ជប៉ុនតវ៉ានឹងការចុះឯកសារស្តីពីការសម្លាប់រង្គាលនៅណានជីង ទៅក្នុងបញ្ជីរយូណេស្កូ
ជប៉ុន នៅថ្ងៃសៅរ៍ទី ១០តុលា បានសំដែងការតវ៉ា បន្ទាប់ពី អង្គការយូណេស្កូ កាលពីថ្ងៃសុក្រ បានសម្រេចដាក់បញ្ចូលឯកសារស្តីពីការសម្លាប់រង្គាលនៅណានជីង ក្នុងប្រទេសចិន ទៅក្នុងបញ្ជីចងចាំពិភពលោករបស់យូនេស្កូ។ នៅក្នុងសេចក្តីថ្លែងការណ៍របស់ខ្លួន ក្រសួងការបរទេស ជប៉ុនបានចាត់ទុកការចុះបញ្ជីឯកសាររបស់ចិន ទៅក្នុងបញ្ជីកេរមរតករបស់យូណេស្កូគឺជារឿងគួរឲ្យសោកស្តាយ
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៩
ក្រសួងការបរទេសជប៉ុនបានចេញសេចក្តីថ្លែងការណ៍ មួយ នៅថ្ងៃសៅរ៍ ដើម្បីតវ៉ាទៅអង្គការយូនេស្កូ ដែលកាលពីថ្ងៃ សុក្រ បានសម្រេចជាផ្លូវការ ចុះឯកសារទាក់ទងនឹងការសម្លាប់រង្គាលនៅណានជីង ទៅក្នុងបញ្ជីកេរមរតនៃការចងចាំពិភពលោករបស់យូនេស្កូ។
ក្រសួងការបរទេសជប៉ុនសំដែងការតវ៉ារបស់ខ្លួន ដោយលើកហេតុផលថា ឯកសារទាក់ទងនឹងការសម្លាប់រង្គាលនៅណានជីង គឺជាឯកសារដែលចិនបានបង្កើតឡើង ជាឯតោភាគី គឺគ្មានបានពិគ្រោះអ្វី ជាមួយជប៉ុនដែលជាភាគីមួយដែរ នៅក្នុង ព្រឹត្តិការណ៍នៅណានជីង។ លើសពីនោះ ជប៉ុននៅបានវាយតម្លៃថា ឯកសារនោះគឺមិនពេញលក្ខណៈ និងគ្មានការផ្ទៀងផ្ទាត់ភាពត្រឹមត្រូវ។
ជប៉ុនបានចូលឈ្លានពានចិន តាំងពីឆ្នាំ ១៩៣០ និងបានបើកការប្រយុទ្ធខ្លាំង នៅឆ្នាំ ១៩៣៧ ដើម្បី ចូលកាន់កាប់ទីក្រុងណានជីង។ តាមឯកសាររបស់រដ្ឋាភិបាលចិន មនុស្ស ប្រមាណ ៣សែននាក់ បានស្លាប់ នៅក្នុងរយៈពេល តែ៦សប្តាហ៍ ដែលកងទ័ពជប៉ុនបានចូលឈ្លានពានទីក្រុងណានជីង។ ពួកគេត្រូវទាហានជប៉ុនកាប់សម្លាប់ និងរំលោភ ឆក់ប្លន់ យ៉ាងព្រៃផ្សៃបំផុត។ តាមអ្នកស្រាវជ្រាវសកលវិទ្យាល័យបរទេស ចំនួនជនរងគ្រោះ នៅណានជីង មានតិចជាងចំនួន ដែលកំណត់ដោយរដ្ឋាភិបាលចិន។ គេប៉ាន់ប្រមាណថា មានទាហានចិន ៤២០០០នាក់ ត្រូវបានកងទ័ពជប៉ុនសម្លាប់ ចំណែកស្រ្តី ជាង ២ម៉ឺននាក់ ត្រូវទាហានជប៉ុនចាប់រំលោភ ហើយពួកគេភាគច្រើនបានស្លាប់ នៅពេលបន្ទាប់មក។
នៅក្នុងឯកសារប្រវត្តិសាស្រ្តរបស់ខ្លួន ជប៉ុនមិនដែលទទួលស្គាល់ព្រឹត្តិការណ៍នៅណានជីង ថា ជាការសម្លាប់រង្គាលទេ។ ថ្មីៗនេះទៀត រដ្ឋាភិបាលជប៉ុន ទើបបានយល់ព្រមឲ្យចេញផ្សាយសៀវភៅសិក្សា សម្រាប់កូនក្មេងជប៉ុន ដែលនៅក្នុងនោះ ពាក្យ សម្លាប់រង្គាល នៅណានជីង ត្រូវជំនួសដោយពាក្យ សម្លាប់មនុស្ស ធម្មតាទៅវិញ។ ជំហររបស់តូក្យូបានដុតឲ្យមានកំហឹងតវ៉ាពីប្រទេសចិន ដែលបានចោទប្រកាន់រដ្ឋាភិបាលជប៉ុនបដិសេធ មិនធ្វើការលើការចងចាំ ស្តីពីការសម្លាប់មនុស្សដ៏សាហាវ ដែលបង្កឡើងដោយកងទ័ពជប៉ុន។
ការខ្វែងគំនិតគ្នា ពីរឿងប្រវត្តិសាស្រ្ត ជាពិសេស ការសម្លាប់រង្គាលនៅណានជីង គឺជាប្រភពតានតឹងរវាងចិន និងជប៉ុន ដែលកំពុងឈ្លោះ គ្នាផងដែរ ដណ្តើមដីកោះ នៅ សមុទ្រចិនខាងកើត។
ចាប់តាំងពីឆ្នាំ ២០១៤ ចិនបានធ្វើការតស៊ូមតិ ដើម្បីទាមទារឲ្យអង្គការយូនេស្កូ ចុះបញ្ជីឯកសារស្តីពីការសម្លាប់រង្គាលនៅណានជីង ទៅក្នុងបញ្ជីចងចាំពិភពលោករបស់អង្គការយូនេស្កូ។ ឯកសារមួយទៀត របស់ចិន ស្តីពីទាសករផ្លូវភេទដែលទាហានជប៉ុន ធ្វើទៅលើស្រ្តីនៅអាស៊ី នៅសម័យសង្រ្គាមលោកលើកទី ២ ដែល ចិន បានដាក់ស្នើព្រមគ្នា នឹងឯកសារទាក់ទងនឹងការសម្លាប់រង្គាល នៅណានជីង មិនត្រូវបានអង្គការយូនេស្កូ ចាត់ចូលក្នុងបញ្ជីកេរមរតក នោះទេ។
នៅក្នុងសេចក្តីថ្លែងការណ៍ កាលពីថ្ងៃសុក្រ លោកស្រី Irina Bokova អគ្គនាយិការអង្គការយូនេស្កូ បានបញ្ជាក់ថា កម្មវិធី ស្តីពីការចងចាំ របស់អង្គការយូនេស្កូ គឺមានទិសដៅ ថែរក្សា បេតិកភណ្ឌ និងឯកសារស្តីពីការចងចាំ សម្រាប់ជំនាន់មនុស្សបច្ចុប្បន្ន និងអនាគត។ គោលបំណងរបស់កម្មវិធីមានតែមួយ គឺ ជំរុញ ឲ្យមានការសហការ យោគយល់គ្នា និងការកសាងសន្តិភាព នៅក្នុងផ្នត់គំនិតរបស់បុរស និងស្រី្ត ក្នុងពិភពលោក។
ជប៉ុន៖ យូនេស្កូត្រូវគេប្រើជាឈ្នាន់នយោបាយ
ជប៉ុនបានតស៊ូមតិ ពីរឆ្នាំមកហើយ ដើម្បីបញ្ចុះបញ្ចូលគណៈកម្មាធិការទទួលបន្ទុកចុះបញ្ជីឯកសារ កុំឲ្យពិចារណាសំណើរបស់ចិន។ ប៉ុន្តែ គ្មានប្រយោជន៍ទេ ព្រោះគណៈកម្មាធិការមួយនេះ បានធ្វើការស្រាវជ្រាវ និងធ្វើការវិភាគល្អិតល្អន់ មុននឹងដាក់ស្នើឲ្យអគ្គនាយិការយូណេស្កូ សម្រេចយល់ព្រម ដាក់បញ្ចូលឯកសាររបស់ចិន ទៅក្នុងបញ្ជីចងចាំពិភពលោក។
នៅក្រោយពីរឆ្នាំ សិក្សាទៅលើសំណើមកពីប្រទេសជាង ៤០ គណៈអង្គការយូនេស្កូទើបតែសម្រេច នៅក្នុងអង្គប្រជុំមួយ ដែលធ្វើឡើង នៅប្រទេសអេមីរ៉ា អារ៉ាប់រួម នៅដើមសប្តាហ៍នេះ។ នៅថ្ងៃសុក្រ ទើប អង្គការយូនេស្កូ បានប្រកាសជាផ្លូវការ ចាត់បញ្ជូន ឯកសារចំនួន ៤៧ មកពីប្រទេសចំនួន ៤០ ទៅក្នុងបញ្ជី កេរមរតកឯកសារពិភពលោក ដែលនៅក្នុងនោះមានផងដែរ ឯកសារដែលទាក់ទងនឹងការសម្លាប់រង្គាលនៅណានជីង ដែលស្នើឡើង ដោយប្រទេសចិន។ គម្រោងស្តីពីការចុះឈ្មោះឯកសារស្តីពីការចងចាំពិភពលោករបស់អង្គការយូនេស្កូ ត្រូវបានបង្កើតឡើង នៅឆ្នាំ ១៩៩២។ រួមបញ្ចូលទាំងឯកសារចំនួន៤៧ ដែលយូនេស្កូ ចុះបញ្ចីកាលពីថ្ងៃ សុក្រ គម្រោងនេះមានឯកសារ និងបណ្ណសារសរុប ៣៤៨ មកពី ប្រទេសជុំវិញ ពិភពលោក។
នៅថ្ងៃសៅរ៍ ក្រសួងការបរទេសជប៉ុនបានចោទថា យូនេស្កូ មិនយុត្តិធម៌ លំអៀង និងមិនព្រមស្តាប់តាមការអំពាវនាវរបស់រដ្ឋាភិបាលជប៉ុន ដែលជាសមាជិកមួយដែររបស់យូនេស្កូនោះទេ។ ក្រសួងការបរទេសជប៉ុននៅបាននិយាយថែមទៀតថា ស្ថាប័នអង្គការសហប្រជាជាតិ ត្រូវបានគេចាប់បង្វិល យកទៅប្រើក្នុងហេតុផលនយោបាយ។ ការចោទប្រកាន់របស់ជប៉ុន គឺមិនពិតទាំងស្រុងទេ ព្រោះថា យូនេស្កូមិនបានលំអៀងទៅខាងណាទេ។
ជាក់ស្តែង នៅក្នុងចំណោម ឯកសារចំនួន ៤៧ ដែលយូនេស្កូ ចាត់ចូលក្នុងបញ្ជី ចងចាំពិភពលោក នៅថ្ងៃសុក្រ មានផងដែរ ឯកសារពីររបស់ប្រទេសជប៉ុន ដែលនៅក្នុងនោះ មានមួយ ជាឯកសារដែលនិយាយពីការចាប់ដាក់ឃុំ និងការចាប់ឲ្យធ្វើការបង្ខំ ដែលទាហានជប៉ុនរងគ្រោះ ក្នុងដៃរបស់ទាហានរុស្ស៊ី នៅស៊ីបេរី បន្ទាប់ពី ជប៉ុនចាញ់សង្រ្គាមលោកលើកទី២នោះ។ ជប៉ុនមិនអាចចោទយូនេស្កូ ថា អយុត្តិធម៌ ព្រោះថា ការចាប់ឈឺចាប់របស់ទាហានជប៉ុន នៅក្នុងជំរំ ធ្វើការដោយបង្ខំ នៅក្នុងតំបន់ដ៏ត្រជាក់ នៅស៊ីបេរី ក៏ត្រូវបានយូនេស្កូ យកទៅថែរក្សាជាសម្បត្តិ កេរមរតកពិភពលោកមួយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ