ព្យុងយ៉ាងចង្អុលមុខវ៉ាស៊ីនតោនថាជាអ្នកផ្តាច់អ៊ីនធ័រនែតកូរ៉េខាងជើង
នៅថ្ងៃសៅរ៍នេះ កូរ៉េខាងជើងបានចោទប្រកាន់ដោយចំៗ សហរដ្ឋអាមេរិក ថាជាដើមហេតុ បង្កឱ្យមានការគាំងអ៊ីនធ័រនែត រយៈពេលស្ទើរពេញមួយថ្ងៃ កាលពីដើមសប្តាហ៍។ មិនតែប៉ុណ្ណោះ ដូចជាទម្លាប់ របបព្យុងយ៉ាងបានប្រើពាក្យសម្តីអសុរស ចាត់ទុកប្រធានាធិបតីអាមេរិក បារ៉ាក់អូបាម៉ា ថាជា “ស្វា” ដែលបានលើកទឹកចិត្តក្រុមហ៊ុនសូនី ឱ្យចាក់បញ្ចាំងភាពយន្តរឿង “The Interview” ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
លោក បារ៉ាក់ អូបាម៉ា មិនចេះប្រយ័ត្នមាត់ ប្រយ័ត្នក និងកាយវិការ ដូចស្វា ក្នុងព្រៃត្រូពិចយ៉ាងដូច្នេះ ! នេះជាភាសារបស់គណៈកម្មការការពារជាតិកូរ៉េខាងជើង ដែលបានចេញសេចក្តីថ្លែងការណ៍ចោទប្រកាន់លោកប្រធានាធិបតីអាមេរិក ថាញុះញង់រោងភាពយន្តឱ្យព្រមចាក់បញ្ចាំងរឿង The Interview ចាប់ពីនៅថ្ងៃបុណ្យគ្រិស្មាក់ ទី ២៤ ធ្នូ ២០១៤។
ជាមួយនឹងពាក្យអសុរស របបព្យុងយ៉ាងបានព្រមានថានយោបាយស្អប់ខ្ពើមកូរ៉េខាងជើងពីរបស់អាមេរិក នឹងផ្តល់ផលវិបាកដល់ស្លាប់ ដោយចៀសមិនរួច។ សូមបញ្ជាក់ថា កាលពីមួយខែមុខ ក្រុមហ៊ុនភាពយន្តសូនីអាមេរិកបានរងការវាយប្រហារតាមអ៊ីនធ័រនែត ក្នុងទ្រង់ទ្រាយធំ ដែលបើតាមភ្នាក់ងារសម្ងាត់អាមេរិក គឺជាស្នាដៃរបស់កូរ៉េខាងជើង។ ការវាយប្រហារដែលជំរុញឱ្យក្រុមហ៊ុនដកខ្លួនឈប់បញ្ចាំងតាមរោង និងទើបតែប្តូរចិត្តចាក់បញ្ចាំងតាមសាលខ្លះ និងតាមប្រព័ន្ធអ៊ីនធ័រនែត ក្រោយមានប្រតិកម្មខ្លាំងៗ ទាំងពីរខាងពិភពភាពយន្តនិងពិភពនយោបាយ ជាក់ស្តែងគឺប្រតិកម្មរបស់លោកអូបាម៉ា។
អ្នកនាំពាក្យគណៈកម្មការការពារជាតិកូរ៉េខាងជើង មិនត្រឹមតែបដិសេធ ម្តងទៀតថាមិនបានដឹកនាំធ្វើចោរវាយប្រហារតាមអ៊ីនធ័រនែតប្រឆាំងនឹងក្រុមហ៊ុនសូនី ដូចការចោទប្រកាន់របស់FBIឡើយ តែថែមទាំងបានចង្អុលមុខសហរដ្ឋអាមេរិក ថាបានបញ្ចេញសកម្មភាពគួរឱ្យអៀនខ្មាស កាត់ផ្តាច់បណ្តាញអ៊ីនធ័រនែតកូរ៉េខាងជើង ឱ្យជាប់គាំងអស់ពេលជាង ៩ម៉ោង កាលពីថ្ងៃចន្ទ។
ការវាយប្រហារតាមអ៊ីនធ័រនែត បានក្លាយជាសង្គ្រាមសម្រាប់យុគសម័យថ្មី ហើយមិនដឹងថាជាការចៃដន្យយ៉ាងណា មួយថ្ងៃក្រោយចាក់បញ្ចាំងរឿង The interview ល្បែងហ្គេមតាមអ៊ីនធ័រនែត PlayStation (Sony) និង Xbox របស់ក្រុមហ៊ុនMicrosoft បានគាំង ដោយហេតុតែក្រុមហ៊ុន សូនី និងMicrossoft រងការវាយប្រហារ តាមអ៊ីនធ័រនែត។ ការវាយប្រហារ ដែលទំនងជាមានភាពយន្ត The Interview ផង ប៉ុន្តែពុំទាន់មានប្រភពព័ត៌មានផ្លូវការណាបញ្ជាក់អំពីចំណងនេះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ