ចិន៖បាត់ខ្លួនអ្នកកាសែត ៤នាក់ ក្រោយមានការអំពាវនាវឲ្យលោកស៊ី ជីនពីងចុះពីតំណែង
នៅក្នុងប្រទេសចិន រឿងរ៉ាវជុំវិញសំបុត្រចុះផ្សាយលើគេហទំព័រសារព័ត៌មានមួយឈ្មោះ Wujie News បានធ្វើឲ្យបាត់ខ្លួនអ្នកកាសែតចំនួន ៤នាក់។ តាំងពីជាងមួយសប្តាហ៍មកហើយដែលក្រុមការងាររបស់សារព័ត៌មាន Wujie News បាត់ដំណឹងសូន្យពីអ្នករួមការងារទាំង ៤រូបរបស់ខ្លួន។ សូមជម្រាបជូនថា សំបុត្រដែលបានចុះផ្សាយលើគេហទំព័រសារព័ត៌មាន Wujie News ជាសំបុត្រអនាមិកដែលអំពាវនាវឲ្យលោកប្រធានាធិបតីចិនស៊ី ជីនពីងចុះចេញពីតំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
សំបុត្រអនាមិកនោះត្រូវបានគេដកចេញវិញភ្លាមៗពីគេហទំព័រសារព័ត៌មាន Wujie News បន្ទាប់ពីចុះផ្សាយបានរយៈពេលខ្លីក្នុងខែមីនានេះ។ នៅក្នុងសំបុត្រដែលគេមិនដឹងឈ្មោះអ្នកនិពន្ធនោះ បានសរសេររៀបរាប់ពីកំហុសឆ្គងនយោបាយយ៉ាងវែងអន្លាយរបស់លោកប្រធានាធិបតីចិនស៊ី ជីនពីង ព្រមទាំងបានអំពាវនាវឲ្យលោកចុះចេញពីតំណែងទៀតផង។ ទន្ទឹមគ្នានឹងការដកសំបុត្រនោះចេញពីគេហទំព័រ Wujie News ក៏មានបាត់ដំណឹងអ្នកកាសែតបម្រើការងារឲ្យ Wujie News ចំនួន ៤នាក់ដែរ។
អ្នកកាសែតម្នាក់របស់ Wujie News ដែលមិនព្រមបញ្ចេញឈ្មោះបានប្រាប់ AFP នៅថ្ងៃព្រហស្បតិ៍ ទី២៤ មីនាថា អ្នករួមការងារបាត់ខ្លួនទាំង ៤នាក់នោះ មានលោកអគ្គនាយក លោកនិពន្ធនាយក និងអ្នកកាសែត ២នាក់។ តាមអ្នកកាសែតមិនបញ្ចេញឈ្មោះរូបនេះដដែលឲ្យដឹងថា រូបអគ្គនាយក និងរូបនិពន្ធនាយកបានបាត់ដំណឹងតាំងពីសប្តាហ៍មុនម្ល៉េះ។ ចំណែកអ្នកកាសែត ២នាក់ មានម្នាក់ឈ្មោះ យ៉ាយ៉ាត្រូវបានប៉ូលិសចាប់ខ្លួននៅព្រលានយន្តហោះក្នុងក្រុងប៉េកាំងកាលពីសប្តាហ៍កន្លងទៅ មុនពេលលោកយ៉ាយ៉ាត្រៀមឡើងយន្តហោះទៅកាន់ហុងកុង។
មេធាវីការពារលោកយ៉ាយ៉ាបានប្រាប់ឲ្យដឹងថា ការចាប់ខ្លួនកូនក្តីរបស់លោកប្រហែលជាមិនមានជាប់ពាក់ព័ន្ធនឹងសំបុត្រអនាមិកទាមទារឲ្យលោកស៊ីជីនពីងចុះចេញពីតំណែងទេ។ ចំណែកក្រុមអង្គការក្រៅរដ្ឋាភិបាលផ្នែកការពារសិទ្ធិមនុស្សបានភ្ជាប់ការចាប់ខ្លួនលោកយ៉ាយ៉ាទៅនឹងការដែលលោកយ៉ាយ៉ាបានព្យាយាមប្រាប់អគ្គនាយករបស់ខ្លួនពីគ្រោះថ្នាក់នៃការចុះផ្សាយសំបុត្រអនាមិកនោះ។ យ៉ាងណាក៏ដោយ តាំងពីថ្ងៃពុធសប្តាហ៍មុនមក គេហទំព័រ Wujie News មិនបានចុះផ្សាយអត្ថបទព័ត៌មានថ្មីអ្វីទេ និងដែលគ្រប់គ្នាបារម្ភពីការឈានទៅបិទទ្វារទាំងស្រុងផង។
គួរជម្រាបជូនថានៅប្រទេសណាមិនដឹងទេ តែបើនៅចិន ការទិតៀន រិះគន់ថ្នាក់ដឹកនាំកំពូលនៅតាមបណ្តាញសារព័ត៌មានជារឿងមួយកម្រមាន និងក៏ជារឿងមួយដែលមិនអាចអត់ឱនឲ្យបានដែរ។ តាំងពីការឡើងកាន់តំណែងប្រធានាធិបតីនាដំណាច់ឆ្នាំ ២០១២ មក លោកស៊ី ជីនពីងបានរឹតបន្តឹងបន្ថែមលើមធ្យោបាយឃោសនាមហាជន និងសង្គមស៊ីវិល ដោយមានការចាប់ឃុំសកម្មជនជាច្រើនរយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ