លោកស៊ី ជីនពីង៖ចិនចង់បានកិច្ចព្រមព្រៀងពាណិជ្ជកម្មជាមួយអាមេរិក តែនឹងវាយបកវិញ បើចាំបាច់
នៅថ្ងៃសុក្រ ទី២២ វិច្ឆិកា ប្រធានាធិបតីចិនលោកស៊ី ជីនពីងបានបញ្ជាក់ថា ចិនចង់បានកិច្ចព្រមព្រៀងពាណិជ្ជកម្មបឋមមួយជាមួយអាមេរិក តែនឹងចាត់វិធានការវាយបកអាមេរិកវិញ បើអាមេរិកហ៊ានដាក់ទណ្ឌកម្មថ្មីលើចិន។ គួរបញ្ជាក់ថា ប្រតិកម្មរបស់របស់លោកស៊ី ជីនពីងលើប្រធានរឿងមួយនេះជារឿងកម្រមួយ តាំងពីអាមេរិក និងចិនផ្តើមសង្រ្គាមពាណិជ្ជកម្មជាមួយគ្នានាពាក់កណ្តាលឆ្នាំ ២០១៨។
ចុះផ្សាយនៅថ្ងៃ៖
« យើងនឹងធ្វើការវាយបកវិញ បើចាំបាច់ តែយើងកំពុងធ្វើការយ៉ាងសកម្មដើម្បីព្យាយាមបញ្ជៀសសង្រ្គាមពាណិជ្ជកម្មមួយ » នេះជាសម្តីព្រមានរបស់ប្រធានាធិបតីចិនលោកស៊ី ជីនពីងនៅចំពោះមុខក្រុមអតីតមន្រ្តីជាន់ខ្ពស់អាមេរិកាំង និងក្រុមអ្នកទទួលខុសត្រូវបរទេសផ្សេងទៀតក្នុងទីក្រុងប៉េកាំង។ ប្រមុខរដ្ឋចិនបានបន្ថែមដោយគំរាមថា ចិនមិនដែលចង់បញ្ឆេះសង្រ្គាមពាណិជ្ជកម្មទេ តែចិនក៏មិនខ្លាចនឹងធ្វើសង្រ្គាមមួយនេះដែរ។ ប្រតិកម្មរបស់លោកស៊ី ជីនពីងពេលនេះបានធ្វើឡើង ខណៈដែលរដ្ឋបាលអាមេរិកាំងត្រៀមដាក់ទណ្ឌកម្មពាណិជ្ជកម្មថ្មីលើចិននៅថ្ងៃទី១៥ ធ្នូខាងមុខ ប្រសិនបើកិច្ចព្រមព្រៀងបឋមមួយមិនត្រូវបានរកឃើញពីពេលនេះទៅថ្ងៃទី១៥ ធ្នូទេនោះ។
កាលពីថ្ងៃអង្គារ ទី១៩ វិច្ឆិកា ប្រធានាធិបតីអាមេរិកលោកដូណាល់ ត្រាំបានយល់ឃើញថា ចិននៅមិនទាន់បានធ្វើសម្បទានគ្រប់គ្រាន់នៅឡើយទេ។
គួររម្លឹកថា អាមេរិក និងចិនដែលជាមហាអំណាចសេដ្ឋកិច្ចលំដាប់ទី១ និងលំដាប់ទី២ ក្នុងលោកបានចាត់វិធានការដំឡើងពន្ធលើទំនិញនាំចូលរវាងគ្នាទៅវិញ ទៅមកតាំងពីពាក់កណ្តាលឆ្នាំ ២០១៨ មកម្ល៉េះ។ តែប្រតិកម្មរបស់លោកស៊ី ជីនពីងលើបញ្ហាមួយនេះជារឿងមួយដែលគេកម្រឃើញមានណាស់។ « យើងចង់ធ្វើការឆ្ពោះទៅសម្រេចកិច្ចព្រមព្រៀងបឋមមួយដោយផ្អែកលើមូលដ្ឋានសមភាព និងការគោរពគ្នាទៅវិញទៅមក » នេះជាការបញ្ជាក់របស់លោកស៊ី ជីនពីង។
ដោយឡែក និងបើតាមផ្អែកកាសែត Wall Street Journal ប្រធានាធិបតីចិនបានអញ្ជើញក្រុមអ្នកចរចាអាមេរិកាំងឲ្យទៅចិនដើម្បីបន្តកិច្ចចរចាថ្មីទៀត តែក្រុមអ្នកចរចាអាមេរិកាំងបានទាមទារឲ្យចិនធ្វើសម្បទានបន្ថែមជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ