តុលាការចិនទទួលស្គាល់ថា អ្នកស្រលាញ់ភេទដូចគ្នាមិនមែនមានជំងឺវិកលចរិកទេ
ជាលើកទីមួយហើយ ដែលតុលាការចិន បានធ្វើការផ្តន្ទាទោសមន្ទីរពេទ្យឯកជនមួយ ដែលបានព្យាយាមព្យាបាលអ្នកជំងឺម្នាក់ ជាអ្នកស្រលាញ់ភេទដូចគ្នា ដោយយកខ្សែភ្លើងឆក់ ដើម្បីធ្វើឲ្យអ្នកជំងឺនោះ ឈប់ស្រលាញ់អ្នកភេទដូចគ្នា តទៅទៀត។ នេះជាជោគជ័យមួយ សម្រាប់ក្រុមអ្នកស្រលាញ់ភេទដូចគ្នា នៅចិន ដែលជារឿយៗតែងតែរងការរើសអើង និងការកៀបសង្កត់ពីអាជ្ញាធរចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
យុវជនជនជាតិចិនម្នាក់ ឈ្មោះ យ៉ាង តេង ដែលជាអ្នកស្រលាញ់ភេទដូចគ្នា ត្រូវបានក្រុមគ្រូសារជំរុញ ឲ្យទៅព្យាបាលនៅមន្ទីរពេទ្យវិកលចរិក ឈ្មោះ Xinyu Piaoxiang ស្ថិតក្នុងខេត្ត ឆុងឈីង ដើម្បីធ្វើឲ្យយុវជននេះ លែងឆ្គួតទៅស្រលាញ់មនុស្សភេទដូចគ្នាតទៅទៀត។ ក្នុងកំឡុងពេលព្យាបាល យុវជនរូបនោះ ត្រូវបានក្រុមគ្រូពេទ្យនៅមន្ទីពេទ្យនោះ យកទៅឆក់ខ្សែភ្លើង ជាច្រើនលើកច្រើនសា។
បន្ទាប់ពីបានចេញពីមន្ទីរពេទ្យ យុវជនរងគ្រោះ បានដាក់ពាក្យបណ្តឹង ទៅតុលាការក្រុងប៉េកាំង ដោយចោទពីការប្រើទារុណកម្មអមនុស្សធម៌ របស់មន្ទីរពេទ្យ។ តុលាការក្រុងប៉េកាំង បានសម្រេចផ្តន្ទាទោស មន្ទីរពេទ្យ ឲ្យសងជម្ងឺចិត្តទៅជនរងគ្រោះ ចំនួន ៣៥០០យាន់ ព្រមទាំងតម្រូវឲ្យមន្ទីរពេទ្យ ធ្វើការសុំទោសជាសាធារណៈទៀត។
នេះគឺជាជោគជ័យ ធំណាស់សម្រាប់យុវជនរងគ្រោះ ក៏ដូចជាប្រជាជនដែលស្រលាញ់ភេទដូចគ្នាទាំងអស់ នៅចិន។ នៅក្នុងសាលដីកា តុលាការបានបញ្ជាក់ថា ការស្រលាញ់ភេទដូចគ្នា មិនមែនជាជម្ងឺនោះទេ។ ដូច្នេះគេមិនអាចយកអ្នកស្រលាញ់ភេទដូចគ្នា ទៅព្យាបាល តាមក្បួនពេទ្យ រឺក៏ឆក់ខ្សែភ្លើងបានឡើយ។ ថ្លែងទាំងត្រេកអរ យុវជន យ៉ាង តេង បាននិយាយថា ខ្លួននឹងយកសាលដីការបស់តុលាការ ទៅឲ្យម្តាយខ្លួនមើលឲ្យច្បាស់នឹងភ្នែក ថាសូម្បីតែតុលាការក៏បានទទួលស្គាល់ដែរថា អ្នកស្រលាញ់ភេទដូចគ្នា មិនមែនជាមនុស្សមានបញ្ហាផ្លូវចិត្ត ដូចដែលគេឯងគិតនោះទេ។ យុវជននេះបន្ថែមថា ខ្លួននឹងខិតខំតស៊ូមតិ ទាមទារឲ្យមានការគោរពសិទ្ធិអ្នកស្រលាញ់ភេទដូចគ្នា ឲ្យបានទូលំទូលាយ ជាងនេះទៀត។
តាមការពិតទៅ រដ្ឋាភិបាលចិនប៉េកាំង បានលប់ ការស្រលាញ់ភេទដូចគ្នា ចេញពីបញ្ជីរជម្ងឺវិកលចរិក តាំងពីឆ្នាំ២០០១ម្លេះ។ ប៉ុន្តែទោះបីជាយ៉ាងណា សង្គមចិននៅតែមានការរើសអើងជានិច្ច ជាពិសេស ពីសំណាក់ក្រុមគ្រួសារ ឪពុកម្តាយ ដែលតែងតែបង្ខិតបង្ខំកូនៗពួកគេ ឲ្យទៅព្យាបាលនៅតាមមន្ទីរពេទ្យវិកលចរិក។ រហូតមកដល់ពេលនេះ អាជ្ញាធរចិន នៅតែមិនទាន់ទទួលស្គាល់ ឲ្យមានការបើកអង្គការ រឺ សមាគមន៍ការពារសិទ្ធិរបស់ក្រុមអ្នកស្រលាញ់ភេទដូចគ្នាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ