ជប៉ុនអនុម័តផែនការផ្តល់សន្ទុះសេដ្ឋកិច្ចតម្លៃជាង ១២០ពាន់លានដុល្លារអាមេរិក
នាយករដ្ឋមន្ត្រីជប៉ុន លោក ស្ហ៊ីនហ្សូ អាបេ បានបង្ហាញផែនការផ្តល់សន្ទុះសេដ្ឋកិច្ចជាតិ និងការវិនិយោគ ទ្រង់ទ្រាយធំ តម្លៃប្រមាណ ១៣០០០ ពាន់លានដុល្លារយ៉េន (១២២ពាន់លានដុល្លារអាមេរិក) ដើម្បីបញ្ចៀសប្រទេសឱ្យធ្លាក់ក្នុងអន្លង់សេដ្ឋកិច្ចដើរថយក្រោយនៅឆ្នាំ២០២០។ បើបូកសរុបការវិនិយោគក្នុងវិស័យឯកជនទៀត ផែនការមានទំហំដល់ទៅ ២៦០០០ពាន់លានយ៉េន។ នេះបើតាមប្រភពសារព័ត៌មានជប៉ុន។
ចុះផ្សាយនៅថ្ងៃ៖
ស្តាប់ - ០២:១៨
ជិត៥០%នៃប្រាក់វិនិយោគសាធារណៈនឹងឧទ្ទិសដល់ការជួសជុល និងធ្វើទំនើបកម្មហេដ្ឋារចនាសម្ព័ន្ធ ដែលទ្រុឌទ្រោមដោយគ្រោះមហន្តរាយធម្មជាតិ នារយៈពេលប៉ុន្មានឆ្នាំកន្លងមកនេះ។
ផែនការដែលលើកឡើងសម្រាប់រយៈពេលច្រើនឆ្នាំ ក៏ទៅសម្រួលផលប៉ះពាល់បណ្តាលមកពីដំឡើងពន្ធលើតម្លៃបន្ថែមកាលពីថ្ងៃ១តុលាផង និងជួយផ្តល់សន្ទុះដល់សេដ្ឋកិច្ច ក្រោយការរៀបចំប្រកួតកីឡាអូឡាំពិករដូវក្តៅ ឆ្នាំក្រោយទៀត។
ជំនួយនាំចេញសម្រាប់កសិករចិញ្ចឹមសត្វ ក៏មានបញ្ចូលក្នុងវិធានការផ្តល់សន្ទុះសេដ្ឋកិច្ចរបស់រដ្ឋាភិបាលដែរ។ នេះបើតាមភ្នាក់ងារព័ត៌មានKyodo។
បើតាមលោកនាយករដ្ឋមន្ត្រី នេះជាផែនការប្រកបដោយមហិច្ឆតានិងមហិទ្ធិរិទ្ធ។ ហើយរដ្ឋាភិបាលសង្ឃឹមថានឹងលើកស្ទួយផលិតផលសរុបក្នុងស្រុកបាន១,៤%។ ប៉ុន្តែទោះបីជាផែនការមានតម្លៃមហាសាលក្តី ក៏អ្នកសេដ្ឋកិច្ចមិនយល់ស្របទាំងស្រុងតាមការអួតអាងរបស់រដ្ឋាភិបាលទេ។ ផែនការរបស់លោកអាបេ ទំនងជាអាចបញ្ចៀសវិបត្តិសេដ្ឋកិច្ចដើរថយក្រោយនៅឆ្នាំ២០២០មែន តែមិនគ្រប់គ្រាន់សម្រាប់បញ្ចៀសវិបត្តិសេដ្ឋកិច្ចដើរបន្ថយល្បឿនបានឡើយ។ សម្រាប់អ្នកវិភាគសេដ្ឋកិច្ច ឥទ្ធិពលនៃផែនការមានកំរិតណាស់ ព្រោះវាអាចជួយបំប៉នបានតែក្នុងវិស័យពាក់ព័ន្ធនឹងហេដ្ឋារចនាសម្ព័ន្ធ តែមិនបានជួយឱ្យមានកំណែទម្រង់ស៊ីជម្រៅទេ។
ជប៉ុនមានទម្លាប់លើកផែនការផ្តល់សន្ទុះសេដ្ឋកិច្ចឱ្យអណ្តែតឡើងវិញ តែនយោបាយប្រើរូបិយបណ្ណនិងហិរញ្ញវត្ថុបែបនេះបានធ្វើឱ្យបំណុលជាតិដែលខ្ពស់ស្រាប់ កើនឡើងកាន់តែកប់ពពក (២៣៨%នៃផលិតផលសរុបក្នុងស្រុកនៅឆ្នាំ២៩១៨ បើតាមFMI)។
នេះជាផែនការ Abenomics ដែលលោកអាបេ បានប្រកាន់យក តាំងពីលោកវិលមកកាន់អំណាចនៅឆ្នាំ២០១២។ នយោបាយនេះបានធ្វើឱ្យប្រាក់យេនចុះថ្លៃ សម្រួលដល់ក្រុមហ៊ុននាំចេញ តែមិនអាចស្តារឱនភាពបានទេ។ ម្យ៉ាងវិញទៀត ផែនការ Abenomics ទីបី ដែលចង់ការកំណែទម្រង់រចនាសម្ព័ន្ធ ជួបការយឺតយ៉ាវខ្លាំង និងក្រសម្រេចបានជារូបរាងណាស់ ដោយហេតុជប៉ុនកំពុងប្រឈមនឹងបញ្ហាដ៏ធំមួយទៀតគឺវិបត្តិប្រជាសាស្ត្រ ចំនួនប្រជាជនធ្លាក់ចុះលឿនជ្រុល។ នេះបើតាមរបាយការណ៍ចុងក្រោយរបស់មូលនិធិរូបយិវត្ថុស្តីពីប្រទេសជប៉ុន ចេញផ្សាយកាលពីចុងខែវិច្ឆិកា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ