វាសនាចុងក្រោយរបស់ជនជាតិបារាំងដែលជាប់ទោសប្រហារជីវិតនៅឥណ្ឌូនេស៊ី
ជនជាតិបារាំងម្នាក់កំពុងជាប់ទោសប្រហារជីវិត នៅប្រទេសឥណ្ឌូណេស៊ី ពីបទជួញគ្រឿងញៀន។ វាសនាចុងក្រោយរបស់ជនជាតិបារាំងម្នាក់នេះ រំពឹងទាំងស្រុងទៅលើតុលាការកំពូលឥណ្ឌូណេស៊ី ដែលនៅមិនទាន់ចេញសាលដីកានៅឡើយ។ អគ្គរដ្ឋទូតបារាំងប្រចាំនៅឥណ្ឌូណេស៊ី បានព្រមានថា ការកាត់ទោសប្រហារជីវិតលើជនជាតិបារាំង ប្រាកដជាជះឥទ្ធិពលអាក្រក់ ទៅលើទំនាក់ទំនង រវាងបារាំង និងឥណ្ឌូណេស៊ី ជាក់ជាមិនខាន។ ឥណ្ឌូណេស៊ី គឺជាប្រទេស ដែលមាន ច្បាប់ប្រឆាំងគ្រឿងញៀន យ៉ាងតឹងរឹងបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ជនជាតិបារាំងម្នាក់ ឈ្មោះ Serge Atlaoui អាយុ ៥៥ឆ្នាំ ត្រូវបានតុលាការឥណ្ឌូណេស៊ី កាត់ទោសប្រហារជីវិត ពីបទជួញដូរគ្រឿងញៀន។ ជនជាតិបារាំងនេះ ត្រូវបានចាប់ខ្លួននៅឆ្នាំ ២០០៥ ហើយត្រូវបានកាត់ទោសនៅឆ្នាំ ២០០៧ ឲ្យជាប់ទោសប្រហារជីវិត។ លោក Serge Atlaoui តែងតែអះអាងជានិច្ច ថារូបលោក គ្មានជាប់ពាក់ព័ន្ធ នឹងក្រុមផលិតគ្រឿងញៀន ឥណ្ឌូណេស៊ីទេ។ លោកគ្រាន់តែត្រូវបានគេជួលឲ្យផ្សារដែក តំឡើងម៉ាស៊ីន ដែលលោកនឹកស្មានថាជាម៉ាស៊ីនផលិត Acrylique ធម្មតាតែប៉ុណ្ណោះ។
លោកស្រី Corine Breuzé អគ្គរដ្ឋទូតបារាំងប្រចាំនៅឥណ្ឌូណេស៊ី បានគំរាមថា ការកាត់ទោសប្រហារជីវិត ទៅលើជនជាតិបារាំងរូបនេះ នឹងជះឥទ្ធិពលអាក្រក់ដល់ទំនាក់ទំនងការទូត រវាងបារាំង និងឥណ្ឌូណេស៊ី។ លោកស្រីថា បារាំងជាប្រទេសដែលគោរពសិទ្ធិមនុស្ស ហើយបានលប់ចោលទោសប្រហារជីវិត តាំងពីឆ្នាំ ១៩៨១ម្លេះ។ យ៉ាងណាមិញ បារាំងបានទាំងជួយឥណ្ឌូណេស៊ី ក្នុងការប្រយុទ្ធប្រឆាំង នឹងការជួញដូរគ្រឿងញៀនផងដែរ។ ដោយឡែក លោកស្រីបានបញ្ជាក់ ពីភាពមិនប្រក្រតីមួយចំនួន លើការចោទប្រកាន់ ទៅលើជនជាតិបារាំង។ លោកស្រីថា ជនជាប់ចោទ ជាជនជាតិបារាំង ត្រូវបានតុលាការឥណ្ឌូណេស៊ីចោទថា ជាអ្នកជំនាញគីមី មានទួនាទីផ្សំថ្នាំផលិតជាថ្នាំគ្រាប់អំហ្វេតាមីន ប៉ុន្តែនេះវាផ្ទុយពីការពិតទាំងស្រុង ដែលជនជាប់ចោទ មានជំនាញជាអ្នកផ្សារដែក។ ហើយក្នុងចំណោម ជនជាប់ចោទទាំង៨នាក់ ដែលជាប់ទោសប្រហារជីវិត ក្នុងករណីនេះ មានតែជនជាតិបារាំងនេះម្នាក់គត់ ដែលមានឈ្មោះ ក្នុងបញ្ជីរត្រូវប្រហារជីវិត។
ពេលនេះវាសនា របស់ជនជាតិបារាំង រំពឹងទាំងស្រុងទៅលើសេចក្តីសម្រេច របស់តុលាការកំពូល ឥណ្ឌូណេស៊ី។ បើសិនជាតុលការច្រានចោល ការប្តឹងទាស់របស់ជនជាប់ចោទ ការប្រហារជីវិតនឹងត្រូវធ្វើឡើងភ្លាមៗតែម្តង។ ភរិយារបស់ជនសង្ស័យបានអំពាវនាវឲ្យដោះលែងប្តីរបស់គាត់ ហើយគាត់មានការតក់ស្លុតយ៉ាងខ្លំាង ដែលអាជ្ញាធរឥណ្ឌូណេស៊ី បានវាស់វែងកំពស់ប្តីគាត់ ដើម្បីត្រៀមធ្វើម្ឈូស។
លោកប្រធានាធិបតីឥណ្ឌូណេស៊ី បានបដិសេធមិនធ្វើអន្តរាគមន៍អ្វីទាំងអស់។ លោកមានប្រសាសន៍ថា ឥណ្ឌូណេស៊ី កំពុងប្រឹងប្រែងបំបែកសំបុកក្រុមផលិត និងជួញដូរគ្រឿងញៀន ព្រោះថាគ្រឿងញៀនបានសម្លាប់ជីវិតជនជាតិឥណ្ឌូណេស៊ី ជាង១០នាក់ ជារៀងរាល់ថ្ងៃ។ លោកថា ជនទុច្ចរិត ត្រូវតែទទួលទោសទៅតាមច្បាប់។ ដោយឡែក ជាមួយគ្នានេះដែរ ឥណ្ឌូណេស៊ី បានរិះគន់ប្រទេសអារ៉ាប៊ីសាអ៊ូឌីត ដែលបានធ្វើការប្រហារជីវិតជនជាតិខ្លួន កាលពីសបា្តហ៏មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ