៦ សីហា ១៩៤៥-៦ សីហា ២០១៥៖ជប៉ុនប្រារព្ធខួបទី ៧០ឆ្នំានៃគ្រាប់បែកបរមាណូអាមេរិកំាង
៦ សីហា ១៩៤៥-៦ សីហា ២០១៥ ថ្ងៃនេះ ប្រទេសជប៉ុនបានរៀបចំពិធីរម្លឹកខួបទី ៧០ឆ្នំានៃការទម្លាក់គ្រាប់បែកបរមាណូលើទីក្រុងហ៊ីរ៉ូស៊ីម៉ាពីសំណាក់ទ័ពអាមេរិកំាងកាលពីថ្ងៃទី ៦ សីហា ឆ្នំា ១៩៤៥។ ៣ថ្ងៃក្រោយមក ពោលគឺនៅថ្ងៃទី ៩ សីហា ឆ្នំា ១៩៤៥ ដដែល ទ័ពអាមេរិកំាងក៏បានបានទម្លាក់គ្រាប់បែកបរិមាណូមួយគ្រាប់ទៀតទៅលើទីក្រុងណាហ្គាសាគី។ គ្រាប់បែកបរមាណូទំាង ២គ្រាប់បានសម្លាប់ប្រជារាស្រ្តភ្លាមៗ និងក្រោយមកសរុបជាង ២០ម៉ឺននាក់។ ៧០ឆ្នំាក្រោយមក ព្រឹត្តិការណ៍សកលលោកមួយនេះនៅបន្តតាមលងប្រជារាស្រ្តជប៉ុនជានិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៧
ព្រឹត្តិការណ៍កាលពី ៧០ឆ្នំាមុន ពិតជាព្រឹត្តការណ៍ប្រវត្តិសាស្រ្តមួយដែលពិភពលោក ពិសេសប្រជារាស្រ្តជប៉ុនមិនអាចបំភ្លេចបានទេ។ នៅថ្ងៃទី ៦ សីហា ឆ្នំា ១៩៤៥ វេលាម៉ោង ៨ និង១៥នាទីព្រឹក ម៉ោងក្នុងប្រទេសជប៉ុន ទ័ពអាមេរិកំាងបានទម្លាក់គ្រាប់បែកបរមាណូទីមួយទៅលើទីក្រុងហ៊ីរ៉ូស៊ីម៉ា ដោយបានផ្តាច់ជីវិតមនុស្សចំនួន ១៤ម៉ឺននាក់ ក្នុងនោះមាន ១០ម៉ឺននាក់បានស្លាប់ភ្លាមៗ។ គ្រាប់បែកបរមាណូទីមួយបានផ្ទុះនៅកំពស់ ៦០០ម៉ែត្រ ពីលើទីក្រុងហ៊ីរ៉ូស៊ីម៉ា ហើយកម្លំាងផ្ទុះរបស់វា គឺស្មើនឹងជាតិផ្ទុះ TNT ចំនួន ១៦ ០០០តោន និងដែលកម្រិតកំដៅនៅដីមានដល់ទៅ ៤ ០០០អង្សាសេ។
៣ថ្ងៃក្រោយមក ពោលនៅថ្ងៃទី ៩ សីហា ឆ្នំា ១៩៤៥ដដែល ទាហានអាមេរិកំាងក៏បានទម្លាក់គ្រាប់បែកបរមាណូមួយគ្រាប់ទៀតទៅលើទីក្រុង ណាហ្គាសាគី ដោយបានផ្តាច់ជីវិតមនុស្សប្រមាណជា ៧០ ០០០នាក់ថែមទៀត។ គឺគ្រាប់បែបបរិមាណូរបស់អាមេរិកំាងទំាងពីរគ្រាប់នោះឯងដែលបានបង្ខំជប៉ុនឲ្យទម្លាក់អាវុធចុះចាញ់សង្រ្គាមដោយគ្មានលក្ខខណ្ឌនៅថ្ងៃទី១៥ សីហា ឆ្នំា ១៩៤៥ ហើយសង្រ្គាមលោកលើកទី២ ក៏បានបិទបញ្ចប់តំាងពីថ្ងៃនោះមក។
ក៏ប៉ុន្តែ ៧០ឆ្នំា ក្រោយមក ព្រឹត្តិការណ៍នៅហ៊ីរ៉ូស៊ីម៉ា និងណាហ្គាសាគីបាន និងកំពុងបន្តតាមលងអារម្មណ៍របស់ប្រជារាស្រ្តជប៉ុនជាបន្តទៀត ព្រោះថា ឥទ្ធិពលរបស់គ្រាប់បែកបរិមាណូអាមេរិកំាងទំាង ២គ្រាប់កាលពី ៧០ឆ្នំាមុនបានបន្សល់ទុកនូវជនរងគ្រោះរាប់សិបម៉ឺននាក់ ដោយសារតែធាតុវិទ្យុសកម្ម និងរាប់សិបម៉ឺននាក់ផ្សេងទៀតត្រូវបានភ្លើង និងកំដៅគ្រាប់បែកបរមាណូដុតរោលខ្លួនប្រាណសឹងតែទំាងមូល។ ចំណែកទីក្រុងហ៊ីរ៉ូស៊ីម៉ា និងណាហ្គាសាគីក៏ត្រូវបានកម្លំាងគ្រាប់បែកបរមាណូបំផ្លាញខ្ទេចខ្ទី និងរាបធេង។
លោកអាបេ៖ជប៉ុនមានបេសកកម្មបង្កើតពិភពលោកមួយគ្មានអាវុធនុយក្លេអ៊ែរ
អ្នកទីក្រុងហ៊ីរ៉ូស្ហ៊ីម៉ា និងណាហ្គាសាគីដែលបានស្គាល់ព្រឹត្តិការណ៍កាលពី ៧០ឆ្នំាមុន និងដែលនៅមានជីវិតមកដល់សព្វថ្ងៃ ភាគច្រើនមានអាយុជាមធ្យម ៨០ឆ្នំា មានន័យថា ពួកគេនៅមានវ័យក្មេងខ្ចីនាពេលដែលស្រុកកំណើតបានទទួលចំហេះភ្លើងគ្រាប់បែកបរមាណូអាមេរិកំាង។ ទោះជាយ៉ាងនេះ សេចក្តីឈឺចាប់ខ្លោចផ្សា និងភាពក្តុកក្តួលបានកើតមាននៅក្នុងអារម្មណ៍របស់ប្រជារាស្រ្តជប៉ុនគ្រប់រូប និងគ្រប់ជំនាន់ ពិសេសអ្នករស់នៅក្នុងទីក្រុងហ៊ីរ៉ូស្ហ៊ីម៉ា និងណាហ្គាសាគី។
ពិធីបុណ្យដែលមានមនុស្សចូលរួមជាង ៥០ ០០០នាក់ត្រូវបានគេរៀបចំនៅសួនឧទ្យានសន្តិភាពសាងសង់ត្រង់កន្លែងគ្រាប់បែកបរមាណូធ្លាក់ក្នុងទីក្រុងហ៊ីរ៉ូស្ហ៊ីម៉ា។ នៅវេលាម៉ោង ៨ និង ១៥នាទីព្រឹកមិញដែលជាម៉ោងផ្ទុះគ្រាប់បែកបរិមាណូទី១ កាលពី ៧០ឆ្នំាមុន ពិធីបុណ្យបានចាប់ផ្តើមជាមួយនឹងសម្លេងជួង និងការគោរពវិញ្ញាណក្ខន្ធរយៈពេល ១នាទី។ បន្តិចក្រោយមក ចៅហ្វាយក្រុងហ៊ីរ៉ូស្ហ៊ីម៉ាលោក Kazumi Matsui ក៏បានឡើងថ្លែងសុន្ទរកថាដោយបានស្នើឲ្យបំបាត់អាវុធនុយក្លេអ៊ែរ និងបង្កើតឲ្យមានប្រព័ន្ធសន្តិសុខមួយដែលមិនពឹងពាក់លើកម្លំាងយោធា។
បន្ទាប់មកទៀត ជាវេនរបស់លោកនាយករដ្ឋមន្រ្តីជប៉ុនស្ហ៊ីនហ្សូ អាបេ។ នៅចំពោះមុខវត្តមានអ្នកតំណាងបរទេសមកពីប្រទេសជាង ១០០ក្នុងលោក លោកអាបេក៏បានប្រកាសពីជំហរប្រឆំាងនឹងអាវុធនុយក្លេអ៊ែរដែរ។ លោកអាបេបានបន្ថែមថា ក្នុងនាមជាប្រទេសរងគ្រោះដោយអាវុធនុយក្លេអ៊ែរ ជប៉ុនមានបេសកកម្មជាអ្នកបង្កើតពិភពលោកមួយគ្មានអាវុធនុយក្លេអ៊ែរ និងមានតួនាទីជាអ្នកពន្យល់ប្រាប់មនុស្សគ្រប់ជំនាន់លើលោកអំពីអមនុស្សធម៌របស់អាវុធនុយក្លេអ៊ែរ។ សម្រាប់លោកអាបេ មនុស្សជាអ្នកបង្កើតឲ្យមានសោកនាដកម្មនុយក្លេអ៊ែរកាលពី ៧០ឆ្នំាមុន ហើយគឺមនុស្សជាអ្នករងគ្រោះដោយខ្លួនឯង។
តើជប៉ុនពិតជាអ្នករងគ្រោះដោយអយុត្តិធម៌ពីអាវុធនុយក្លេអ៊ែរ និងមានឆន្ទៈបោះបង់ចោលនុយក្លេអ៊ែរទំាងស្រុងមែន ឬ?
អ្វីដែលច្បាស់ ទីក្រុងហ៊ីរ៉ូស្ហ៊ីម៉ា និងណាហ្គាសាគីពិតជាបានភ្លួករសជាតិគ្រាប់បែកបរមាណូអាមេរិកំាង។ តែសំណួរដែលគ្រប់គ្នាកំពុងចោទសួរនោះគឺថា ហេតុអ្វីបានជាអាមេរិកប្រើគ្រាប់បែកបរិមាណូទម្លាក់លើទឹកដីជប៉ុនកាលពី ៧០ឆ្នំាមុន។ តើប្រជារាស្រ្តជប៉ុនក្នុងទីក្រុងហ៊ីរ៉ូស្ហ៊ីម៉ា និងណាហ្គាសាគីមិនមែនជាអ្នកទទួលរងថ្មបាក់ដោយសារតែនយោបាយយោធានិយមរបស់រដ្ឋាភិបាលខ្លួននាសម័យនោះទេ ឬយ៉ាងណា។ ចូរកុំភ្លេចថា អន្តរាគមន៍យោធាអាមេរិកំាងលើប្រទេសជប៉ុនបានធ្វើឡើង ចំពេលដែលទាហានជប៉ុនកំពុងវាតទីចូលកាន់កាប់តំបន់អាស៊ី។
តំាងពីពេលនោះមក ជប៉ុនបានប្រកាន់យកនូវរដ្ឋធម្មនុញ្ញសន្តិភាពនិយម ពោលសន្សំតែសុខ។ តែឥឡូវនេះ និង៧០ឆ្នំា ក្រោយការបិទបញ្ចប់សង្រ្គាមលោកលើកទី២ មក លោកនាយករដ្ឋមន្រ្តីជប៉ុនអាបេបានបង្កើតចេញនូវច្បាប់សន្តិសុខថ្មីមួយដែលផ្ទុយនឹងរដ្ឋធម្មនុញ្ញ។ ច្បាប់សន្តិសុខថ្មីនោះនឹងអនុញ្ញាតឲ្យទាហានជប៉ុនអាចចូលអន្តរាគមន៍ជាមួយកម្លំាងអន្តរជាតិនៅក្នុងជម្លោះពិភពលោក។ អ៊ីចឹងហើយបានជាច្បាប់សន្តិសុខថ្មីរបស់លោកអាបេពេលនេះបានទទួលការប្រឆំាងយ៉ាងខ្លំាងក្លាពីសំណាក់អ្នកសន្តិភាពនិយមដោយពួកគេយល់ឃើញថា នឹងធ្វើឲ្យកើតមានសោកនាដកម្មសង្រ្គាមជាថ្មីនៅក្នុងប្រទេសជប៉ុន។
ក្រៅពីច្បាប់សន្តិសុខថ្មីនោះ លោកអាបេក៏ចង់ឲ្យដាក់ឲ្យដំណើរការឡើងវិញនូវមជ្ឈមណ្ឌលនុយក្លេអ៊ែរទំាងអស់ដើម្បីផលិតភ្លើងអគ្គិសនី។ គួរជម្រាបជូនថា នៅក្រោយគ្រោះថ្នាក់នៅមជ្ឈមណ្ឌលនុយក្លេអ៊ែរ Fukushima កាលពីឆ្នំា ២០១១ ជប៉ុនបានសម្រេចផ្អាកដំណើរការមជ្ឈមណ្ឌលនុយក្លេអ៊ែរទំាងអស់របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ