កូរ៉េខាងត្បូងចុះកិច្ចសន្យាទិញឧទ្ធម្ភាគចក្រស៊ីវិល និងយោធាពី Airbus មានតម្លៃជាង ១ ៥០០លានដុល្លារ
នៅថ្ងៃចន្ទ ទី១៦ មីនានេះ ក្រុមហ៊ុន Airbus Helicopters បានចុះកិច្ចសន្យាជាមួយក្រុមហ៊ុន Korean Aerospace របស់កូរ៉េខាងត្បូងដើម្បីផលិតឧទ្ធម្ភាគចក្រស៊ីវិល និងយោធាជាង ៣០០គ្រឿងឲ្យរដ្ឋាភិបាលកូរ៉េខាងត្បូង។ ពិធីចុះហត្ថលេខាលើកិច្ចសន្យាដែលមានទឹកប្រាក់ជាង ១ ៥០០លានដុល្លារបានធ្វើឡើងនៅក្នុងទីក្រុងសេអ៊ូល។ ក្រៅពីផលិតឧទ្ធម្ភាគចក្រសម្រាប់កូរ៉េខាងត្បូង ក្រុមហ៊ុន Airbus និង Korean Aerospace ក៏រួមសហការណ៍គ្នាដើម្បីផលិតឧទ្ធម្ភាគចក្រសម្រាប់នំាចេញដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
គឺជាមហាកិច្ចសន្យាមួយដែលក្រុមហ៊ុន Airbus Helicopters ទើបបានចុះហត្ថលេខាជាមួយក្រុមហ៊ុន Korean Aerospace របស់កូរ៉ខាងត្បូងដើម្បីធ្វើការអភិវឌ្ឍន៍ និងផលិតឧទ្ធម្ភាគចក្រជាង ៣០០គ្រឿងឲ្យរដ្ឋាភិបាលទីក្រុងសេអ៊ូលដែលគិតជាទឹកប្រាក់មានជាង ១ ៥០០លានដុល្លារ។ ក្នុងចំណោមឧទ្ធម្ភាគចក្រជាង ៣០០គ្រឿងនោះ មាន ២១៤គ្រឿងជាឧទ្ធម្ភាគចក្រយោធា និងជាង ១០០គ្រឿងជាឧទ្ធម្ភាគចក្រស៊ីវិលដែលសម្រាប់បម្រើនៅក្នុងវិស័យសន្តិសុខសាធារណៈ ការដឹកជញ្ជូនមនុស្ស ប្រតិបត្តិការជួយសង្រ្គោះ ឬមួយក៏ប្រតិបត្តិការឃ្លំាមើលនៅតាមសមុទ្រជាដើម។ គួរបញ្ជាក់ជូនថា តំាងពីក្រោយរដ្ឋាភិបាលកូរ៉េខាងត្បូងបានដាក់ឲ្យដេញថ្លៃនូវកុងត្រាផលិតឧទ្ធម្ភាគចក្រយោធា និងស៊ីវិលក្នុងខែមិថុនា ឆ្នំា ២០១៤មក មានក្រុមហ៊ុនបរទេសចំនួន ៣ បានចូលខ្លួនប្រកួតប្រជែង គឺក្រុមហ៊ុនអឺរ៉ុប Airbus Helicopters ក្រុមហ៊ុនអ៊ីតាលី អង់គ្លេស Agusta Westland និងក្រុមហ៊ុនអាមេរិកំាង Bell Helicopters។
យោងតាមកិច្ចសន្យា ឧទ្ធម្ភាគចក្រយោធា និងស៊ីវិលទំាងជាង ៣០០គ្រឿងត្រូវផលិតរួចរាល់ និងដាក់ឲ្យដំណើរការនៅចន្លោះឆ្នំា ២០២១ និង ២០២២។ ដោយឡែក និងក្រៅពីផលិតឧទ្ធម្ភាគចក្រឲ្យរដ្ឋាភិបាលកូរ៉េខាងត្បូង ដៃគូ Airbus Helicopters និង Korean Aerospace ក៏គ្រោងសហការណ៍គ្នាដើម្បីផលិតឧទ្ធម្ភាគចក្រយោធា និងស៊ីវិលពី ៦០០ ទៅ ៨០០គ្រឿងសម្រាប់ទីផ្សារនំាចេញដែលមានទឹកប្រាក់រាប់សិបលានដុល្លារ។ សូមជម្រាបជូនថា Airbus Helicopters ជាក្រុមហ៊ុនជើងឯកក្នុងលោកខាងផលិតឧទ្ធម្ភាគចក្រស៊ីវិលដែលស្គាល់ក្រោមឈ្មោះថា Dauphin H៥៥។ គឺ Dauphin H៥៥ នេះឯងដែលគេយកទៅធ្វើជាគំរូដើម្បីផលិតឧទ្ធម្ភាគចក្រយោធា និងស៊ីវិលទំាងជាង ៣០០គ្រឿងឲ្យកូរ៉េខាងត្បូង។
អ្វីជាការកត់សម្គាល់ ការងារផលិតឧទ្ធម្ភាគចក្រទំាងជាង ៣០០គ្រឿងនោះនឹងត្រូវធ្វើចំនួន ៥០% នៅក្នុងប្រទេសបារំាង បន្ទាប់មកនឹងត្រូវយកទៅដំឡើងបញ្ចប់នៅកូរ៉េខាងត្បូង។ តែអ្នកទទួលខុសត្រូវក្រុមហ៊ុន Airbus បានប្រកាសធានាថា មិនមានការបញ្ជូនបច្ចេកវិជ្ជាទៅឲ្យកូរ៉េខាងត្បូងទេ ព្រោះដើម្បីចៀសវាងកុំឲ្យកូរ៉េខាងត្បូងយកទៅប្រើដើម្បីផលិតឧទ្ធម្ភាគចក្រដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ