សម្តេចសង្ឃដាឡៃ ឡាម៉ាមានព្រះជន្ម ៨០វស្សា
នៅទីក្រុង ដារ៉ាំសាឡា ក្នុងទឹកដីឥណ្ឌា ជាទីដែលព្រះអង្គភៀសនិរទេសខ្លួន ជាង៥០ឆ្នាំ សម្តេចសង្ឃទីបេ ដាឡៃ ឡាម៉ា នៅថ្ងៃអាទិត្យនេះ ធ្វើបុណ្យចម្រើនព្រះជន្ម ៨០វស្សា របស់ព្រះអង្គជាមួយពុទ្ធសាសនិកទីបេ រាប់ពាន់នាក់។ ក្រៅតែពីកត់សំគាល់ដោយបុណ្យសាសនា ដ៏ធំ នៅថ្ងៃអាទិត្យនេះ ពិធីចម្រើនព្រះជន្ម ជាស្នូរជួង រំលឹកឲ្យគេគិតទៅដល់អនាគតប្រជាជនទីបេ ដែលអស់មានសម្តេចសង្ឃ ដាឡៃ ឡាម៉ា។
ចុះផ្សាយនៅថ្ងៃ៖ កែប្រែថ្ងៃទី៖
សម្តេចសង្ឃដាឡៃ ឡាម៉ា ចាប់កំណើត នៅថ្ងៃ ទី ៦ កក្កដា ប៉ុន្តែ តាមប្រតិទិនចន្ទគតិ ពិធីបុណ្យចម្រើនព្រះជន្មរបស់ព្រះអង្គត្រូវធ្វើនៅថ្ងៃអាទិត្យនេះ។ នៅរដ្ឋធានី ដារ៉ាំសាឡា ក្នុងទឹកដីឥណ្ឌា ប្រជាជនទីបេរាប់ពាន់នាក់ដែលបានរត់និរទេសខ្លួនពីប្រទេសចិន និងមករស់នៅប្រទេសឥណ្ឌា បានធ្វើពិធីបុណ្យដ៏ធំ សម្រាប់ប្រមុខដឹកនាំសាសនារបស់ខ្លួន។
សម្តេចសង្ឃ ដាឡៃ ឡាម៉ា មានព្រះជន្ម ៨០វស្សា។ ព្រះអង្គបានរត់ភៀស និរទេសខ្លួនចេញពីទីបេ នៅឆ្នាំ ១៩៥៩ ដើម្បីគេចចេញពីការចាប់ចងរបស់រដ្ឋអំណាចប៉េកាំង។ នៅបរទេស ព្រះអង្គបានផ្តើមការតស៊ូ ដើម្បីទាមទារឯករាជ្យសម្រាប់ទឹកដីទីបេ។ ប៉ុន្តែ ក្នុងរយៈពេល ជាង ៥០ឆ្នាំ ការតស៊ូរបស់ព្រះអង្គបានផ្តល់ផ្លែផ្កាតិចតួច។ នៅឆ្នាំ ២០១១ ព្រះអង្គបានប្រកាសលែងដឹកនាំនយោបាយ និងបានប្តូរជំហរ ដោយលែងទាមទារឯករាជ្យឲ្យទីបេ ប៉ុន្តែ អំពាវនាវឲ្យទីក្រុងប៉េកាំងផ្តល់ស្វ័យភាពដល់តំបន់ទីបេ។
បើទោះសម្តេចសង្ឃដាឡៃ ឡាម៉ា ប្តូរជំហរ ប៉ុន្តែ ក្នុងក្រសែភ្នែករបស់រដ្ឋអំណាចប៉េកាំង ព្រះអង្គនៅតែអំបែងកែវក្នុងភ្នែក ដែលចង់ទាមទារផ្តាច់ទឹកដីទីបេចេញពីប្រទេសចិន។ ចន្លោះឆ្នាំ ២០០២ និងឆ្នាំ ២០១១ អាជ្ញាធរចិន និងអ្នកតំណាងរបស់រដ្ឋាភិបាលទីបេ នៅបរទេស បានបើកការចរចា ចំនួន ៩ដង ប៉ុន្តែ គ្មានផ្តល់លទ្ធផលអ្វី។
ពិធីបុណ្យចម្រើនព្រះជន្ម នៅថ្ងៃនេះ ធ្វើឲ្យគេចោទសំណួរផងដែរ ពីអនាគតនៃចលនាទាមទាររបស់ប្រជាជនទីបេ នៅបរទេស នៅពេលគ្មានសម្តេចសង្ឃដាឡៃ ឡាម៉ា ដែលដើរតួជាអ្នកបង្រួបបង្រួម រហូតមក។ លោកប្រធានាធិបតីអាមេរិក ដែលបានទទួលជួបសម្តេចសង្ឃ ដាឡៃ ឡាម៉ា កាលពីខែកុម្ភៈកន្លងមក ធ្លាប់បាននិយាយថា សម្តេចដាឡៃ ឡាម៉ា ជាប្រភពស្មារតី ដែលលើកទឹកចិត្តមនុស្សឲ្យនិយាយ ធ្វើអ្វីៗ ដើម្បីសេរីភាព និងភាពថ្លៃថ្នូររបស់មនុស្ស។
តើនឹងមានអ្វីកើតឡើង នៅក្រោយសម្តេចសង្ឃដាឡៃ ឡាម៉ា សុគត? តើប្រជាជនទីបេ ក្នុង និងក្រៅស្រុក នឹងជ្រើសតាំងដាឡៃ ឡាម៉ាថ្មី ដើម្បីបន្តស្នងពីព្រះអង្គដែរឬទេ។ នៅឆ្នាំមុន ព្រះអង្គធ្លាប់បាននិយាយប្រាប់កាសែតអាល្លឺម៉ង់ ព្រះអង្គនឹងមានព្រះជន្មរហូតដល់១១៣វង្សា និងថា នៅក្រោយព្រះអង្គនឹងគ្មានដាឡៃ ឡាម៉ាទៀតទេ ព្រោះ ព្រះអង្គបានសម្រេចចិត្ត នឹងមិនត្រលប់មកចាប់កំណើតជាថ្មីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ