គណបក្សរបស់នាយករដ្ឋមន្រ្តីឥណ្ឌាបរាជ័យ ក្នុងការបោះឆ្នោតដ៏សំខាន់ នៅរដ្ឋប៊ីហារ
ផែនការកំណែទម្រង់របស់លោកនាយករដ្ឋមន្រ្តីឥណ្ឌា ណារិនដ្រា ម៉ូឌី នឹងត្រូវជាប់គាំង មិនអាចដំណើរការទៅមុខ។ លោកណារិនដ្រា ម៉ូឌី ដែលសង្ឃឹមឈ្នះ នៅក្នុងការបោះឆ្នោតនៅរដ្ឋប៊ីហារ ដើម្បីអាចគ្រប់គ្រងសំឡេង ភាគច្រើន នៅព្រឹទ្ធសភា បានប្រកាសទទួលស្គាល់ នៅថ្ងៃអាទិត្យ ទី ៨វិច្ឆិកា បរាជ័យរបស់គណបក្សរបស់លោក គណបក្សជាតិនិយមបារ៉ាទីយ៉ា ចាណាតា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
គណបក្សជាតិនិយម របស់លោកណារិនដ្រា ម៉ូឌី បានទទួលជ័យជំនះ នៅក្នុងការបោះឆ្នោតសភា កាលពីឆ្នាំ ២០១៤ ដែលបានបើកផ្លូវឲ្យលោក ណារិនដ្រា ម៉ូឌីចូលកាន់តំណែងជានាយករដ្ឋមន្រ្តីឥណ្ឌា។ គណបក្សជាតិនិយមរបស់លោកម៉ូឌី គ្រប់គ្រងសំឡេងភាគច្រើន នៅរដ្ឋសភា ប៉ុន្តែ ខ្សត់ខ្សោយសំឡេងនៅព្រឹទ្ធសភា។ ការគ្មានសំឡេងភាគច្រើននៅព្រឹទ្ធសភា ធ្វើឲ្យសំណើកំណែទម្រង់ របស់រដ្ឋាភិបាល ម៉ូឌីត្រូវជាប់គាំងស្ទះ មិនបានទទួលការបោះឆ្នោតគាំទ្រពីព្រឹទ្ធសភា ដែលគ្រប់គ្រងដោយគណបក្សប្រឆាំង។
ដើម្បីប្រមូលបានសំឡេងច្រើននៅព្រឹទ្ធសភា លោកនាយករដ្ឋមន្រ្តីឥណ្ឌា ធ្លាប់បានដាក់ក្តីសង្ឃឹមលើការបោះឆ្នោតថ្នាក់តំបន់ នៅរដ្ឋប៊ីហារ ដែលសំបូរប្រជាជនឥណ្ឌារស់នៅ រាប់រយលាននាក់។ នៅក្នុងយុទ្ធនាការឃោសនាបោះឆ្នោត លោកនាយករដ្ឋមន្រ្តីបានសន្យាផ្តល់ជំនួយរាប់ពាន់លានដុល្លារ ដើម្បីអភិវឌ្ឍរដ្ឋដ៏ក្រីក្រមួយនេះ ជាទីដែលអត្រាប្រជាជនខ្វះអាហារូបត្ថម្ភមានកម្រិតខ្ពស់ របស់ឥណ្ឌា។
ប៉ុន្តែ ទោះជាលោកណារិនដ្រា ម៉ូឌីប្រឹងប្រែងបញ្ចុះបញ្ចូល ម្ចាស់ឆ្នោត លោកនៅតែមិនអាចយកឈ្នះលើគណបក្សប្រឆាំង ដែលបានរួម ពួតកម្លាំងគ្នាជាធ្លុងមួយ។ តាមលទ្ធផលបោះឆ្នោត បណ្តោះអាសន្ន ដែលគណៈកម្មាធិការបោះឆ្នោត បានបង្ហាញនៅថ្ងៃអាទិត្យនេះ គណបក្សជាតិនិយមរបស់លោកម៉ូឌី បានទទួលអាសនៈតែ៥៨ នៅក្នុងពេលដែលក្រុមបក្សប្រឆាំង បានទទួល១៦០ ក្នុងចំណោមអាសនៈសរុប២៤៣ នៅសភា ក្នុងរដ្ឋប៊ីហារ របស់ឥណ្ឌា។ នៅក្នុងសាររបស់បណ្តាញសង្គម Twitter នៅថ្ងៃអាទិត្យនេះ លោកណារិនដ្រា ម៉ូឌី បានសំដែងការអបអរជ័យជំនះរបស់ លោកនីទីស កុមារ ដែលជាប្រធានរដ្ឋប៊ីហារ និងប្រធានបក្សប្រឆាំង។
ឥណ្ឌារបស់លោកម៉ូឌី មានកំណើនសេដ្ឋកិច្ចប្រមាណ ៧ភាគរយ។ លោកនាយករដ្ឋមន្រ្តីឥណ្ឌា ចង់ធ្វើកំណែទម្រង់ សម្រាប់ជំរុញការវិនិយោគ និងបង្កើតការងារធ្វើដល់យុវជនឥណ្ឌារាប់លាននាក់។ ប៉ុន្តែ បរាជ័យនៅក្នុងការបោះឆ្នោតដ៏សំខាន់នៅរដ្ឋប៊ីហារ នឹងធ្វើឲ្យគណបក្សកាន់អំណាច មិនអាចសម្រេចទិសដៅរបស់ខ្លួនបានដោយងាយ ព្រោះថា រាល់កំណែទម្រង់នឹងនៅតែជាប់គាំងស្ទះ នៅព្រឹទ្ធសភា ដែលនៅតែគ្មានសំឡេងភាគច្រើនរបស់គណបក្សកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ