លោកលី ខឺជំាង៖កំណើនសេដ្ឋកិច្ចចិនសម្រាប់ឆ្នំា ២០១៥ មានត្រឹម ៧%
នៅថ្ងៃព្រហស្បតិ៍ ទី៥ មីនានេះ សភាចិនបានបើកសម័យប្រជុំវិសាមញ្ញប្រចំាឆ្នំាដោយមានការចូលរួមពីគណៈប្រតិភូប្រមាណជា ៣ ០០០នាក់។ គឺជាឱកាសដែលបានអនុញ្ញាតឲ្យរដ្ឋាភិបាលធ្វើការបូកសរុបលទ្ធផលដែលសម្រេចបានក្នុងឆ្នំាកន្លងមក និងការកំណត់ទិសដៅសម្រាប់ឆ្នំា ២០១៥ នេះ។ នៅក្នុងសុន្ទរកថានាពេលបើកសម័យប្រជុំ លោកនាយករដ្ឋមន្រ្តីចិនលី ខឺជំាងបានលើកយកសំណុំរឿងជាច្រើនទៅនិយាយ មានតំាងពីវិស័យសេដ្ឋកិច្ច វិស័យការពារ វិស័យបរិស្ថាន ឬមួយក៏យុទ្ធនាការប្រយុទ្ធប្រឆំាងនឹងអំពើពុករលួយជាដើម។ វិស័យសេដ្ឋកិច្ចត្រូវបានលោកលី ខឺជំាងប្រកាសជាចំហថា កំណើនសេដ្ឋកិច្ចចិនសម្រាប់ឆ្នំា ២០១៥ អាចមានត្រឹម ៧%។
ចុះផ្សាយនៅថ្ងៃ៖
ស្តាប់ - ០៥:៤៣
ការដែលលោកនាយករដ្ឋមន្រ្តីចិនលី ខឺជំាងបានប្រកាសទម្លាក់ការព្យាករកំណើនសេដ្ឋកិច្ចចិនសម្រាប់ឆ្នំា ២០១៥ មកនៅត្រឹម ៧% ពេលនេះក៏ជាការព្យាកររបស់ក្រុមអ្នកវិភាគនាពេលកន្លងទៅដែរ។ នៅក្នុងកាលៈទេសៈបច្ចុប្បន្ន ចិនប្រហែលជាពិបាកនឹងរកបានជាថ្មីនូវអត្រាកំណើនសេដ្ឋកិច្ចចំនួន ២ខ្ទង់ដែលខ្លួនធ្លាប់បានទទួលរយៈពេល ៣ទសវត្សរ៍ជាប់ៗគ្នានាពេលកន្លងមក។ ជាក់ស្តែងក្នុងឆ្នំា ២០១៤ ចិនទទួលបានកំណើនសេដ្ឋកិច្ចតែ ៧,៤% ប៉ុណ្ណោះ ពោលគឺតិចជាងការព្យាករដែលមាន ៧,៥%។ អត្រាកំណើនសេដ្ឋកិច្ច ៧,៤% គឺជាអត្រាដ៏ទាបដែលចិនមិនធ្លាប់ស្គាល់ទេក្នុងរយៈពេលជិត ២៥ឆ្នំាចុងក្រោយនេះ។ សម្រាប់ឆ្នំា ២០១៥ នេះ លោកលី ខឺជំាងបានព្យាករទុកថា អាចមានត្រឹមតែ ៧% ប៉ុណ្ណោះ។ សម្រាប់លោកលី ខឺជំាង កំណើនសេដ្ឋកិច្ចថយចុះដោយសារតែកត្តាខាងក្រៅ និងខាងក្នុង។
នៅខាងក្រៅ សេដ្ឋកិច្ចពិភពលោកបានស្គាល់កំណើនតិចតួចស្តួចស្តើង និងពោរពេញដោយឧបសគ្គ ហើយមានប្រទេសមហាអំណាចសេដ្ឋកិច្ចខ្លះក៏កំពុងជួបវិបត្តិយ៉ាងត្រដាបត្រដួស។ នៅផ្ទៃក្នុង ចិនបាន និងកំពុងបន្តជួបការលំបាក និងប្រឈមមុខនឹងបញ្ហាជាច្រើន។ ជាក់ស្តែង គឺសកម្មភាពសេដ្ឋកិច្ចបាន និងកំពុងបន្តធ្លាក់ចុះជាលំដាប់។ អ្វីដែលលោកលី ខឺជំាងចង់បញ្ជាក់នោះគឺថា ចិនទទួលបានកំណើនសេដ្ឋកិច្ចតិច ឬច្រើន គឺវាអាស្រ័យលើបរិបទសេដ្ឋកិច្ចពិភពលោក និងសកម្មភាពសេដ្ឋកិច្ចក្នុងស្រុក។ គួរជម្រាបជូនថា សន្ទុះកំណើនសេដ្ឋកិច្ចចិនបានពឹងផ្អែកលើវិស័យសំខាន់ពីរជាប្រពៃណី គឺវិស័យអចលនទ្រព្យ និងវិស័យនំាចេញ។ តែបើគិតក្នុងរយៈពេល ១ឆ្នំាកន្លងទៅ វិស័យនំាចេញបានធ្លាក់ចុះ ៣,២% រីឯទីផ្សារអចលនទ្រព្យក៏កំពុងទ្រឹងមួយកន្លែងដែរ។ ទន្ទឹមគ្នានេះ វិនិយោគបរទេស និងពាណិជ្ជកម្មក្រៅប្រទេសក៏បានធ្លាក់ចុះ។
បង្វែរពីការពឹងពាក់អ្នកដទៃមកពឹងពាក់លើខ្លួនឯង
អ្វីដែលរដ្ឋាភិបាលទីក្រុងប៉េកំាងកំពុងចង់បានពេលនេះ គឺមិនមែនមហិច្ឆតាអត្រាកំណើនសេដ្ឋកិច្ចចំនួន ២ខ្ទង់ដែលខ្លួនធ្លាប់ទទួលបានកន្លងមកទេ តែជាកំណើនសេដ្ឋកិច្ចសមរម្យមួយដែលមិនផុយស្រួយ នៅឋេរ និងយូរអង្វែង។ ក្នុងន័យនេះ រដ្ឋាភិបាលបានផ្តើមបង្វែរបន្តិចម្តងៗ ពីសេដ្ឋកិច្ចពឹងលើបំពង់ដង្ហើមអ្នកដទៃមកជាសេដ្ឋកិច្ចពឹងលើបំពង់ដង្ហើមខ្លួនឯងវិញម្តង មានន័យថា កាត់បន្ថយពីសេដ្ឋកិច្ចពឹងលើការនំាចេញទៅបង្កើនតម្រូវការទីផ្សារក្នុងស្រុក តាមរយៈបង្កើនការចំណាយរបស់ប្រជាពលរដ្ឋចិន។
ទីក្រុងប៉េកំាងចង់បានគំរូសេដ្ឋកិច្ចមួយដែលប្តូរពីការអភិវឌ្ឍន៍វិស័យផលិតកម្មសម្រាប់ការនាំចេញទៅបង្កើនការអភិវឌ្ឍន៍វិស័យសេវាកម្ម និងផលិតកម្មសម្រាប់បំពេញតម្រូវការទីផ្សារក្នុងស្រុក។ យោងតាមលោកលី ខឺជំាង នយោបាយសេដ្ឋកិច្ចពឹងលើខ្លួនឯងនេះបានអនុញ្ញាតឲ្យមានបង្កើតការងារជាង ១៣លានការងារនៅតាមជនបទក្នុងឆ្នំា ២០១៤ និងថា អាចនឹងបង្កើតបានជាង ១០លានការងារទៀតក្នុងឆ្នំា ២០១៥។ កម្មវត្ថុរបស់រដ្ឋាភិបាល គឺកំណត់អត្រាអ្នកអត់ការងារធ្វើត្រឹម ៤,៥%។ ទន្ទឹមគ្នានេះ លោកលី ខឺជំាងក៏បានប្រកាសពីបំណងចង់ពង្រឹង និងធ្វើកំណែទម្រង់លើវិស័យរដ្ឋមួយចំនួនដើម្បីកាត់បន្ថយការចំណាយរបស់រដ្ឋ។ ដោយឡែក កត្តាសំខាន់ថ្មីមួយដែលត្រូវបានលោកលី ខឺជំាងចាត់ទុកជាសសរថ្មីសម្រាប់សេដ្ឋកិច្ចថ្មីពេលនេះ គឺបង្កើនការអភិវឌ្ឍន៍ថាលពលស្អាត ដោយរាប់បញ្ចូលពីការចូលរួមកាត់បន្ថយឧស្ម័នផ្ទះកញ្ជក់។
បន្ថយការដំឡើងថវិកាយោធា តែពង្រឹងយុទ្ធនាការប្រឆំាងអំពើពុករលួយ
សម្រាប់ថវិកាយោធាក្នុងឆ្នំា ២០១៥ ត្រូវបានរដ្ឋាភិបាលដំឡើងតែ ១០,១% ប៉ុណ្ណោះ ពោលមានទឹកប្រាក់សរុបជាង ១៤ម៉ឺនលានដុល្លារ។ កាលពីឆ្នំា ២០១៤ រដ្ឋាភិបាលបានដំឡើងដល់ទៅ ១២,២%។ តែក្រុមអ្នកវិភាគបានមើលឃើញថា តួលេខនេះអាចនឹងមានច្រើនជាងនេះ។ គួរបញ្ជាក់ថា ចិនបានក្លាយជាប្រទេសទី២ ក្នុងលោកបន្ទាប់ពីអាមេរិកដែលបានចំណាយច្រើននៅក្នុងវិស័យយោធា។ ទាក់ទងនឹងយុទ្ធនាការប្រយុទ្ធប្រឆំាងនឹងអំពើពុករលួយ លោកលី ខឺជំាងបានបញ្ជាក់ពីការបន្តជម្រុះជនពុករលួយនៅគ្រប់ជាន់ថ្នាក់ និងគ្រប់លំដាប់ថ្នាក់ ដូចដែលលោកប្រធានាធិបតីស៊ី ជីនពីងធ្លាប់បានប្រកាសថា នឹងកំចាត់តំាងពីសត្វមូស ដល់សត្វខ្លា។ សម្រាប់លោកស៊ី ជីនពីង អំពើពុករលួយជាសភាវៈអាក្រក់ដែលគំរាមអនាគតគណបក្សទោល និងរបបកុម្មុយនិស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ