នេះ ពលរដ្ឋឥណ្ឌាកាន់សាសនាSikhs រាប់ពាន់នាក់បានឆ្លងព្រំដែនទៅកាន់ប្រទេសប៉ាគីស្ថាន ដើម្បីប្រារព្ធពិធីធម្មយាត្រា តាមច្រកពិសេសដែលរដ្ឋាភិបាលប៉ាគីស្ថានព្រមព្រៀងតាមសំណើរបស់រដ្ឋាភិបាលឥណ្ឌា។
ចុះផ្សាយនៅថ្ងៃ៖
ពលរដ្ឋឥណ្ឌារាប់ពាន់នាក់ នឹងអាចទៅចូលរួមប្រារព្វខួបកំណើត៥៥០ឆ្នាំ នៃសាសនា Sikhs ដោយស្ថាបនិក Gourou Nanak នៅរវាងប៉ុន្មានថ្ងៃទៀតខាងមុខនេះហើយ។ បន្ទាប់ពីរង់ចាំអស់ជាច្រើនម៉ោង នៅថ្ងៃសៅរ៍ទី៩វិច្ឆិកា ២០១៩ វេលាម៉ោង ២រសៀល ម៉ោងសកល (ត្រូវនឹងម៉ោង៨យប់នៅប្រទេសកម្ពុជា) ប៉ាគីស្ថានបានបើកច្រកព្រំដែន ឱ្យពលរដ្ឋឥណ្ឌាកាន់សាសនាSikhs ក្មេងចាស់ប្រុសស្រី ឆ្លងព្រំដែន ធ្វើដំណើរទៅកាន់វិហារ Kartarpurដែលស្ថិតនៅចម្ងាយប្រមាណ៤គីឡូម៉ែត្រ ពីព្រំដែន ដោយមិនបាច់ប្រើទិដ្ឋាកា។
ការបើកច្រកធម្មយាត្រានេះ ជាលទ្ធផលនៃចរចាគ្នាអស់ជាច្រើនខែ ដ៏តឹងសរសៃក និងទើបសម្រេចកិច្ចព្រមព្រៀង នៅចុងខែតុលា កន្លងទៅថ្មីៗនេះ។ នៅក្នុងចំណោមហ្វូងមហាជនដែលបានឆ្លងព្រំដែនតាមច្រកសាសនានេះមុនគេ គេសង្កេតឃើញមានរូបអតីតនាយករដ្ឋមន្ត្រីឥណ្ឌា លោក ម៉ាន់មូហាន់ ស៊ីង ដែលបានសម្តែងការអបអរ និងចាត់ទុកការបើកច្រកនេះ ថាជាការចាប់ផ្តើមថ្មីនៃទំនាក់ទំនងដ៏ប្រសើរឡើងវិញរវាងប៉ាគីស្ថាន និងឥណ្ឌា។
ការបើកច្រកព្រំដែនមុនថ្ងៃខួប៥៥០ឆ្នាំរបស់Gourou Nanak ជាក្តីរីករាយដ៏ធំធេងណាស់ ! លោកនាយករដ្ឋមន្ត្រីឥណ្ឌា មូឌី បានថ្លែងអំណរគុណភ្លាមដល់នាយករដ្ឋមន្ត្រីប៉ាគីស្ថាន លោក អ៊ីមរ៉ាន់ខាន់ ដែលមានមនសិកាគោរពឥណ្ឌា និង មានកិច្ចសហប្រតិបត្តិការជាមួយឥណ្ឌា។ បន្តិចក្រោយមក លោក អ៊ីមរ៉ាន់ ខាន់ ក៏បានថ្លែងនៅចំពោះមុខរូបព្រះខ័ន និម្មិត្តរូបមួយនៃសាសនាSikhs កោតសរសើរពលរដ្ឋអ្នកស្វែងធម៌ទាំងអស់ដែលបានមកជួបជុំគ្នា និងអ្នកដែលបានធ្វើឱ្យគម្រោងធម្មយាត្រាបានសម្រេចក្នុងរយៈពេលតែ១០ខែ។ លោកនាយករដ្ឋមន្ត្រីប៉ាគីស្ថាន បានប្រកាសថា ការបើកច្រកសាសនាថ្ងៃនេះ គ្រាន់តែកិច្ចចាប់ផ្តើមប៉ុណ្ណោះ សង្ឃឹមថាថ្ងៃណាមួយទំនាក់ទំនងប៉ាគីស្ថាននិងឥណ្ឌានឹងបានប្រសើរកាន់តែខ្លាំងឡើង។
សូមបញ្ជាក់ថា ដោយមានជម្លោះតានតឹងនឹងគ្នា តាំងពីបានឯករាជ្យនៅឆ្នាំ១៩៤៧មក ពលរដ្ឋកាន់និកាយSikhsឥណ្ឌា មិនអាចធ្វើដំណើរមកកាន់ទីកន្លែងសាសនាមួយនេះបានដោយងាយឡើយ។ ប៉ាគីស្ថានរឹតបន្តឹងច្បាប់ផ្តល់ទិដ្ឋាកាណាស់។ មណ្ឌលKartarpur ជាទីកន្លែងសក្ការៈបំផុតរបស់អ្នកកាន់សាសនាSikhs ដែលទទួលភ្ញៀវសាសនាក្នុងមួយថ្ងៃៗប្រមាណ៥ពាន់នាក់។ ទីសក្ការៈ ត្រូវបានពង្រីក លម្អ និងមានដាក់ប៉ិស្តិ៍ត្រួតពិនិត្យអន្តោប្រវេសន៍នៅច្រកចូលផង។ អ្នកកាន់សាសនាSikhs មានទិដ្ឋាកា បានមកដល់ប៉ាគីស្ថានជាបណ្តើរៗហើយ។ គេរាប់ឃើញមានអ្នកកាន់សាសនាSikhs សរុបប្រមាណជាង៣០លាននាក់ នៅទូទាំងពិភពលោក រាប់លាននាក់នៅឥណ្ឌា និងប្រមាណតែ២ម៉ឺននាក់នៅប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ