ជប៉ុន-អូស្រ្តាលី៖តូក្យូសន្យាបញ្ជូនបច្ចេកវិទ្យានាវាមុជទឹកឲ្យកង់បេរ៉ា
ជប៉ុនកំពុងព្យាយាមដណ្តើមយកកុងត្រាសាងសង់នាវាមុជទឹកសម័យថ្មីឲ្យប្រទេសអូស្រា្តលី។ សារព័ត៌មានអូស្រ្តាលីបានទម្លាយព័ត៌មានឲ្យដឹងនៅថ្ងៃចន្ទ ទី៨ កុម្ភៈនេះថា ជប៉ុនដែលកំពុងប្រជែងជាមួយប្រទេសផ្សេងបានសន្យានឹងបញ្ជូនបច្ចេកវិទ្យានាវាមុជទឹកជប៉ុនដ៏ទំនើបទៅឲ្យរដ្ឋាភិបាលអូស្រ្តាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
គឺនៅក្នុងកាសែតអូស្រ្តាលីមួយឈ្មោះ The Australian ដែលលោកអនុរដ្ឋមន្រ្តីក្រសួងការពារជាតិជប៉ុនកេនហ្ស៊ី វ៉ាកាមីយ៉ាបានបញ្ជាក់ថា ជប៉ុនបានចែករំលែកបច្ចេកវិទ្យានាវាមុជទឹករបស់ខ្លួនប្រភេទ Soryu ឲ្យអាមេរិកតែម្នាក់គត់ និងថា ការដែលជប៉ុនយល់ព្រមចែកឲ្យអូស្រា្តលីពេលនេះ មកពីទីក្រុងតូក្យូចាត់ទុកទីក្រុងកង់បេរ៉ាជាសម្ព័ន្ធមិត្តដែលគួរឲ្យជឿទុកចិត្ត។ ពាក្យជឿទុកចិត្តដែលលោករដ្ឋមន្រ្តីការពារជាតិជប៉ុនចង់បញ្ជាក់គឺថា អូស្រ្តាលីនិងមិនទម្លាយបច្ចេកវិទ្យានាវាមុជទឹកជប៉ុនទៅឲ្យអ្នកផ្សេងទេ។
លោកកេនហ្ស៊ី វ៉ាកាមីយ៉ាបានបន្ថែមថា វាពិតជាសំខាន់ណាស់ដែលជប៉ុនយល់ព្រមចែករំលែកបច្ចេកវិទ្យាដ៏សំខាន់របស់ខ្លួនទៅឲ្យអូស្រ្តាលី និងថា ទង្វើរបស់ក្រុងតូក្យូរបៀបនេះជាសក្ខីកម្មមួយដែលបញ្ជាក់ពីការសន្យារបស់ជប៉ុនក្នុងការរក្សាស្ថិរភាពនៅក្នុងតំបន់។ នាដំណាច់ឆ្នាំ ២០១៥ កន្លងទៅ គឺរូបលោករដ្ឋមន្រ្តីក្រសួងការពារជាតិជប៉ុនហ្កេន ណាកាតាគីដែលបានអះអាងត្រង់ៗដោយមិនលាក់លៀមថា ជម្រើសយកជប៉ុនឲ្យសាងសង់នាវាមុជទឹកនឹងចូលរួមរក្សាសន្តិសុខនៅក្នុងតំបន់អាស៊ីប៉ាស៊ីហ្វិកប្រឈមនឹងមហិច្ឆតារបស់ចិន។
សូមជម្រាបជូនថាសព្វថ្ងៃនេះ មានប្រទេសចំនួន ៣ គឺបារាំង អាល្លឺម៉ង់ និងជប៉ុនដែលបាន និងកំពុងបន្តបញ្ចេញមន្តស្នេហ៍ចែចង់ ចង់បានកុងត្រាសាងសង់នាវាមុជទឹកឲ្យអូស្រ្តាលីដែលមានទឹកប្រាក់យ៉ាងច្រើនសម្បើម គឺជិត ៣ ២០០លានអឺរ៉ូប។ រដ្ឋាភិបាលទីក្រុងកង់បេរ៉ាចង់ប្តូរពីនាវាមុជទឹកសព្វថ្ងៃដែលដើរដោយប្រេងម៉ាស៊ូត និងភ្លើងអគ្គិសនីទៅជានាវាមុជទឹកសម័យថ្មីដែលបំពាក់ដោយគ្រឿងអេឡិចត្រូនិចទំនើបៗ។
សព្វថ្ងៃ នីតិវិធីនៃការដេញថ្លៃ និងការប្រជែងគ្នាកំពុងបន្តរវាងប៉ារីស ប៊ែរឡាំង និងតូក្យូ។ តែអ្វីដែលទីក្រុងកង់បេរ៉ាកំពុងចង់បានពេលនេះ គឺចង់ឲ្យដំណើរការសាងសង់នាវាមុជទឹកមួយភាគនឹងត្រូវធ្វើឡើងនៅក្នុងទឹកដីអូស្រ្តាលីដើម្បីផ្តល់ការងារឲ្យពលរដ្ឋ និងក្រុមហ៊ុនអូស្រ្តាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ