ក្នុងបរិបទនៃសង្គ្រាមពាណិជ្ជកម្ម កំណើនសេដ្ឋកិច្ចចិន ធ្លាក់ទាបជាងការព្យាករ
នៅថ្ងៃព្រហស្បតិ៍នេះ ចិនបានចេញផ្សាយតួលេខប្រចាំខែតុលា ដែលបង្ហាញអំពីភាពយឺតយ៉ាវនៃកំណើនសេដ្ឋកិច្ច ជាងការគិតទុកពីមុនទៅទៀត។ ផលិតផលឧស្សាហកម្ម សកម្មភាពលក់រាយ បានបន្ថយល្បឿន ចំណែកសកម្មភាពវិនិយោគវិញ បានធ្លាក់ចុះទាបក្នុងកំរិតដ៏ខ្លាំងបំផុតមិនធ្លាប់មានឡើយ ក្នុងអំឡុងពេល២១ឆ្នាំកន្លងមកនេះ។
ចុះផ្សាយនៅថ្ងៃ៖
ស្តាប់ - ០២:០៣
ផលិតផលឧស្សាហកម្មមានកំណើនត្រឹមតែ៤,៧%ប៉ុណ្ណោះនៅខែតុលា ទល់នឹង៥,៨%កាលពីខែកញ្ញា។ ការលក់រាយ ដែលជាកញ្ចក់ឆ្លុះបញ្ចាំងអំពីជីវភាពនិងលទ្ធភាពចាយវាយរបស់ពលរដ្ឋ បានកើនត្រឹមតែ៧,២% ពោលគឺជាល្បឿនដ៏យឺតបំផុត គិតក្នុងរយៈពេល៦ខែនេះ និងទាបជាងការព្យាករ (៧,៨%)។ បើតាមការិយាល័យស្ថិតិ កំណើនផ្នែកវិនិយោគទុនវិញ មានត្រឹមតែ៥,២% ប៉ុណ្ណោះ ដែលជាអត្រាដ៏ទាបបំផុតគិតចាប់តាំងពីឆ្នាំ១៩៩៨មក។
ក្រៅអំពីតួលេខដ៏ស្រអាប់ក្នុងខែតុលា ទស្សនវិស័យសម្រាប់ពេលខាងមុខក៏មិនប្រសើរ។ មានសញ្ញានៃភាពយ៉ាប់យឺនជាច្រើនផ្សេងទៀត ជាពិសេសក្នុងវិស័យអចលនទ្រព្យ ដែលជាទម្រដ៏សំខាន់មួយនៃកំណើនសេដ្ឋកិច្ចចិន។ ដូច្នេះបើតាមអ្នកវិភាគ សកម្មភាពសំណង់បន្ថយល្បឿននៅពេលនេះ នឹងត្រូវបង្អាក់កំណើនសេដ្ឋកិច្ចចិននៅឆ្នាំ២០២០។
ក្នុងបរិបទសេដ្ឋកិច្ចតានតឹងដូច្នេះ នាយករដ្ឋមន្ត្រីចិនបានអំពាវនាវកាលពីដើមសប្តាហ៍ ឱ្យក្រុមហ៊ុនខ្នាតតូចនិងមធ្យម ចូលរួមប្រឹងប្រែងឱ្យខ្លាំងជាងមុនក្នុងការលើកស្ទួយសេដ្ឋកិច្ច ដោយជួយពង្រឹងទីផ្សារការងារឱ្យកាន់តែស្វាហាប់។
ការចេញផ្សាយតួលេខនៃកំណើនសេដ្ឋកិច្ចយឺតយ៉ាវ ធ្លាក់មកក្នុងខណៈដែលចិនកំពុងបន្តប្រឈមនឹងសង្គ្រាមពាណិជ្ជកម្ម ជាមួយសហរដ្ឋអាមេរិក ដែលអូសបន្លាយពេលតាំងពីជាងមួយឆ្នាំមក ដោយមានការដំឡើងពន្ធគយលើផលិតផលនាំចូលជាច្រើន។ សង្គ្រាមដំឡើងពន្ធគ្នាទៅវិញមក បានបង្កផលប៉ះពាល់យ៉ាងខ្លាំងដល់កំណើនសេដ្ឋកិច្ចចិន និងពិភពលោល។ ការចរចាបញ្ចប់សង្គ្រាមពាណិជ្ជកម្ម បានចាប់ផ្តើម ចិននិងអាមេរិក សង្ឃឹមថានឹងអាចចុះកិច្ចព្រមព្រៀងបឋមនៅខែនេះ។ ប្រធានាធិបតីអាមេរិក ធ្លាប់បានព្រលយគម្រោងចង់ចុះហត្ថលេខាលើកិច្ចព្រមព្រៀងពាណិជ្ជកម្មមួយភាគ ជាមួយសមភាគីចិន ក្នុងវេទិកាសេដ្ឋកិច្ចអាស៊ីប៉ាស៊ីហ្វិក ហៅកាត់ APEC នាចុងសប្តាហ៍នេះ នៅប្រទេសស៊ីលី។ តែដោយសារវិបត្តិផ្ទៃក្នុងស៊ីលីបានដកខ្លួនមិនរៀបចំជំនួបនោះវិញ គេពុំឃើញមានការបង្ហើបបង្ហាញ ពីកាលបរិច្ឆេទនិងទីកន្លែងថ្មីចុះកិច្ចព្រមព្រៀងពាណិជ្ជកម្មចិន-អាមេរិកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ