ឥណ្ឌា៖លោកម៉ូឌីសន្យាកំចាត់អំពើពុករលួយដែលកំពុងស៊ីរូងប្រទេសដូចសត្វកណ្តៀរ
១៥ សីហា ១៩៤៧ ១៥ សីហា ២០១៥ ថ្ងៃនេះប្រទេសឥណ្ឌាបានរៀបចំប្រារព្ធខួបបុណ្យឯករាជ្យជាតិគម្រប់ ៦៨ឆ្នំា។ នៅក្នុងសុន្ទរកថាថ្លែងនាឱកាសនោះ លោកនាយករដ្ឋមន្រ្តីណារ៉េនដ្រា ម៉ូឌីបានសន្យាកំចាត់អំពើពុករលួយដែលកំពុងស៊ីរូងផ្ទៃក្នុងប្រទេសដែលលោកហៅថា ដូចសត្វកណ្តៀរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
« ខ្ញុំចង់បញ្ជាក់ប្រាប់ជាថ្មីម្តងទៀតថា ប្រទេសឥណ្ឌានឹងត្រូវបោសសំអាតឲ្យអស់នូវអំពើពុករលួយ។ យើងអាចកំចាត់អំពើពុករលួយបាន ហើយយុទ្ធនាការប្រយុទ្ធប្រឆំាងនឹងអំពើពុករលួយត្រូវចាប់ផ្តើមពីថ្នាក់កំពូលមុនគេ » នេះជាប្រសាសន៍របស់លោកនាយករដ្ឋមន្រ្តីឥណ្ឌាណារ៉េនដ្រា ម៉ូឌីដែលលោកបានថ្លែងនាឱកាសបុណ្យខួបឯករាជ្យជាតិដែលឥណ្ឌាទទួលបានពីប្រទេសអង់គ្លេសក្នុងថ្ងៃទី១៥ សីហា ឆ្នំា ១៩៤៧។ លោកម៉ូឌីបានប្រៀបប្រដូចអំពើពុករលួយទៅនឹងសត្វកណ្តៀរដែលកកេរដោយសន្សឹមៗ យឺតៗ និងរីករាលដាលកាន់តែធំទៅៗ តែគេអាចសម្លាប់កណ្តៀរទំាងអស់នោះយ៉ាងឆាប់រហ័សដោយបាញ់ថ្នំាសម្លាប់។
ការថ្លែងរបស់លោកម៉ូឌីទាក់ទងនឹងអំពើពុករលួយពេលនេះមិនមែនជារឿងចៃដន្យទេ ព្រោះវាបានធ្វើឡើង ចំពេលដែលមានថ្នាក់ដឹកនំាជាន់ខ្ពស់របស់គណបក្សកាន់អំណាចរបស់លោកច្រើនរូបកំពុងជាប់ឈ្មោះនៅក្នុងរឿងអាស្រូវពុករលួយជាច្រើន។ ជាក់ស្តែង លោកស្រីរដ្ឋមន្រ្តីក្រសួងការបរទេស Sushma Swaraj និងរូបប្រធានប្រតិបត្តិក្នុងរដ្ឋ Rajasthan និងរដ្ឋ Madhya Pradesh កំពុងជាប់ចោទពីបទពុករលួយ។ គួរជម្រាបជូនថា រឿងអាស្រូវពុករលួយបាន និងកំពុងធ្វើឲ្យលោកម៉ូឌីក្រពុលមុខផង និងទើសទាល់ចិត្តផង ព្រោះថា ការជាប់ឆ្នោតរបស់លោកជានាយករដ្ឋមន្រ្តីក៏ដោយសារតែនាសម័យឃោសនាបោះឆ្នោត លោកបានសន្យាកំចាត់រឿងអាស្រូវពុករលួយឲ្យដល់ឫសគល់។
ដោយឡែក និងក្រៅពីសន្យាបំបាត់អំពើពុករលួយ លោកម៉ូឌីក៏បានសន្យាបំពាក់ភ្លើងអគ្គិសនីឲ្យដល់ភូមិ ស្រុកនៅទូទំាងប្រទេសឥណ្ឌា។ ក្នុងន័យនេះ លោកម៉ូឌីបានដាក់កំហិតរយៈពេល ១ ០០០ថ្ងៃដើម្បីឲ្យរដ្ឋសហព័ន្ធ និងភាគីពាក់ព័ន្ធទំាងអស់គិតគូរពីការតបណ្តាញភ្លើងអគ្គិសនីឲ្យគ្រប់ភូមិ ស្រុក។ យោងតាមលោកម៉ូឌី ៦៨ឆ្នំា ក្រោយការទទួលឯករាជ្យ នៅមានភូមិ ១៨ ៥០០ភូមិកំពុងបន្តគ្មានភ្លើងអគ្គិសនីប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ