ឥណ្ឌា៖លោកម៉ូឌីសំណូមពរឲ្យប្រើទំនៀមទម្លាប់ចាស់ដើម្បីប្រឆំាងនឹងផ្សែងពុលក្នុងបរិយាកាស
នៅក្នុងប្រទេសឥណ្ឌា លោកនាយករដ្ឋមន្រ្តីណារ៉េនដ្រា ម៉ូឌីបានធ្វើសំណូមពរឲ្យប្រើទំនៀមទម្លាប់ប្រពៃណីដែលមានពីមុនដើម្បីប្រយុទ្ធប្រឆំាងនឹងផ្សែងពុលនៅក្នុងបរិយាកាស។ សំណូមពររបស់លោកម៉ូឌីបានធ្វើឡើងនៅក្នុងពីធីបង្ហាញយុទ្ធសាស្រ្តក្នុងការបង្កើនគុណភាពខ្យល់នៅក្នុងទីក្រុងញូដែលី។ ទីក្រុងញូដែលីដែលត្រូវបានគេចាត់ទុកជាទីក្រុងដែលមានជាតិពុលក្នុងបរិយាកាសច្រើនជាងគេនៅក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
វិធានការក្នុងការប្រយុទ្ធប្រឆំាងនឹងវត្តមានកម្រិតផ្សែងពុលនៅក្នុងបរិយាកាស ពិសេសនៅក្នុងទីក្រុងញូដែលីត្រូវបានលោកនាយករដ្ឋមន្រ្តីណារ៉េនដ្រា ម៉ូឌីរកឃើញនៅក្នុងទំនៀមទម្លាប់ប្រពៃណីដ៏យូរលង់របស់ឥណ្ឌា នោះគឺការបិទភ្លើងអគ្គិសនីទំាងអស់នៅតាមកន្លែងសាធារណៈក្នុងពេលដែលមានព្រះខែជាអ្នកបំភ្លឺជំនួស ពិសេសក្នុងខែពេញវង់។ លោកម៉ូឌីបានបញ្ជាក់ថា នេះជាវិធានការយ៉ាងសាមញ្ញាមួយប៉ុណ្ណោះ តែអាចធ្វើឲ្យគេចំណេញថាមពល និងកាត់បន្ថយការបញ្ចេញឧស្ម័នពុលច្រើនណាស់ទៅក្នុងបរិយាកាស។ ក្រៅពីសំណូមពរឲ្យបិទភ្លើងនៅពេលព្រះខែពេញវង់ លោកប្រមុខរដ្ឋាភិបាលឥណ្ឌាក៏បានស្នើឲ្យយកថ្ងៃអាទិត្យរៀងរាល់សប្តាហ៍ធ្វើជា ទិវាជិះកង់ផងដែរ។
សំណូមពររបស់លោកម៉ូឌីក្នុងការប្រយុទ្ធប្រឆំាងនឹងផ្សែងពុលក្នុងបរិយាកាសពេលនេះបានធ្វើឡើង នៅក្នុងពិធីបង្ហាញយុទ្ធសាស្រ្តក្នុងការបង្កើនគុណភាពខ្យល់នៅក្នុងទីក្រុងធំចំនួន ១០ នៅឥណ្ឌា។ លោករដ្ឋមន្រ្តីក្រសួងបរិស្ថានមិនបានផ្តល់យុទ្ធសាស្រ្តជាក់លាក់អ្វីក្នុងការបង្កើនគុណភាពខ្យល់នៅក្នុងបរិយាកាសទេ តែបែរជាបានប្រកាសពីវិធានការថ្មីសម្រាប់គ្រប់គ្រងកាកសំណល់នៅតាមការដ្ឋានសាងសង់ទៅវិញ។ គួរជម្រាបជូនថា គ្រាន់តែនៅក្នុងទីក្រុងញូដែលីមួយ មានមនុស្សស្លាប់មុនអាយុយ៉ាងតិច ៣ ០០០នាក់ជារៀងរាល់ឆ្នំាដោយជំងឺសួតបង្កចេញពីការដកដង្ហើមស្រូបផ្សែងពុលពីបំពង់ស៊ីម៉ាំងឡាន ម៉ូតូ និងពីលំអងធូលីនៅតាមការដ្ឋានសាងសង់នានា។
យ៉ាងណាក៏ដោយ ក្រុមអ្នកការពារបរិស្ថានមានការសោកស្តាយចំពោះវិធានការមិនជាក់ច្បាស់របស់រដ្ឋាភិបាលឥណ្ឌាក្នុងការកាត់បន្ថយអត្រាផ្សែងពុលនៅក្នុងបរិយាកាស ពោលគឺកង្វះឆន្ទៈនយោបាយ និងការទទួលខុសត្រូវចំពោះបញ្ហាបរិស្ថាន។ កាលពីឆ្នំា ២០១៤ នៅចំណោមទីក្រុងធំៗទំាង ១ ៦០០ ក្នុងលោកដែលអង្គការសុខភាពពិភពលោកបានធ្វើការសិក្សា ញូដែលីបានស្ថិតចំណាត់លេខ ១ ជាទីក្រុងដែលមានជាតិពុលក្នុងបរិយាកាសច្រើនជាងគេក្នុងលោក។ តែរដ្ឋាភិបាលឥណ្ឌាបានច្រានចំណាត់ថ្នាក់នេះ និងទទួលស្គាល់ថា ជាតិពុលក្នុងបរិយាកាសឥណ្ឌាក៏មិនខុសគ្នានឹងជាតិពុលដែលមានក្នុងបរិយាកាសនៅទីក្រុងប៉េកំាង ប្រទេសចិនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ