ចិនបដិសេធថា មិនបាននៅពីក្រោយការវាយប្រហាររបស់ក្រុមឧទ្ទាមកូកាង
ឆាកប្រយុទ្ធបង្ហូរឈាម នៅតែបន្តមាន នៅប៉ែកខាងជើងប្រទេសភូមា ក្បែរទៅរកព្រំដែនចិន។ យោងតាមកាសែតរដ្ឋភូមា ចុះផ្សាយ កាលពីថ្ងៃសុក្រ ទាហានរបស់រដ្ឋាភិបាលបានបើកការប្រយុទ្ធខ្លាំងមួយ ដើម្បីបណ្តេញក្រុមឧទ្ទាមជនជាតិភាគតិច ចេញពីទីក្រុងឡូកៃ ជាទីមានផ្ទុះឡើងដំបូង ការប្រយុទ្ធគ្នារវាងទ័ពរដ្ឋាភិបាល និងពួកឧទ្ទាមកូកាង។ កាលពីថ្ងៃព្រហស្បតិ៍ រដ្ឋាភិបាលភូមាបានអំពាវនាវសុំឲ្យប្រទេសចិន ជួយសហការ ទប់ស្កាត់ កុំឲ្យពួកភេរវនិយមប្រើទឹកដីចិន ដើម្បីវាយប្រហារទៅលើទ័ពភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ការប្រយុទ្ធគ្នា មានកាន់តែខ្លាំងឡើងៗ រវាងទ័ពរដ្ឋាភិបាលភូមា និងពួកឧទ្ទាម ជនជាតិភាគតិច។ កាលពីថ្ងៃសុក្រ រដ្ឋាភិបាលភូមាត្រូវបញ្ចេញ ប្រើយន្តហោះចម្បាំងដើម្បីអមទ័ពជើងគោក ប្រយុទ្ធទប់ទល់នឹងពួកឧទ្ទាមជនជាតិភាគតិច កូកាង ដែលរហូតមកដល់ពេលនេះ ទទួលបានការគាំទ្រ ចូលរួមប្រយុទ្ធកាន់តែច្រើនពី ពួកឧទ្ទាមជាតិភាគតិចផ្សេងទៀត ដូចជា ក្រុមTa’ang និងពួកឧទ្ទាមកាឈីនជាដើម។
ជម្លោះប្រដាប់អាវុធ ដែលកើតមាន១១ថ្ងៃមកហើយ បានជំរុញឲ្យរដ្ឋាភិបាលស៊ីវិលភូមាប្រកាសប្រើច្បាប់អាជ្ញាសឹក នៅភាគខាងជើងភូមា ក្បែរព្រំដែនជាមួយប្រទេសចិន។ នៅថ្ងៃសុក្រ ទីក្រុងលូកៃ សឹងក្លាយជាទីក្រុងខ្មោច បន្ទាប់ពី ប្រជាជនជនជាតិភាគតិច យ៉ាងហោច ៣ម៉ឺននាក់បានរត់គេចខ្លួន ជាបន្តបន្ទាប់ ពីការប្រយុទ្ធ ទៅជ្រកកោនក្នុងទឹកដីចិន។
ប្រទេសចិនដែលបារម្ភពីអសន្តិសុខក្នុងទឹកដីរបស់ខ្លួន ដោយសារការហូរចូលកាន់តែច្រើន ជនជាតិភាគតិច កូកាង បានអំពាវនាវឲ្យភាគីជម្លោះ ឈប់ប្រយុទ្ធគ្នា និងដោះស្រាយជម្លោះតាមផ្លូវសន្តិភាព។ នៅថ្ងៃព្រហស្បតិ៍ ទីក្រុងប៉េកាំងថែមទាំងបានចេញមុខបដិសេធថា ខ្លួនមិនស្ថិតនៅពីក្រោយក្រុមឧទ្ទាម ជនជាតិភាគតិចនោះទេ។ ចិនបដិសេធ បន្ទាប់ពីមេទ័ពភូមាម្នាក់បានចោទប្រកាន់ថា មានអ្នកមានអំណាចបរទេស ជួយគាំទ្រក្រុមឧទ្ទាមបះបោរ។ មន្រ្តីរដ្ឋាភិបាលភូមា ម្នាក់បានសរសេរនៅក្នុងទំព័រសង្គមហ្វេសប៊ុក នៅថ្ងៃព្រហស្បតិ៍ ស្វែងរកការសហការ ពីប្រទេសចិន ដើម្បីទប់ស្កាត់ក្រុមភេរវជនដែលមានប្រភពពីក្នុងទឹកដីចិន។
សូមរំលឹកជូនថា បន្ទាប់ពីស្ងប់ស្ងាត់អស់ជាង៦ឆ្នាំ ជម្លោះប្រដាប់អាវុធរវាងទ័ពរដ្ឋាភិបាលភូមា និងពួកឧទ្ទាមជនជាតិភាគតិចកូកាង បានចាប់កក្រើកឡើងឡើងវិញ បន្ទាប់ពីពួកឧទ្ទាមបាញ់សម្លាប់ទ័ពភូមា អស់៥០នាក់ កាលពីថ្ងៃទី ៩កុម្ភៈ។ មេក្រុមឧទ្ទាមកូកាង ឈ្មោះ ប៉េង ជាស្ហេងដែលបានរត់គេចខ្លួនទៅក្នុងប្រទេសចិន កាលពី៦ឆ្នាំមុន ជាអ្នកដឹកនាំការវាយប្រហារទៅលើទ័ពរដ្ឋាភិបាលភូមា ដែលខ្លួនចោទថា បានរើសអើងប្រកាន់ពូជសាសន៍ទៅលើជនជាតិកូកាង នៅភូមា។ កូកាង ជាជនជាតិភាគតិចភូមា ដែលមានអម្បូរពីជនជាតិហានរបស់ចិន។ តាមអ្នកវិភាគខ្លះ ជម្លោះថ្មីៗនេះមានទាក់ទងនឹងទំនាស់ផលប្រយោជន៍ រវាងក្រុមឧទ្ទាមកូកាង និងទាហានរដ្ឋាភិបាល ពីព្រោះគេដឹង ថា ជនជាតិភាគតិចដើមកំណើតចិន នៅប៉ែកខាងជើងភូមា ច្រើនតែមានជាប់ពាក់ព័ន្ធនឹងរបររកស៊ីជួញដូរគ្រឿងញៀន និងការដាំដំណាំអាភៀន។
លោកប្រធានាធិបតីភូមា ថេន សេនវិញធ្លាប់បានប្រកាសសន្យាមិនឲ្យបាត់បង់ទឹកដីមួយចំអាម ទៅឲ្យពួកឧទ្ទាមជនជាតិភាគតិចឡើយ។ ចង់ ឬមិនចង់ ការចាប់ប្រយុទ្ធគ្នាសាជាថ្មី បានបញ្ចេញឲ្យឃើញបណ្តើរៗ នូវបរាជ័យរបស់រដ្ឋាភិបាលភូមា ដែលចង់ស្វែងរកកិច្ចព្រមព្រៀងឈប់បាញ់ថ្នាក់ជាតិ មួយ ជាមួយគ្រប់ក្រុមឧទ្ទាមជនជាតិភាគតិច នៅទូទាំងប្រទេស។ ម្យ៉ាងទៀត ការចាប់ប្រយុទ្ធគ្នាឡើងវិញ ជាមួយពួកឧទ្ទាមនឹងអាចបង្កភាពស្មុគស្មាញដល់មេដឹកនាំភូមា ដែលត្រូវត្រៀមខ្លួន ចូលរួម ការរៀបចំបោះឆ្នោត សភា នៅចុងឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ