ចិន-ស៊ីរី៖ប៉េកាំងបានតែងតាំងប្រេសិតពិសេសម្នាក់សម្រាប់ប្រទេសស៊ីរី
នៅថ្ងៃអង្គារ ទី២៩ មីនា ប្រទេសចិនបានប្រកាសឲ្យដឹងពីការតែងតាំងប្រេសិតពិសេសម្នាក់របស់ខ្លួនសម្រាប់ចូលរួមស្វែងរកដំណោះស្រាយឲ្យវិបត្តិស៊ីរី។ តាំងពីស៊ីរីបានធ្លាក់ក្នុងជម្លោះផ្ទៃក្នុងជាង ៥ឆ្នាំមក នេះជាលើកទី១ បង្អស់ដែលទីក្រុងប៉េកាំងបានតែងតាំងឲ្យមានអ្នកតំណាងពិសេសម្នាក់សម្រាប់ស៊ីរី។ គំនិតផ្តួចផ្តើមរបស់ចិនពេលនេះត្រូវបានគេមើលឃើញថា ជាការពង្រីកបន្ថែមឥទ្ធិពលនយោបាយនៅតំបន់មួយដែលចិនសម្លឹងឃើញតែប្រយោជន៍សេដ្ឋកិច្ច។
ចុះផ្សាយនៅថ្ងៃ៖
ស្តាប់ - ០២:០៨
រហូតមកដល់បច្ចុប្បន្ន ចិនមិនសូវអើពើ និងសុខចិត្តបិទមាត់ ធ្វើ គ ធ្វើថ្លង់ចំពោះព្រឹត្តិការណ៍ដែលបានកើតមាននៅតំបន់មជ្ឈិមបូព៌ា។ មិនថាជម្លោះរវាងអ៊ីស្រាអែល និងប៉ាឡេស្ទីន ឬមួយក៏វិបត្តិក្នុងប្រទេសស៊ីរី ប៉េកាំងសុខចិត្តឈរនៅកណ្តាលជាជាងងាកទៅកាន់ជើងខាងណេះ ឬខាងណោះ។ ទង្វើរបស់ចិនរបៀបនេះមកពីចិនមិនចង់ឲ្យខូចប្រយោជន៍របស់ខ្លួននៅក្នុងតំបន់ ពិសេសប្រយោជន៍សេដ្ឋកិច្ចដែលចិនត្រូវការប្រេងដើម្បីយកទៅចិញ្ចឹមបំប៉នកំណើនសេដ្ឋកិច្ចរបស់ខ្លួន។
តែចាប់ពីពេលនេះទៅ ចិនបានផ្តើមលូកដៃកាន់តែជ្រៅក្នុងផ្លូវនយោបាយដើម្បីចូលរួមដោះស្រាយវិបត្តិមួយចំនួននៅក្នុងតំបន់ ពិសេសវិបត្តិស៊ីរីសព្វថ្ងៃ។ គឺនៅក្នុងន័យនេះហើយបានជាចិនទើបតែងតាំងលោកស៊ី សាវយ៉ាន អតីតឯកអគ្គរដ្ឋទូតចិនប្រចាំប្រទេសអ៊ីរ៉ង់ ប្រចាំប្រទេសអេត្យូពី និងប្រចាំសហភាពអាហ្វ្រិកឲ្យធ្វើជាតំណាងពិសេសរបស់ខ្លួនសម្រាប់ប្រទេសស៊ីរី។ កម្មវត្ថុនៃការតែងតាំងឲ្យមានប្រេសិតពិសេសម្នាក់របស់ខ្លួន គឺដើម្បីចូលរួមនៅក្នុងកិច្ចចរចាស្វែងរកសន្តិភាព ក៏ដូចជាការដាក់ចេញនូវដំណោះស្រាយរបស់ចិនសម្រាប់ស៊ីរី។
កន្លងមក និងក្នុងនាមជាប្រទេសសមាជិកអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ ចិនតែងតែទាមទារឲ្យមានដំណោះស្រាយតាមផ្លូវនយោបាយនៅស៊ីរី និងបានប្រើសិទ្ធិវេតូប្រឆាំងរាល់សេចក្តីសម្រេចចិត្តដែលដាក់ទ័ណ្ឌកម្មលើរដ្ឋាភិបាលស៊ីរីរបស់លោកប្រធានាធិបតីអាសាដ។ អ្វីជាការកត់សម្គាល់ ការដែលចិនបានតែងតាំងឲ្យមានអ្នកតំណាងពិសេសម្នាក់របស់ខ្លួនសម្រាប់ស៊ីរីបានធ្វើឡើងចំពេលល្អណាស់ ពោលចំពេលដែលកិច្ចចរចាសន្តិភាពឲ្យស៊ីរីកំពុងបន្តធ្វើនៅក្នុងទីក្រុងហ្សឺណែវ ប្រទេសស្វ៊ីស។
ចំពេលល្អ ព្រោះបើកិច្ចចរចានៅប្រទេសស្វ៊ីសទទួលបានផ្លែផ្កាដូចដែលគ្រប់គ្នាចង់បាននោះ ចិនក៏មានចំណែកនៅក្នុងនោះដែរ នោះបើទោះបីជាចិនទើបនឹងចូលប្រឡូកខ្លាំងនាពេលនេះក៏ដោយ។ ក៏ប៉ុន្តែ ការលូកដៃជ្រៅរបស់ចិនក៏អាចធ្វើឲ្យចិនទទួលផលអាក្រក់ដែរ។ នៅក្នុងខែវិច្ឆិកា ឆ្នាំ ២០១៥ ពួកជីហាតអង្គការរដ្ឋអ៊ីស្លាមបានប្រកាសពីការកាត់ ក ចំណាប់ខ្មាំងជនជាតិចិនម្នាក់ក្នុងទឹកដីស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ