អាមេរិកសម្តែងក្តីបារម្ភចំពោះការព្យាយាមលូកដៃរបស់ចិននៅក្នុងការបោះឆ្នោតប្រធានាធិបតីតៃវ៉ាន់
នៅថ្ងៃសុក្រ ទី២២ វិច្ឆិកា អ្នកតំណាងអាមេរិកប្រចាំនៅតៃវ៉ាន់បានសម្តែងក្តីបារម្ភចំពោះការព្យាយាមប្រើឥទ្ធិពលរបស់ចិននៅក្នុងការបោះឆ្នោតប្រធានាធិបតីតៃវ៉ាន់នាពេលខាងមុខ។ ប្រតិកម្មរបស់អ្នកតំណាងអាមេរិកនៅតៃវ៉ាន់យ៉ាងដូចនេះបានធ្វើឡើង បន្ទាប់ពីចិនបានសាកល្បងនាវាដឹកយន្តហោះរបស់ខ្លួននៅក្នុងសមុទ្រចិនខាងត្បូងដោយបើកឆ្លងកាត់ច្រកសមុទ្រតៃវ៉ាន់។ គួររម្លឹកថា អាមេរិកបានផ្តាច់ការទូតជាមួយក្រុងតៃប៉ិកក្នុងឆ្នាំ ១៩៧៩ ដើម្បីទទួលស្គាល់ក្រុងប៉េកាំងជាអ្នកតំណាងចិនតែមួយ។ តែក្នុងពេលជាមួយគ្នានេះ អាមេរិកបន្តរក្សាសម្ព័ន្ធមិត្តជាមួយតៃវ៉ាន់ និងជាអ្នកផ្គត់ផ្គង់អាវុធដ៏សំខាន់ឲ្យតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:១១
អ្នកតំណាងអាមេរិកប្រចាំនៅតៃវ៉ាន់ គឺលោក Brent Christensen ដែលមានតួនាទីជានាយកវិទ្យាស្ថានអាមេរិកនៅតៃវ៉ាន់។ ទាក់ទងនឹងការសាកល្បងរបស់នាវាដឹកយន្តហោះចិននៅក្នុងសមុទ្រចិនខាងត្បូងដែលបើកឆ្លងកាត់តាមច្រកសមុទ្រតៃវ៉ាន់ថ្មីៗនេះត្រូវបានលោក Brent ឆ្លើយយ៉ាងដូច្នេះថា « ពិតណាស់ យើងបានតាមដានយ៉ាងយកចិត្តទុកដាក់បំផុតជាមួយនឹងក្តីបារម្ភចំពោះគ្រប់សកម្មភាពបង្កប់ដោយការគំរាមរបស់ចិន »។ គួរបញ្ជាក់ថា អាមេរិកបានផ្តាច់ទំនាក់ទំនងផ្លូវទូតជាមួយតៃវ៉ាន់តាំងពីឆ្នាំ ១៩៧៩ ដើម្បីទទួលស្គាល់ចិនតែមួយ។ តែទន្ទឹមគ្នានេះ ក្រុងវ៉ាស៊ីនតោនបន្តរក្សាសម្ព័ន្ធមិត្តជាមួយក្រុងតៃប៉ិក និងជាអ្នកផ្គត់ផ្គង់គ្រឿងសព្វាវុធដ៏សំខាន់ឲ្យតៃវ៉ាន់។
ចំណែកចិននៅតែបន្តចាត់ទុកតៃវ៉ាន់ជាដែនដីរបស់ខ្លួន និងដែលខ្លួនមិនញញើតនឹងប្រើកម្លាំងវាយប្រហារ បើកោះមួយនេះហ៊ានប្រកាសឯករាជ្យនៅថ្ងៃណាមួយនោះ។ តាមលោក Brent អាមេរិកបានដឹងច្បាស់ណាស់ថា ចិនព្យាយាមគ្រប់មធ្យោបាយទាំងអស់ដើម្បីដាក់គំនាបលើតៃវ៉ាន់ដែលកំពុងត្រៀមរៀបចំបោះឆ្នោតប្រធានាធិបតីនៅដើមឆ្នាំ ២០២០។ « ប្រាកដណាស់ ការប៉ុនប៉ងប្រើឥទ្ធិពលលើដំណើរការប្រជាធិបតេយ្យនៅតៃវ៉ាន់ធ្វើឲ្យយើងព្រួយបារម្ភ » នេះជាការបន្ថែមរបស់លោក Brent។ តាមអ្នកតំណាងអាមេរិកប្រចាំនៅតៃវ៉ាន់រូបនេះដដែល ក្រុងវ៉ាស៊ីនតោនបានចាត់ទុកថា គ្រប់សកម្មភាពទាំងឡាយណាដែលសំដៅកំណត់អនាគតតៃវ៉ាន់ក្រៅពីសកម្មភាពសន្តិវិធី គឺជាការគំរាមកំហែងដល់សន្តិភាព និងសន្តិសុខនៅក្នុងតំបន់អាស៊ីប៉ាស៊ីហ្វិក។
ប្រតិកម្មរបស់អ្នកតំណាងអាមេរិកប្រចាំនៅតៃវ៉ាន់ពេលនេះធ្វើឡើង បន្ទាប់ពីប្រមុខការទូតតែវ៉ាន់បានចោទចិនក្នុងថ្ងៃអាទិត្យ ទី១៧ វិច្ឆិកាពីបទលូកដៃនៅក្នុងការបោះឆ្នោតតៃវ៉ាន់ និងបន្ថែមថា ពលរដ្ឋតៃវ៉ាន់នឹងគ្មានការភិតភ័យឡើយ។ ចំណែករដ្ឋមន្រ្តីការពារជាតិតៃវ៉ាន់បានបញ្ជាក់ពីការបញ្ជូននាវាចម្បាំង និងយន្តហោះចម្បាំងទៅតានដានសកម្មភាពរបស់នាវាដឹកយន្តហោះចិន និងបន្ថែមថា នាវាចម្បាំងអាមេរិក ហើយជប៉ុនក៏បានតាមឃ្លាំមើលដូចគ្នានៅច្រកសមុទ្រតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ