ចិនមិនចង់ឃើញក្រិកដើរចេញពី តំបន់ចាយប្រាក់អឺរ៉ូ
កិ្រកស្ថិតនៅក្នុងតំបន់ចាយប្រាក់អឺរ៉ូ មិនមែនជាបញ្ហាចោទ សម្រាប់សហភាពអឺរ៉ុប ប៉ុន្តែ វាជាកង្វល់របស់ប្រទេសចិនផងដែរ។ នេះជាការអះអាងរបស់លោកនាយករដ្ឋមន្រ្តីចិន លី ខឺឈាំង នៅក្នុងអំឡុងទស្សនកិច្ចរបស់លោកទៅទឹកដីអឺរ៉ុប នៅដើមសប្តាហ៍នេះ។ យ៉ាងណា ប្រមុខរដ្ឋាភិបាលចិនបដិសេធ មិនទាន់បញ្ជាក់ថា តើចិននឹងលូកដៃជួយក្រិកដែលកំពុងលង់ ក្នុងវិបត្តិប្រាក់បំណុលដែរ ឬយ៉ាងណានោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ទោះឆ្ងាយគ្នារាប់ម៉ឺនគីឡូម៉ែត្រ ទីក្រុងប៉េកាំងតាមដាន ជាប់ជានិច្ចវិបត្តិប្រាក់បំណុលនៅប្រទេសក្រិក។ ក្រិកដែលត្រូវរៀបចំការបោះឆ្នោតប្រជាមតិ នៅថ្ងៃអាទិត្យ ទី ៥កក្កដា។ លទ្ធផលឆ្នោតដែលនឹងអាចផ្តល់ពន្លឺឲ្យគេដឹងថា តើក្រិកនឹងដើរចេញ ឬស្ថិតនៅបន្តក្នុងតំបន់ចាយប្រាក់អឺរ៉ូ។ ទីក្រុងប៉េកាំងវិញ ចង់ណាស់ ចង់ឲ្យក្រិកបន្តស្ថិតនៅក្នុងតំបន់ចាយប្រាក់អឺរ៉ូ នោះក៏ព្រោះថា ដើម្បីពង្រឹងឥទ្ធិពលសេដ្ឋកិច្ចរបស់ខ្លួន ទៅក្នុងអឺរ៉ុប ទ្វីបចាស់ ចិនត្រូវការ ជាចាំបាច់ ក្រិក។
សម្រាប់ចិន ក្រិកជាកូនសោរដ៏សំខាន់ ដែលនឹងជួយឲ្យចិន សម្រេចក្តីស្រមៃ បង្កើតផ្លូវសូត្រតាមសមុទ្រ ដើម្បីនាំទំនិញពីចិន ទៅកាន់ទឹកដីអឺរ៉ុប។ ចិនសង្ឃឹមនឹងប្រើផ្លូវសូត្រតាមសមុទ្រដើម្បីដឹកនាំចេញទំនិញចេញពីទីក្រុងសៀងហៃ សំដៅ កំពង់ផែក្រិក ដែលចិនបានដាក់ទុនវិនិយោគ តម្លៃ៤ពាន់លានអឺរ៉ូ។
ថ្មីៗនេះ កាសែតចិន បានស្រែកបរិហារថា ជាការក្បត់ បន្ទាប់ពីរដ្ឋាភិបាលក្រិកថ្មី របស់លោកអាឡិចស៊ីស ស៊ីប្រាស មកពីក្រុមឆ្វេងនិយមជ្រុល បានប្រកាសផ្អាកទៅវិញ លែងលក់ភាគហ៊ុន ៦៧ភាគរយដែលរដ្ឋក្រិកមាននៅក្នុងក្រុមហ៊ុនកំពង់ផែក្រិក។
ក្រិកជាច្រកទ្វារចូលទៅកាន់អឺរ៉ុប។ នេះជាការវាយតម្លៃរបស់នាយករដ្ឋមន្រ្តីចិន លោកលី ខឺឈាំងដែលបានអះអាងបន្ថែមថា ចិន ចង់ដើរតួសំខាន់ ដើម្បីជួយក្រិកដែលជាដៃគូយុទ្ធសាស្រ្តរបស់ចិន កុំឲ្យដើរចេញពីតំបន់ចាយប្រាក់អឺរ៉ូ។
កាសែតផ្លូវការរបស់ចិន China Dailyវិញបានដាក់ចំណងជើងធំៗ នៅទំព័រមុខរបស់ខ្លួនថា ចិនប្រឆាំងនឹងការដើរចេញរបស់ក្រិកពីតំបន់ចាយប្រាក់អឺរ៉ូ។ ក្រិកដើរចេញពីតំបន់អឺរ៉ូ នឹងធ្វើឲ្យក្រុមហ៊ុនវិនិយោគរបស់ចិនគ្រោះថ្នាក់។ ត្រូវដឹងថា នៅឆ្នាំ ២០១៤ ការដោះដូរពាណិជ្ជកម្មរវាងចិន និងក្រិក បានឡើង ដល់៤,៥ពាន់លានអឺរ៉ូ គឺកើនឡើង ដល់ទៅ ២៤ភាគរយ បើប្រៀបធៀបនឹងឆ្នាំមុន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ