បង់ក្លាដែស៖រដ្ឋាភិបាលពង្រឹងកម្លំាងសន្តិសុខ បន្ទាប់ពីបានព្យួរ ក មេចលនាអ៊ីស្លាមម្នាក់
តំាងពីថ្ងៃអាទិត្យមកដល់ថ្ងៃចន្ទ ទី១៣ មេសានេះ រដ្ឋាភិបាលនៃប្រទេសបង់ក្លាដែសបានពង្រឹងសន្តិសុខនៅក្នុងទីក្រុងដាកា និងតាមទីក្រុងធំៗមួយមួយចំនួនទៀតនៅទូទំាងប្រទេសដោយបានដាក់ពង្រាយកម្លំាងប៉ូលិសជាច្រើនរយនាក់។ វិធានការពង្រឹងសន្តិសុខនបានធ្វើឡើង បន្ទាប់ពីមានការប្រហារជីវិតប្រមុខចលនាអ៊ីស្លាមម្នាក់ទៀតដោយព្យួរ ក ឈ្មោះម៉ូហាម៉ាត កាម៉ារុយហ្សាមែន។ ជនកាម៉ារុយហ្សាមែនដែលជាប់ចោទពីបានសម្លាប់មនុស្សយ៉ាងរង្គាលនៅក្នុងសម័យទាមទារឯករាជ្យនាទសវត្សឆ្នំា ៧១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
គោលដៅនៃការដាក់ពង្រាយកម្លំាងប៉ូលីសត្រូវបានអ្នកនំាពាក្យប៉ូលីសពន្យល់បកស្រាយថា គឺដើម្បីប្រឈមទប់នឹងការប៉ុនប៉ងបង្កអានាធិបតេយ្យ ឬអំពើហិង្សាគ្រប់រូបភាពកើតចេញពីការប្រមូលផ្តុំរបស់ក្រុមសកម្មជននៃចលនាអ៊ីស្លាម Jamaat-e-Islami ដែលមេកើយម្នាក់ទៀតរបស់គេឈ្មោះម៉ូហាម៉ាត កាម៉ារុយហ្សាមែនទើបត្រូវបានប្រហារជីវិតចោលដោយព្យួរ ក។ សូមរម្លឹកជូនថា មានអាយុ ៦២ឆ្នំា ជនម៉ូហាម៉ាត កាម៉ារុយហ្សាមែនត្រូវបានតុលាការអន្តរជាតិស្តីពីឧក្រិដ្ឋកម្មសង្រ្គាមនៅបង់ក្លាដែសកាត់ទោសប្រហារជីវិតក្នុងខែឧសភា ឆ្នំា ២០១៣ ពីបទសម្លាប់រង្គាល ធ្វើទារុណកម្ម និងការចាប់ជម្រិតមនុស្សនៅក្នុងសម័យសង្រ្គាមទាមទារឯករាជ្យកាលពីឆ្នំា ១៩៧១។ គួរបញ្ជាក់ថា តុលាការអន្តរជាតិស្តីពីឧក្រិដ្ឋកម្មសង្រ្គាមនៅបង់ក្លាដែស គឺជាតុលាការដែលបានបង្កើតឡើង និងដាក់ឈ្មោះដោយរដ្ឋាភិបាលបង់ក្លាដែសខ្លួនឯងកាលពីឆ្នំា ២០១០។
បច្ចុប្បន្ន ចលនាអ៊ីស្លាម Jamaat-e-Islami គឺជាកម្លំាងនយោបាយអ៊ីស្លាមដ៏ធំ និងជាសម្ព័ន្ធមិត្តរបស់គណបក្សប្រឆំាង គឺគណបក្សជាតិនិយមបង់ក្លាដែស។ គណបក្សអ៊ីស្លាម Jamaat-e Islami និងគណបក្សជាតិនិយមបង់ក្លាដែសកំពុងព្យាយាមរិះរកមធ្យោបាយគ្រប់បែបយ៉ាងដើម្បីទម្លាក់រដ្ឋាភិបាលរបស់លោកស្រីនាយករដ្ឋមន្រ្តីឆេក ហាស៊ីណា។ ចលនាអ៊ីស្លាម Jamaat-e-Islami តែងតែបានចោទរដ្ឋាភិបាលពីបទយកតុលាការដែលខ្លួនបានបង្កើតធ្វើជាឧបករណ៍ដើម្បីបំបិទមាត់ក្រុមប្រឆំាង។ សូមជម្រាបជូនថា ជនម៉ូហាម៉ាត កាម៉ារុយហ្សាមែន ជាមេកើយស្ថិតលំដាប់ទី៣ នៃចលនា Jamaat-e-Islami និងជាមនុស្សទី២ ដែលត្រូវបានរដ្ឋអំណាចប្រហារជីវិតចោល។ កាលពីខែធ្នូ ឆ្នំា ២០១៣ រដ្ឋអំណាចបានប្រហារជីវិតជនអាប់ឌុល កាដឺ ម៉ូឡាដែលជាមេកើយស្ថិតលំដាប់ទី៤ របស់ចលនា Jamaat-e-Islami ពីបទចោទប្រកាន់ដូចគ្នា។
បន្ទាប់ពីបានធ្វើការបន់ស្រន់ពេញមួយថ្ងៃអាទិត្យមក ចលនា Jamaat-e-Islami បានអំពាវនាវឲ្យមានបាតុកម្មទូទៅមួយនៅថ្ងៃចន្ទ ទី១៣ មេសានេះ។ កន្លងមក អង្គការសហប្រជាជាតិ សហភាពអឺរ៉ុប និងក្រុមអង្គការការពារសិទ្ធិមនុស្សបានអំពាវនាវឲ្យរដ្ឋាភិបាលបង់ក្លាដែសបញ្ឈប់ប្រើនីតិវិធីប្រហារជិវិត ព្រមទំាងចាត់ទុកដំណើរការកាត់ទោសថា មិនស្របតាមលក្ខណៈអន្តរជាតិទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ