កូរ៉េខាងជើង បោះទុនលើវិស័យព័ត៌មានវិទ្យា ដើម្បីបំពេញកង្វះខាតផ្នែកយោធា
ចុះផ្សាយនៅថ្ងៃ៖
ស្តាប់ - ០៥:០៨
ក្រុមហ៊ុនអាមេរិក មជ្ឈមណ្ឌលនុយក្លេអ៊ែរកូរ៉េខាងត្បូង រងការវាយប្រហារតាមអ៊ីនធ័រនែត ទិន្នន័យព័ត៌មានមួយចំនួនត្រូវបានចោរចូលលួចយកបាន ឬលុបបំបាត់ ! ភ្នាក់ងារអាមេរិកក៏ដូចជាកូរ៉េខាងត្បូង បានចង្អុលមុខភ្លាមថាជាស្នាដៃរបស់កូរ៉េខាងជើង និងគំរាមសងសឹកទៀត។ ឯកូរ៉េខាងជើងខ្លួនឯង កាលពីថ្ងៃចន្ទ ក៏បានជួបហេតុការណ៍ដ៏គួរឱ្យចាប់អារម្មណ៍ គឺប្រព័ន្ធអ៊ីនធ័រនែត បានកាត់ផ្តាច់អស់រយៈពេលជាច្រើនម៉ោង ដោយគ្មានមូលហេតុ និងដោយគ្មាននរណាធ្វើអត្ថាធិប្បាយអ្វីទាំងអស់។ តើកូរ៉េខាងជើងពិតមានសមត្ថភាពធ្វើការវាយប្រហារតាមអ៊ីនធ័រនែតមែនឬ ? ក្រៅអំពីខំអភិវឌ្ឍន៍កម្មវិធីនុយក្លេអ៊ែរ កូរ៉េខាងជើង កំពុងសាកល្បងរត់តាមពិភពលោកក្នុងវិស័យព័ត៌មានវិទ្យា ទៀតឬ យ៉ាងណា ?
ការប្រើប្រាស់ប្រព័ន្ធអ៊ីនធ័រនែត នៅកូរ៉េខាងជើង មានកំរិតបំផុត ! បណ្តាញទាំងបួនដែលព្យុងយ៉ាង សុទ្ធតែអូសមកពីប្រទេសចិនជិតខាង ក្នុងល្បឿនយឺតបំផុត។ ម្ចាស់ក្រុមហ៊ុនគ្រប់គ្រងប្រព័ន្ធព័ត៌មានវិទ្យាមានតែមួយគត់ រដ្ឋាភិបាលកុម្មុយនិស្ត ! បើតាមអ្នកឯកទេសសន្តិសុខព័ត៌មានវិទ្យាអាមេរិក ប្រព័ន្ធអ៊ីនធ័រនែតកូរ៉េខាងជើង ភ្ជាប់ទៅកាន់ប្រទេសផ្សេងទៀតនៅលើលោក មិនសូវទេ តែងតែគាំងជាញយៗ នៅរាល់ពេលចុងសប្តាហ៍ ប៉ុន្តែគ្មានទ្រង់ទ្រាយធំ និងយូរដូចការដាច់អ៊ីនធ័រនែតកាលពីថ្ងៃចន្ទកន្លងទៅថ្មីៗនេះទេ។
ទូទៅ ពលរដ្ឋកូរ៉េខាងជើង អាចប្រើប្រាស់ប្រព័ន្ធអ៊ីនធ័រនែតបាន តែជាប្រព័ន្ធផ្ទៃក្នុង គ្រប់គ្រងបានទាំងស្រុង ដោយអាជ្ញាធរ។ មានតែមន្ត្រីជាន់ខ្ពស់ សេវ៉ារដ្ឋ ភ្ញៀវបរទេស និងក្រុមចោរHackersផ្លូវការរបស់រដ្ឋាភិបាលព្យុងយ៉ាងទេ ដែលអាចប្រើអ៊ីនធ័រនែតបានស្ទើរដោយសេរីនោះ។ ប៉ុន្តែបណ្តាញអ៊ីនធ័រនែត ដែលផ្គត់ផ្គង់ដោយចិននេះ មានល្បឿនយឺតខ្លាំងណាស់ និងក្នុងបរិមាណតិចបំផុត។ ក្នុងចំណោមបណ្តាញនែតវឺករបស់ពិភពលោកទាំងមូល គេអាចរាប់ចំនួនអ្នកប្រើប្រាស់អ៊ីនធ័រនែតនៅកូរ៉េខាងជើងបាន ថាមានចំនួន IP ប្រមាណតែ១០២៤ ប៉ុណ្ណោះ។
ទាំងតិច ទាំងត្រូវពឹងចិនដើម្បីមានបណ្តាញអ៊ីនធ័រនែតប្រើ តែជារៀងរាល់លើក នៅពេលមានការវាយប្រហារព័ត៌មានវិទ្យា កូរ៉េខាងជើងតែងត្រូវបានគេចង្អុលមុខថានៅពីក្រោយសកម្មភាពចោរនោះ។ បើតាមការអង្កេតរបស់ភ្នាក់ងារ FBI អាមេរិក កូរ៉េខាងជើងមានលទ្ធភាពដឹកនាំការវាយប្រហារតាមអ៊ីនធ័រនែត ព្រោះមានក្រុម Hackers ទទួលការបំពាក់បំប៉នពិសេសសម្រាប់ធ្វើ ការងារប្រកបដោយប្រសិទ្ធិភាព។ ក្រុមនេះអាចបញ្ចូលកម្មវិធីក្នុងកុំព្យូទ័រលួចព័ត៌មាន ដោយ មិន ម្ចាស់ដឹង និងកម្មវិធីមួយទៀតសម្រាប់ ទៅលុបទិន្នន័យក្នុងកុំព្យូទ័រ ! នេះបើតាមការអង្កេត និងដែលក្រុមហ៊ុនសូនីអាមេរិកទើបបានរងគ្រោះកន្លងមក។
អ៊ីនធ័រនែតមិនជឿនលឿនខ្លាំងមែន តែបានធ្វើឱ្យក្រុមហ៊ុនសូនីអាមេរិកខូចខាតខ្លាំង និងចុះញ៉មមិនព្រមចាក់ផ្សាយភាពយន្តទៀត នេះពិតជាអាចបញ្ជាក់ថាក្រុមចោរព័ត៌មានវិទ្យាកូរ៉េខាងជើង មានបទពិសោធន៍ខ្ពស់ និងកំពុងធ្វើតេស្តសាកល្បងសមត្ថភាពអ៊ីនធ័រនែតរបស់ខ្លួនហើយ។ ការិយាល័យទី ១២១ ដឹកនាំដោយភ្នាក់ងារសម្ងាត់កូរ៉េខាងជើង គឺជាក្រុមការងារដែលមានភារៈរៀបចំធ្វើសង្គ្រាមព័ត៌មានវិទ្យា និងជាបណ្តុំអ្នកឯកទេសដែលមានសមត្ថភាពខ្ពស់បំផុតរបស់ប្រទេស។ ដូច្នេះការវាយប្រហារលើក្រុមហ៊ុនសូនី អាចជាលំហាត់របស់ក្រុមយោធាឯកទេស មួយក្រុមនេះ ដែលនៅថ្ងៃអនាគត កូរ៉េខាងជើងចង់សម្រេចរាងរាំង រំខានប្រព័ន្ធទូរគមនាគមន៍ និងអគ្គិសនីរបស់គូសត្រូវ ឱ្យជាប់គាំងនៅថ្ងៃណាមួយជាក់ជាពុំខាន។
បើតាមពលរដ្ឋកូរ៉េខាងជើង ដែលបានគេចខ្លួនរួចពីរបបកុម្មុយនិស្តព្យុងយ៉ាង កូរ៉េខាងជើងបានធ្វើវិនិយោគខ្លាំងក្នុងវិស័យព័ត៌មានវិទ្យានិងបច្ចេកវិទ្យានុយក្លេអ៊ែរ តាំងពីច្រើនឆ្នាំមកហើយ ដើម្បីរត់ឱ្យគេឯងនៅលើលោក។ ងុបងល់នឹងធ្វើសង្គ្រាមប្រឈមនឹងការលុកលុយរបស់កូរ៉េខាងត្បូងនិងសហរដ្ឋអាមេរិក កម្មវត្ថុចំបងរបស់ព្យុងយ៉ាង គឺបង្កើនសមត្ថភាពព័ត៌មានវិទ្យា ដើម្បី បំផ្លាញ ឬធ្វើគាំងស្តូកស្តឹងរចនាសម្ព័ន្ធបណ្តាញសាធារណៈសំខាន់ៗរបស់បច្ចាមិត្រ។
បច្ចាមិត្រដែលត្រូវប្រើវាយប្រហារតាមប្រព័ន្ធនែតវឺក គ្មាននរណាក្រៅពីសហរដ្ឋអាមេរិក និងកូរ៉េខាងត្បូងឡើយ ! ការវាយប្រហារក្រុមហ៊ុនអាមេរិកសូនី មានលក្ខណៈស្រដៀងនឹងទង្វើអតីតកាលដែលព្យុងយ៉ាងធ្លាប់ធ្វើរួចមកហើយ ៖ លួចបានឯកសាររាប់ពាន់ពីក្រុមហ៊ុនអាមេរិក ជាជោគជ័យមួយ។
កាលពីឆ្នាំ២០១៣ ប្រព័ន្ធធនាគារ និងទូរទស្សន៍ជាតិ កូរ៉េខាងត្បូង បានគាំងអស់រយៈពេលជាច្រើនថ្ងៃ ដោយសារស្នាដៃចោរអ៊ីនធ័រនែត ដែលសេអ៊ូល បានចោទប្រកាន់ភ្លាមថាជាស្នាដៃរបស់ព្យុងយ៉ាង។ កាលណោះ កុំព្យូទ័រចំនួនជាងបីម៉ឺនគ្រឿងត្រូវចោរចូលលុកលុយ ក្រោយប្រតិបត្តិការវាយប្រហារវិបសៃតិ៍អ៊ីនធ័រនែតរបស់រដ្ឋាភិបាលកូរ៉េខាងត្បូង។ អ្នកទទួលខុសត្រូវក្នុងក្រសួងការពារជាតិកូរ៉េខាងត្បូង ទទួលបន្ទុកប្រយុទ្ធប្រឆាំងចោរព័ត៌មានវិទ្យា បានអះអាងការគំរាមកំហែងពីសំណាក់កូរ៉េខាងជើងក្នុងវិស័យអ៊ីនធ័រនែត មានកាន់តែខ្លាំងៗឡើង។ ខាងជើង ចង់បំបែរយុទ្ធសាស្ត្រមកបំផ្លាញឬរំខានដំណើរការរចនាសម្ព័ន្ធប្រទេសតាមបណ្តាញអ៊ីនធ័រនែតម្តង។
នៅថ្ងៃចន្ទទី២២ធ្នូនេះទៀត កូរ៉េខាងត្បូង បានរងការវាយប្រហារតាមអ៊ីនធ័រនែត ប្រឆាំងនឹងមជ្ឈមណ្ឌលនុយក្លេអ៊ែរ តែជាសំណាងល្អ គ្មានព័ត៌មានឬឯកសារណាមួយត្រូវបានចោរលួចយកបាន។ ថ្វីបើជាកូរ៉េខាងជើង មានចេតនា ចង់អភិវឌ្ឍន៍នុយក្លេអ៊េរ ឬ អាវុធយុទ្ធភណ្ឌ ឱ្យទាន់ពិភពលោកខាងក្រៅមែន ប៉ុន្តែព្យុងយ៉ាងត្រូវជួបឧបសគ្គដ៏ធំមួយគឺបញ្ហាសេដ្ឋកិច្ច ! ប៉ុន្តែនៅក្នុងវិស័យព័ត៌មានវិទ្យាវិញ បើសាកលវិទ្យាធិការក្រុងសេអ៊ូល បង្កើនសមត្ថភាពក្នុងវិស័យនេះ គឺអាស្រ័យទៅលើសមត្ថភាពរបស់មនុស្សទាំងស្រុង។ ដូច្នេះនេះជាមធ្យោបាយដ៏មានប្រសិទ្ធិភាពក្នុងការពង្រឹងអំណាចយោធារបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ