AirAsia៖យន្តហោះស្ថិតក្រោមការបញ្ជារបស់អ្នកបើកបរជនជាតិបារាំង នៅមុនពេលធ្លាក់
យន្តហោះរបស់ក្រុមហ៊ុនអាកាសចរណ៍ AirAsia ដែលបានធ្លាក់កាលពីថ្ងៃទី ២៨ ធ្នូ ឆ្នាំ២០១៤ ពេលនេះក្រុមអ្នកស្រាវជ្រាវបានដឹង ពីតំរុយខ្លះៗពីមូលហេតុនៃការធ្លាក់ហើយ។ តាមការឲ្យដឹង ពីអាជ្ញាធរ របស់ឥណ្ឌូណេស៊ី ដោយបានឆ្លងកាត់ការវិភាគ លើប្រអប់ខ្មៅបានបញ្ជាក់ថាយន្តហោះបានហោះឡើងទៅលើត្រង់ ក្នុងល្បឿនយ៉ាងលឿន ខុសពីធម្មតា មុននឹងធ្លាក់ចុះទៅក្នុងសមុទ្រ។តាមព័ត៌មានចុងក្រោយពីក្រុមអ្នកស្រាវជ្រាវ ឥណ្ឌូណេស៊ីដែរ គឺថា មុនពេលដែលយន្តហោះធ្លាក់ យន្តហោះនេះ ស្ថិតក្រោមការ បញ្ជា របស់សហអាកាសយានិកជនជាតិបារាំង។
ចុះផ្សាយនៅថ្ងៃ៖
ស្តាប់ - ០១:៣៦
អស់រយៈពេលមួយខែមកហើយ ដែលក្រុមស្រាវជ្រាវឥណ្ឌូណេស៊ី បានធ្វើការយ៉ាងត្រដាបត្រដួល ដើម្បីស្រង់យកសាកសពមនុស្ស និងបំណែកយន្តហោះចេញពីសមុទ្រ។ ទោះបីជាយ៉ាងណា អាជ្ញាធរឥណ្ឌូណេស៊ី នៅមិនទាន់បានសន្និដ្ឋានឲ្យជាក់លាក់ អំពីមូលហេតុដែលបណ្តាលឲ្យយន្តហោះ AirAsia ធ្លាក់នោះទេ។ ក្រុមអ្នកស្រាវជ្រាវគ្រាន់តែបានបញ្ជាក់ថា ក្នុងពេលដែលយន្តហោះជួបគ្រោះថ្នាក់ អាកាសធាតុមានលក្ខណៈអាក្រក់ជាខ្លាំង ដោយមានខ្យល់ព្យុះ និងភ្លៀងទៀតផង។
ដោយយោងតាមទិន្នន័យរបស់ ប្រអប់ខ្មៅ យន្តហោះនេះ បានហោះឡើងទៅលើត្រង់ខុសពីធម្មតា ក្នុងល្បឿនយ៉ាងលឿនស្លេវ។ ក្នុងរយៈពេលតែ ៣០វិនាទី ប៉ុណ្ណោះ យន្តហោះ AirAsia បានហោះឡើង ពីកំពស់ ៩៧០០ម៉ែត្រ រហូតដល់ ១១៤០០ម៉ែត្រ។ ដែលតាមធម្មតា យន្តហោះដឹកអ្នកដំណើរ មិនត្រូវធ្វើការហោះហើរ លឿនខ្លាំងទៅលើ បែបនេះទេ។ ពោលគឺមានតែប្រភេទយន្តហោះចម្បាំង មួយចំនួនប៉ុណ្ណោះ ដែលអាចធ្វើបែបនេះ បាន។
នៅថ្ងៃព្រហស្បតិ៍នេះដែរ អាជ្ញាធរឥណ្ឌូណេស៊ី បានបញ្ជាក់ថា ក្នុងពេលដែលយន្តហោះជួបគ្រោះថ្នាក់ យន្តហោះនេះ ស្ថិតក្រោមការបញ្ជាដោយផ្ទាល់ ពីអាកាសយានិក ជនជាតិបារាំង ដែលក្រុមហ៊ុន AirAsia ទើបតែរើសចូលធ្វើការ ចំណែកអាកាសយានិកម្នាក់ទៀត ជាជនជាតិ ឥណ្ឌូណេស៊ី ជាអ្នកចាំត្រូតពិនិត្យការហោះហើរ ហើយជាអាកាសយានិក ធ្លាប់មានបទពិសោធន៍យូរឆ្នាំមកហើយ ក្នុងជួរកងទ័ពអាកាស ។
អាជ្ញាធរឥណ្ឌូណេស៊ី បានប្រាប់ឲ្យដឹងផងដែរថា របាយការណ៍នៃការស្រាវជ្រាវជាស្ថាពរ នឹងត្រូវចេញផ្សាយក្នុងរយៈពេល ពី៧ ទៅ ៨ខែទៀត។ ក្នុងខណៈពេលនេះ ការស្រង់យកសាកសពចេញពីសមុទ្រ ត្រូវបានបញ្ឈប់ហើយ។ ក្នុងចំណោមសាកសពទាំង ១៦២ មានតែសាកសពចំនួន ៧២នាក់ប៉ុណ្ណោះ ដែលត្រូវបានស្រង់ឡើងមកលើគោក។ ចំនែក ឯការស្រង់យកតួខ្លួនយន្តហោះ ក៏បានជូបបរាជ័យ ជាច្រើនលើក ដោយសារបញ្ហាអាកាសធាតុ និងគ្មានសម្ភារៈគ្រប់គ្រាន់ ដើម្បីស្ទូចយកវា ឡើងពីបាតសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ