MH370៖ អ្នកស៊ើបអង្កេតកំពុងសិក្សាលើបំណែកយន្តហោះ រកឃើញលើឆ្នេរកោះបារាំង La Réunion
ក្រុមអ្នកជំនាញពិសេស ខាងស៊ើបអង្កេតលើការបាត់ខ្លួន យន្តហោះម៉ាឡេស៊ី MH៣៧០ បានធ្វើដំណើរនៅថ្ងៃព្រហស្បតិ៍នេះ សំដៅ កោះLa Réunion របស់បារាំង ជាទី ដែលគេបានរកឃើញបំណែកស្លាបយន្តហោះ កាលពីថ្ងៃពុធម្សិលមិញ។ ទាំងភាគីម៉ាឡេស៊ី និងអូស្ត្រាលីដែលជាអ្នកទទួលបន្ទុកការស៊ើបអង្កេតលើមានការប្រុងប្រយ័ត្នខ្លាំង មិនទាន់ហ៊ានសន្និដ្ឋាន អះអាងថា បំណែកស្លាបយន្តហោះដែលគេរកឃើញ ជាផ្នែកមួយនៃយន្តហោះម៉ាឡេស៊ី ដែលបានបាត់ខ្លួន ដ៏អាថ៌កំបាំង កាលពីខែមីនា ឆ្នាំ មុន។
ចុះផ្សាយនៅថ្ងៃ៖
ស្តាប់ - ០២:១៨
នៅក្រោយដំណឹងថា គេបានរកឃើញបំណែកស្លាបយន្តហោះ នៅលើកោះមួយរបស់បារាំង ក្នុងមហាសមុទ្រឥណ្ឌា អ្នកជំនាញទទួលបន្ទុក ការស៊ើបអង្កេត លើការបាត់ខ្លួនយន្តហោះ ម៉ាឡេស៊ី MH 370 ចាប់ផ្តើមធ្វើដំណើរទៅទឹកដីបារាំង។ បេសកកម្មរបស់ពួកគេ គឺពិនិត្យស្រាវជ្រាវ ចង់ដឹងថា តើបំណែកស្លាបយន្តហោះ នោះជាផ្នែកមួយនៃយន្តហោះម៉ាឡេស៊ី MH370ដែលបាត់ខ្លួន កាលពីឆ្នាំមុនដែរឬទេ។
កាលពីថ្ងៃពុធ អ្នកបោសសម្អាតឆ្នេរនៅលើកោះ La Réunion ដែលជាដែនដី របស់បារាំង នៅក្នុងមហាសមុទ្រឥណ្ឌា បានប្រទះឃើញ បំណែកស្លាបយន្តហោះមួយ ប្រវែង ២ម៉ែត្រ ដែលបានអណ្តែតមកទើ នៅលើឆ្នេរ។ សម្រាប់អ្នកស៊ើបអង្កេតពិសេសមកពីអាកាសចរណ៍ស៊ីវិលបារាំង វាឆាប់ពេកណាស់ ដើម្បីសន្និដ្ឋានថា បំណែកស្លាបយន្តហោះដែលរកឃើញ ជាផ្នែកមួយរបស់យន្តហោះ ម៉ាឡេស៊ី MH370។ ក្នុងដំណាក់កាលដំបូង គេកំពុងស្វែងរកលេខ ចារលើបំណែកយន្តហោះ ដើម្បីអាចបញ្ជាក់ពីអត្តសញ្ញាណ ប្រភេទរបស់យន្តហោះ។
អ្នកជំនាញអាកាសចរណ៍ ចាប់អារម្មណ៍ សិក្សា រកប្រភពដើមនៃបំណែកស្លាបយន្តហោះ ព្រោះថា យន្តហោះម៉ាឡេស៊ី MH370 ដែលដឹកអ្នកដំណើរចេញពីម៉ាឡេស៊ី ទៅប្រទេសចិន ទំនងបាត់ខ្លួន នៅភាគខាងត្បូង នៃមហាសមុទ្រឥណ្ឌា។ យ៉ាងណាក៏ដោយ យន្តហោះ ម៉ាឡេស៊ី មិនមែនជាសម្មតិកម្មតែមួយ របស់អ្នកជំនាញបារាំង។ គេកំពុងផ្តោតផងដែរ ទៅលើករណីយន្តហោះ Airbus ៣១០របស់ក្រុមហ៊ុនហោះហើរយេម៉ែន ដែលបានធ្លាក់នៅក្នុងមហាសមុទ្រឥណ្ឌា ដែរ កាលពីឆ្នាំ ២០០៩។
រដ្ឋមន្រ្តីដឹកជញ្ជូនម៉ាឡេស៊ី បានប្រកាសតាំងពីក្រុងញូវយ៉ក បញ្ជូនអ្នកជំនាញម៉ាឡេស៊ី ទៅកន្លែងកើតហេតុផ្ទាល់។ តាមលោកDatp Sro Mopw Top,g Lai គេត្រូវសិក្សាលម្អិត មុននឹងបញ្ជាក់ថា បំណែកស្លាបយន្តហោះ ជាផ្នែកមួយរបស់យន្តហោះ ម៉ាឡេស៊ី MH370។ កាលពីដើមខែមករា នេះ ក្រុមហ៊ុនអាកាសចរណ៍ ម៉ាឡេស៊ី បានប្រកាសចាត់ទុក ករណីបាត់យន្តហោះ ម៉ាឡេស៊ី MH370ថា ជាគ្រោះថ្នាក់ និងថា គ្រប់អ្នកដំណើរ និងអ្នកបម្រើការលើយន្តហោះ ទាំង ២៣៩នាក់ បានស្លាប់ទាំងអស់។
តាមមន្រ្តីទទួលខុសត្រូវលើការស៊ើបអង្កេតម៉ាឡេស៊ី សម្មតិកម្មដែលគួរឲ្យជឿជាក់ជាងគេ គឺ អ្នកដំណើររួមទាំងអ្នកបើកបរយន្តហោះ ត្រូវសន្លប់បាត់ស្មារតី ដោយសារខ្វះខ្យល់អុកស៊ីសែន។ បន្ទាប់មក យន្តហោះអាចហោះដោយគ្មានអ្នកបើកបរ រហូតដល់អស់សាំង និងធ្លាក់បាត់ស្រមោលទៅក្នុងទឹកសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ