អូតង់៖អង្គការរដ្ឋអ៊ីស្លាមកំពុងធ្វើការជ្រើសរើសយុទ្ធជនរបស់ខ្លួននៅអាហ្វហ្កានីស្ថាន និងប៉ាគីស្ថាន
មេបញ្ជាការកម្លំាងអូតង់ឧត្តមសេនីយអាមេរិកំាងចន កំាបែលនៅក្នុងប្រទេសអាហ្វហ្កានីស្ថានបានប្រកាសឲ្យដឹងនាចុងសប្តាហ៍កន្លងមកថា អង្គការរដ្ឋអ៊ីស្លាមកំពុងធ្វើការជ្រើសរើសយុទ្ធជនរបស់ខ្លួនចេញពីក្នុងចំណោមពួកឧទ្ទាមតាលីបង់នៅក្នុងប្រទេសអាហ្វហ្កានីស្ថាន និងប្រទេសប៉ាគីស្ថាន។ ឧត្តមសេនីយអាមេរិកំាងរូបនេះដដែលបានព្រមានទុកជាមុនថា ទោះបីជាយុទ្ធជនទើបជ្រើសរើសទំាងនោះនៅមិនទាន់មានសមត្ថភាពប្រយុទ្ធពេញលេញក៏ដោយ ក៏វាជារឿងអាទិភាព និងបន្ទាន់ដែលគេមិនត្រូវមើលស្រាល និងត្រូវតែចាត់វិធានទប់ស្កាត់ជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ការថ្លែងព្រមានយ៉ាងដូចនេះរបស់លោកឧត្តមសេនីយអាមេរិកំាងចន កំាបែលត្រូវបានធ្វើឡើងនៅក្នុងជំនួបជាមួយក្រុមអ្នកកាសែតបរទេសក្នុងទីក្រុងកាប៊ូល ប្រទេសអាហ្វហ្កានីស្ថាន។ យោងតាមលោកចន កំាបែល មានតម្រុយជាច្រើនដែលបានបង្ហាញឲ្យឃើញថា ភ្នាក់ងាររបស់អង្គការរដ្ឋអ៊ីស្លាមកំពុងបើកយុទ្ធនាការជ្រើសរើសយុទ្ធជនរបស់ខ្លួនពីក្នុងចំណោមពួកឧទ្ទាមតាលីបង់នៅក្នុងប្រទេសអាហ្វហ្កានីស្ថាន និងនៅក្នុងប្រទេសប៉ាគីស្ថាន។ ឧត្តមសេនីយអាមរិកំាងរូបនេះបានបន្ថែមដោយព្រមានទុកជាមុនថា រដូវក្តៅកាន់តែខិតជិតមកដល់ ហើយបើគ្មានវិធានការណាមួយដើម្បីទប់ស្កាត់ទេ នោះសកម្មភាពជ្រើសរើសយុទ្ធជនរបស់អង្គការរដ្ឋអ៊ីស្លាមនឹងកាន់តែរីកធំឡើងជាមិនខាន។
ជាការកត់សម្គាល់ ការថ្លែងរបស់លោកចន កំាបែលបានធ្វើឡើងនៅក្នុងរដូវប្រយុទ្ធរវាងកម្លំាងឧទ្ទាមតាលីបង់ និងកម្លំាងរដ្ឋាភិបាលអាហ្វហ្កានីស្ថាន។ គឺជាការប្រឈមមុខតទល់គ្នាលើកទី១ ដោយគ្មានជំនួយពីកម្លំាងទ័ពអូតង់។ យ៉ាងណាក៏ដោយ មេបញ្ជាការកម្លំាងអូតង់រូបនេះដដែលបានយល់ឃើញថា យុទ្ធនាការជ្រើសរើសយុទ្ធជនរបស់អង្គការរដ្ឋអ៊ីស្លាមនៅអាហ្វហ្កានីស្ថាន ឬមួយនៅប៉ាគីស្ថានហាក់ដូចជាមិនសូវបើកចំហ និងទូលំទូលាយដូចនៅក្នុងប្រទេសស៊ីរីនៅឡើយទេ។ សម្រាប់លោកចន កំាបែល វាជាពេលវេលាដែលគេត្រូវចាត់វិធានការទប់ស្កាត់ជាបន្ទាន់ បើពុំនោះសោតទេ ស្ថានការណ៍នឹងកាន់តែធ្លាក់ដុនដាបសម្រាប់ប្រទេសអាហ្វហ្កានីស្ថាន ក៏ដូចជាប៉ាគីស្ថាន។
ការកត់សម្គាល់មួយទៀត ការថ្លែងព្រមានរបស់លោកចន កំាបែលបានកើតមានឡើង ចំពេលដែលរដ្ឋាភិបាលទីក្រុងកាប៊ូល និងទីក្រុងអ៊ីស្លាម៉ាបាតកំពុងមានទំនាក់ទំនងផ្លូវទូតកាន់តែស្និទ ពិសេសតំាងពីការឡើងកាន់តំណែងប្រធានាធិបតីអាហ្វហ្កានីស្ថានរបស់លោកហ្កានី។ ថ្មីៗនេះ ក្រសួងស៊ើបការណ៍សម្ងាត់នៃប្រទេសជិតខាងទំាងពីរបានចុះហត្ថលេខាលើអនុស្សរណៈមួយស្តីពីការដោះដូរព័ត៌មាន និងរួមសហការណ៍គ្នាក្នុងការប្រយុទ្ធប្រឆំាងនឹងភេរវនិយម។ និយាយពីធម្មជាតិពិតនៃវត្តមានអង្គការរដ្ឋអ៊ីស្លាមក្នុងទឹកដីអាហ្វហ្កានីស្ថានត្រូវបានលោកចន កំាបែលអះអាងថា គេនៅមិនទាន់ឃើញមានវត្តមានយុទ្ធជនបរទេសឆ្លងមកពីស៊ីរី អ៊ីរ៉ាក់ ឬកន្លែងផ្សេងទេ តែច្រើនជាពួកតាលីបង់ក្នុងស្រុកដែលព្យាយាមប្តូរអត្តសញ្ញាណរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ