កាសែតអូស្រ្តាលី៖អតីតចារបុរសចិនម្នាក់បានទម្លាយព័ត៌មានប្រាប់អ្នកទទួលខុសត្រូវអូស្រា្តលី
នៅក្នុងប្រទេសអូស្រ្តាលី បណ្តាញសារព័ត៌មានក្នុងស្រុកបានបញ្ជាក់នាថ្ងៃសៅរ៍ ទី២៣ វិច្ឆិកាថា អតីតចារបុរសជនជាតិចិនម្នាក់ឈ្មោះវ៉ង លីជាំងដែលបានផ្តាច់ខ្លួនបានទម្លាយព័ត៌មានប្រាប់អ្នកទទួលខុសត្រូវអូស្រា្តលីពីរបៀបជ្រៀតជ្រែក និងការបំភ្លៃរបស់ចិននៅហុងកុង តៃវ៉ាន់ ឬមួយក៏នៅក្នុងប្រទេសអូស្រា្តលី។ ចារបុរសជនជាតិចិនរូបនោះ រួមទាំងប្រពន្ធ និងកូនម្នាក់កំពុងស្នាក់នៅអូស្រា្តលី ហើយកំពុងសុំសិទ្ធិជ្រកកោននយោបាយពីរដ្ឋអំណាចអូស្រា្តលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
បើតាមបណ្តាញសារព័ត៌មានក្នុងគ្រុប Nine អតីតចារបុរសចិនលោកវ៉ង លីជាំងបានប្រាប់អង្គភាពប្រឆាំងចារកម្មអូស្រា្តលីនូវអត្តសញ្ញាណនៃក្រុមមន្រ្តីជាន់ខ្ពស់ស៊ើបការណ៍សម្ងាត់យោធាចិនប្រចាំហុងកុង រួមទាំងព័ត៌មានលំអិតស្តីពីរបៀបធ្វើប្រតិបត្តិការរបស់ពួកគេ។ លោកវ៉ង លីជាំងបានបញ្ជាក់ថា រូបលោកក៏បានចូលរួមនៅក្នុងប្រតិបត្តិការមួយចំនួនដែរ ពិសេសការចាប់បុគ្គលិកម្នាក់ក្នុងចំណោមប្រាំម្នាក់ដែលបម្រើការនៅក្នុងបណ្ណាគារហុងកុង និងដែលក្រោយមក បុគ្គលិករូបនោះបានលេចមុខជាប់ឃុំនៅក្នុងទឹកដីចិន។
ចំណែកនៅក្នុងកិច្ចសន្ទនាជាមួយសារព័ត៌មានផ្សេងទៀត ដូចជា Sydney Morning Herald លោកវ៉ង លីជាំងបានពន្យល់ថា ក្រុងប៉េកាំងគ្រប់គ្រងដោយសម្ងាត់លើក្រុមហ៊ុនឯកជនដើម្បីចំណាយក្នុងការប្រមូលព័ត៌មានស្តីពីក្រុមប្រឆាំង ឬមួយការជ្រៀតចូលនៅក្នុងប្រព័ន្ធផ្សព្វផ្សាយ។ នៅហុងកុង លោកវ៉ង លីជាំងបានបញ្ជាក់ពីការរៀបចំប្រតិបត្តិការដោយសម្ងាត់នៅពីក្រោយសកម្មភាពរបស់ក្រុមហ៊ុនឯកជន និងក្រុមសារព័ត៌មានហុងកុងដើម្បីប្រឆាំងនឹងក្រុមបាតុករអ្នកប្រជាធិបតេយ្យហុងកុង។ ទាក់ទងនឹងតៃវ៉ាន់ត្រូវបានអតីតចារបុរសចិនរូបនេះដដែលអះអាងថា រូបលោកធ្លាប់បានចូលតៃវ៉ាន់ដោយប្រើអត្តសញ្ញាណក្លែងក្លាយ និងលិខិតឆ្លងដែនជាជនជាតិកូរ៉េខាងត្បូង។
កម្មវត្ថុនៅតៃវ៉ាន់របស់លោក គឺជ្រើសរើសក្រុមភ្នាក់ងារដើម្បីជះឥទ្ធិពលដល់ការបោះឆ្នោតឃុំសង្កាត់តែវ៉ាន់ឆ្នាំ ២០១៨ និងការបោះឆ្នោតប្រធានាធិបតីនៅខែមករាខាងមុខ។ បន្ទាប់មក លោកវ៉ង លីជាំងបានប្រាប់ពីមូលហេតុដែលលោកបានផ្តាច់ខ្លួនទៅកាន់អូស្រា្តលី គឺបារម្ភខ្លាចក្រសួងស៊ើបការណ៍សម្ងាត់តៃវ៉ាន់ដឹងរឿងរ៉ាវរបស់លោក។ ខណៈនេះ លោកវ៉ង លីជាំង រួមទាំងប្រពន្ធ និងកូនម្នាក់កំពុងស្នាក់នៅអូស្រា្តលី ហើយកំពុងសុំសិទ្ធិជ្រកកោននយោបាយពីរដ្ឋអំណាចអូស្រា្តលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ