តៃវ៉ាន់ជម្រកថ្មីរបស់ពលរដ្ឋហុងកុងក្មេងៗ ?
ចុះផ្សាយនៅថ្ងៃ៖
ស្តាប់ - ០៤:៣២
បាតុកម្មដែលរងការបង្ក្រាបយ៉ាងខ្លាំងពីរដ្ឋាភិបាលហុងកុង អស់រយៈពេលជាង៦ខែកន្លងមកនេះ បានធ្វើឱ្យពលរដ្ឋលើអតីតដែនដីអាណានិគមនិយមអង់គ្លេសជាច្រើន ចាប់អស់ជំនឿលើជោគវាសនាអនាគតរបស់ទឹកដីកំណើត។ ប្រឈមនឹងស្ថានភាពនយោបាយលែងជាក់លាក់ ពលរដ្ឋហុងកុងជាច្រើនមានគំនិតចង់និរទេសខ្លួន ទៅស្វែងរកអនាគតថ្មីលើទឹកដី “តៃវ៉ាន់”។ ហេតុអ្វីតៃវ៉ាន់ ?
តៃវ៉ាន់ជាដែនដីដ៏ទាក់ទាញ ! ភាពស្ងប់ស្ងាត់ និងភាពស្រទន់របស់កោះ បានទាក់ទាញ តាំងពីយូរយារមកហើយ ពលរដ្ឋហុងកុងដែលចង់គេចពីភាពរញឹករញៃ វក់វីរក្នុងក្រុងដ៏ធំ ឬចង់គេចពីទីផ្សារអចលនទ្រព្យដែលថ្លៃកប់ពពក។ ប៉ុន្តែ ចរន្តចំណាកស្រុកពីហុងកុង ទៅតៃវ៉ាន់ ចាប់ស្ទុះខ្លាំងមានចរន្តលឿនមែនទែន នារយៈពេលប៉ុន្មានខែចុងក្រោយនេះ។
គិតពីខែមករា ដល់ខែកញ្ញាឆ្នាំ២០១៩ អាជ្ញាធរតៃវ៉ាន់បានចេញលិខិតស្នាក់នៅ រយៈពេលខ្លី- វែង និងអចិន្ត្រៃយ៍ ដល់ពលរដ្ឋហុងកុង ចំនួនជាង៤ពាន់ករណី ពោលគឺជាសន្ទុះកើនឡើងជិត ៣០% បើប្រៀបទៅនឹងរយៈពេលដូចគ្នា នៅឆ្នាំ២០១៨។
ចំណែកចំនួនអ្នកវិនិយោគពីហុងកុងមកនៅលើកោះតៃវ៉ាន់វិញ បានកើនឡើងស្ទើរមួយជាពីរ នៅឆ្នាំនេះ។ សម្រាប់ក្រុមអ្នកជំនួញ ដែលកំពុងនិរទេសរកទីផ្សារតៃវ៉ាន់ ហុងកុងលែងមានភាពប្រាកដប្រជាទៀតហើយ ! គេមិនដឹងថាតើនឹងមានរឿងអ្វីកើតឡើងនៅថ្ងៃស្អែកទេ។ សម្ពាធកម្លាំងខាងក្រៅ(ចិន)ធ្ងន់ខ្លាំងដែលអាចប្តូរទិដ្ឋភាពហុងកុងគ្រប់យ៉ាង។ ខ្លះទៀតយល់ថា ហុងកុងមិនអាចត្រលប់ទៅដូចពីមុនបានវិញឡើយ ! ពួកគេពុំសំលឹងឃើញអនាគតចែងចាំងរបស់ហុងកុងទេ ! ទើបត្រូវស្វែងរកអនាគតថ្មី នៅតៃវ៉ាន់។
ហេតុអ្វីតៃវ៉ាន់ ?
តៃវ៉ាន់ និងហុងកុង ជាដែនដីពីរដុំដែលចងភ្ជាប់រួមគ្នាដោយវប្បធម៌តែមួយ មកពីទំនាបទន្លេលឿងដូចគ្នា និងជាផ្កាយរណបសេដ្ឋកិច្ចពីររបស់ចិនដូចគ្នា។ ធ្លាប់តំបន់ដែនកោះក៏ក្រីក្រតោកយ៉ាក ហុងកុង ប្រែថា « កំពង់ផែទឹកអប់ » ដែលក្នុងពេលមួយប៉ប្រិចភ្នែក (ប៉ុន្មានទសវត្សរ៍) បានប្រែមុខមាត់ទៅជាស្នូលហិរញ្ញវត្ថុពិភពលោក និងដែលជាច្រកទ្វារសម្រាប់អ្នកវិនិយោគបរិទេសជ្រៀតចូលទៅចិន ត្រូវប្រឈមនឹងគំនាបប៉េកាំងដើម្បីរក្សាស្វ័យតភាពនិងអត្តសញ្ញាណពិសេសរបស់ខ្លួន កាន់តែត្រដាបត្រដួសឡើងៗ។ ពាក្យថាសេរីភាពដែលហុងកុងធ្លាប់ស្គាល់ ក្រោមគោលការណ៍ ប្រទេសមួយប្រព័ន្ធពីរ កំពុងតែរួញជាលំដាប់ ហើយនឹងរួញរហូតទាល់តែក្លាយជាប្រទេសមួយប្រព័ន្ធមួយជាក់ជាពុំខាន។
ចំណែកតៃវ៉ាន់ ដែលមានទំនាក់ទំនងតានតឹងជាមួយប៉េកាំង តាំងពីជាង៦០ឆ្នាំមកដែរ និងប្រឹងទប់ឥទ្ធិពលចិនជារហូតមក ក៏បានក្លាយកូននាគសេដ្ឋកិច្ចមួយ និង រះត្រចះត្រចែងលើពិភពលោកក្នុងវិស័យបច្ចេកវិទ្យា តាមរយៈក្រុមហ៊ុន Asus Acer Foxconn។ល។ ថ្វីបើស្រមោលចិន នៅតាមអន្ទោល មិនឆ្ងាយពីតៃវ៉ាន់ក្តី ព្រោះប៉េកាំងតែងចាត់ទុកតៃវ៉ាន់ជាចំណែកមួយរបស់ចិនក៏ដោយ ក៏តៃវ៉ាន់ជាដែនដីដែលពលរដ្ឋមានសេរីភាព ក្នុងការបញ្ចេញមតិ មានសិទ្ធិបោះឆ្នោតជ្រើសរើស ប្រធានាធិបតី តំណាងរាស្ត្រ និងសិទ្ធិផ្សេងទៀតដែលហុងកុងគ្មាន និងលែងមាន។ តាមរយៈមេរៀនហុងកុង ថាគេមិនអាចទុកចិត្តលើបក្សកុម្មុយនិស្តចិនបាន តៃវ៉ាន់ទំនងជាអាចថែរក្សាដែនកោះ ថែរក្សាសេរីភាពរបស់ខ្លួន កុំឱ្យធ្លាក់ក្នុងក្រញាំដៃចិនបាន។ នេះហើយជាភាពទាក់ទាញមួយទៀតរបស់តៃវ៉ាន់ សម្រាប់ក្រសែភ្នែកពលរដ្ឋហុងកុង។
តាមធម្មតា ដើម្បីទប់ស្កាត់លំហូរអន្តោប្រវេសន៍មកពីចិនដីគោក អាជ្ញាធរតៃវ៉ាន់មិនទទួលស្គាល់ទស្សនៈ សុំជ្រកកោននយោបាយទេ និងមិនអនុញ្ញាតឱ្យមានច្បាប់ទទួលអន្តោប្រវេសន៍ ក្នុងក្របខ័ណ្ឌជាជនភៀសខ្លួនឡើយ។ ប៉ុន្តែតៃវ៉ាន់ ដែលតែងគាំទ្រចលនាបាតុកម្មនៅហុងកុងជារហូតមក មានភាពអនុគ្រោះជានិច្ចដល់ពលរដ្ឋហុងកុង។ ក្នុងន័យនេះ ពលរដ្ឋហុងកុងអាចសុំសិទ្ធិស្នាក់នៅលើកោះតៃវ៉ាន់ តាមរយៈយន្តការផ្សេង ដូចជាតាមរយៈការផ្តល់ទិដ្ឋាការជាអ្នកវិនិយោគ។ ដើម្បីអាចទទួលបានសិទ្ធស្នាក់នៅនៅតៃវ៉ាន់ គេត្រូវធ្វើវិនិយោគ តែក្នុងតម្លៃ ៦លានដុល្លារតៃវ៉ាន់ (ត្រូវជាប្រមាណ២០ម៉ឺនដុល្លារអាមេរិក)ប៉ុណ្ណោះ។ ជាកំរិតវិនិយោគដ៏ទាបជាងការចំនាយវិនិយោគនៅក្នុងប្រទេសផ្សេងទៀត ដូចយ៉ាង សហរដ្ឋអាមេរិក កាណាដា ឬអូស្ត្រាលី។
ចរន្តអន្តោប្រវេសន៍ហុងកុងទៅតៃវ៉ាន់នៅពេលនេះ ត្រូវបានគេចាត់ទុកថា ចលនាចំណាកស្រុក រលកទីបី។ លើកទីមួយ កាលពីឆ្នាំ១៩៩៧ នៅពេលអង់គ្លេសបានប្រគល់ដែនដីអាណានិគមន៍ហុងកុង ទៅឱ្យចិនគ្រប់គ្រងវិញ។ លើកទីពីរ នៅឆ្នាំ២០១៤ ក្រោយបរាជ័យនៃចលនាបដិវត្តឆ័ត្រ ក្នុងទ្រង់ទ្រាយតូចជាងលើកទីមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ