តើជប៉ុនគ្រប់គ្រងបំណុលសាធារណៈយ៉ាងដូចម្ដេច?
ចុះផ្សាយនៅថ្ងៃ៖
ស្តាប់ - ០៣:៣៣
សម្រាប់ពេលបច្ចុប្បន្ន ជប៉ុនជាប្រទេសមួយ ដែលមានបំណុលសាធារណៈធៀបជាមួយនឹងចំណូលជាង ខ្ពស់ជាងគេលើពិភពលោក។ ក៏ប៉ុន្តែ បើយោងតាមអ្នកជំនាញ បំណុលសាធារណៈរបស់រដ្ឋាភិបាលជប៉ុន ត្រូវគេមើលឃើញថានៅមានភាពល្អប្រសើរនៅឡើយ ធៀបនឹងបណ្តាប្រទេសផ្សេងទៀត។ តើជប៉ុនអាចគ្រប់គ្រងបំណុលរបស់ខ្លួនយ៉ាងដូចម្ដេច?
គិតត្រឹមឆ្នាំ២០១៤ ជប៉ុនបានក្លាយជាប្រទេសមួយ ដែលបំណុលសាធារណៈប្រៀបធៀបជាមួយចំណូលជាតិ វាស់វែងដោយផលិតផលក្នុងស្រុកសរុប (ផ.ស.ស) មានទំហំខ្ពស់បំផុតជាងគេរួចទៅហើយ នៅលើពិភពលោក។ រហូតមកដល់សព្វថ្ងៃ យោងតាមទិន្នន័យឆ្នាំ២០១៧ ទំហំបំណុលរបស់រដ្ឋាភិបាលជប៉ុន តំណាងប្រមាណជាង ២៣៨ភាគរយនៃចំណូលជាតិ។
បើទោះបីជាមានទំហំធំធេងយ៉ាងនេះ ក៏បំណុលសាធារណៈរបស់រដ្ឋាភិបាលជប៉ុនត្រូវគេមើលឃើញថានៅមានភាពល្អប្រសើរនៅឡើយ ធៀបនឹងបណ្តាប្រទេសផ្សេងទៀត។ តើជប៉ុនអាចគ្រប់គ្រងបំណុលសាធារណៈរបស់ខ្លួនយ៉ាងដូចម្ដេច?
គួររំលឹកផងដែរ ចាប់តាំងពីឆ្នាំ១៩៩០ រដ្ឋាភិបាលជប៉ុនបានបន្តអនុវត្តនយោបាយមួយ ដែលអ្នកសេដ្ឋកិច្ចឱ្យឈ្នោះថា “quantitative easing”។ ក៏ប៉ុន្តែ ស្របពេលជាមួយគ្នា ជប៉ុនក៏ត្រូវប្រឈមជាមួយនឹងបញ្ហាឱនភាពថវិកាផងដែរ ពោលគឺការចំណាយសាធារណៈតែងតែធំជាងចំណូលជាតិ។
អស់រយៈពេលរាប់សិបឆ្នាំ តាមរយៈគោលនយោបាយសេដ្ឋកិច្ចរបៀបនេះ រដ្ឋាភិបាលជប៉ុនអាចដំឡើងតម្លៃទ្រព្យសកម្ម បញ្ចុះអត្រាការប្រាក់ និងធ្វើឱ្យតម្លៃប្រាក់យេនធ្លាក់ចុះ ពោលគឺដើម្បីបង្កើនអត្រាអតិផរណា លើកកម្ពស់ការនាំចេញ ការទាក់ទាញការវិនិយោគពាណិជ្ជកម្ម និងចុងក្រោយជំរុញកំណើនសេដ្ឋកិច្ច។
ជាឧទាហរណ៍ នៅពេលណាដែលប្រាក់យេនរបស់ជប៉ុនកាន់តែមានតម្លៃទាប នោះក៏មានន័យថា ប្រទេសផ្សេងៗអាចប្រើប្រាស់លុយរបស់ខ្លួនតិចជាងមុន ដើម្បីទិញទំនិញជប៉ុនដដែល ឬប្រើប្រាស់លុយរបស់ខ្លួនដដែល ដើម្បីទិញទំនិញជប៉ុនបានច្រើនជាងមុន។ ឧបមាថា កាលពីមុន គេប្រើមួយដុល្លារអាមេរិក ដើម្បីទិញបានសៀវភៅជប៉ុនមួយក្បាល ដល់ពេលឥឡូវ សៀវភៅជប៉ុនធ្លាក់តម្លៃពាក់កណ្ដាល នុ៎ះគេប្រើប្រាស់ត្រឹមតែមួយដុល្លារប៉ុណ្ណោះ ប៉ុន្តែគេអាចទិញសៀវភៅជប៉ុនបានពីរក្បាល។ ដើម្បីបញ្ចុះតម្លៃប្រាក់យេន រដ្ឋាភិបាលជប៉ុនបានបង្ហូរប្រាក់យេនបន្ថែមក្នុងទីផ្សារ ឫទិញដុល្លារអាមេរិកទុក។
ជាក់ស្ដែង ស្របពេលដែលគោលនយោបាយទាំងនេះ បានផ្ដល់ផលវិជ្ជមានដល់ អត្រាអតិផរណាត្រឹមកម្រិតណាមួយដែលគេចង់បាន និងកំណើនសេដ្ឋកិច្ច ក៏គេអង្កេតឃើញថា រដ្ឋាភិបាលជប៉ុនត្រូវប្រឈមនឹងឱនភាពថវិកាយ៉ាងធ្ងន់ធ្ងរ។
បន្ថែមពីលើនេះ បញ្ហាផ្សេងៗជាបន្តបន្ទាប់ តួយ៉ាង វិបត្តិសេដ្ឋកិច្ចសកលឆ្នាំ២០០៧ដល់២០០៩ តាមពីក្រោយដោយ គ្រោះរញ្ជួយផែនដី និងរលកយក្សស៊ូណាមិ កាលពីឆ្នាំ២០១១ សុទ្ធតែបានរួមចំណែកធ្វើឱ្យការចំណាយរបស់រដ្ឋាភិបាលជប៉ុនបន្តកើនឡើង។ ជាលទ្ធផល ស្ថាប័នវាយតម្លៃចំណាត់ថ្នាក់បំណុល Moody’s បានទម្លាក់ចំណាត់ថ្នាក់ជប៉ុនពី Aa3 មកត្រឹម Aa2 នៅឆ្នាំ២០១១ នេះផងដែរ។
ខុសពីបណ្តាប្រទេសផ្សេងៗលើពិភពលោក ដែលបំណុលសាធារណៈរបស់ខ្លួន ត្រូវធ្វើឡើងតាមរយៈ ការខ្ចីលុយពីរដ្ឋាភិបាលបរទេស ឬពីទីផ្សារហិរញ្ញវត្ថុអន្តរជាតិ, បំណុលរបស់រដ្ឋាភិបាលជប៉ុនភាគច្រើនធ្វើឡើងដោយការខ្ចីពីប្រជាជនខ្លួនឯង។
ក្នុងផ្នត់គំនិតជាមូលដ្ឋានរបស់ប្រជាជនជប៉ុន “ថ្ងៃស្អែកអាចនឹងមានគ្រោះធម្មជាតិជាយថាហេតុ” ដូច្នេះ ពួកគេមាននិន្នាការបារម្ភពីថ្ងៃអនាគត និងត្រៀមសន្សំលុយឱ្យបានច្រើន តាមតែអាចធ្វើទៅបាន។ ចុងក្រោយ លុយសន្សំទាំងនោះហើយដែលរដ្ឋាភិបាលជប៉ុនជាអ្នកខ្ចី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ