ភូមា៖មេទ័ពចេញមុខសន្យារក្សាស្ថិរភាពប្រទេសឆ្ពោះទៅកាន់លទ្ធិប្រជាធិបតេយ្យ
នៅថ្ងៃអាទិត្យ ទី២៧ មីនានេះ ប្រទេសភូមាបានប្រារព្ធទិវាកងទ័ពដោយមានការរៀបចំក្បួនព្យុះហយាត្រាជាប្រពៃណីយ៉ាងអធិកអធម។ នៅក្នុងក្បួនព្យុះហយាត្រារៀបចំក្នុងទីក្រុងណាំពីដ៏ រដ្ឋាភិបាលបានបង្ហាញឲ្យឃើញនូវកម្លាំងកងទ័ពគ្រប់ផ្នែក ព្រមទាំងគ្រឿងសព្វាវុធគ្រប់ប្រភេទ មានទាំងគ្រាប់មីស៊ីល រថក្រោះ យន្តហោះចម្បាំង និងឧទ្ធម្ភាគចក្រ។ នាឱកាសពិធីដ៏ឱឡារិកថ្ងៃនេះ មេទ័ពដ៏មានឥទ្ធិពលឧត្តមសេនីយមីន អ៊ុងឡាងបានសន្យារក្សាប្រទេសនៅក្នុងដំណើរផ្លូវឆ្ពោះទៅកាន់លទ្ធិប្រជាធិបតេយ្យ។ ការប្តេជ្ញាចិត្តរបស់មេទ័ពរូបនេះបានធ្វើឡើង ប៉ុន្មានថ្ងៃមុនរដ្ឋាភិបាលថ្មីដឹកនាំដោយគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជីចូលកាន់អំណាច។ តែលោកស្រីអ៊ុង សានស៊ូជីមិនមានវត្តមាននៅក្នុងក្បួនព្យុះហយាត្រាក្នុងថ្ងៃនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៤
នៅក្នុងទិវាកងទ័ពថ្ងៃនេះ លោកស្រីប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យអ៊ុង សានស៊ូជីមិនមានវត្តមានចូលរួមទេ។ គ្មានប្រភពណាមួយអាចបញ្ជាក់ពីអវត្តមានរបស់លោកស្រីទេ ហើយរូបលោកស្រីផ្ទាល់ក៏មិនបានប្រាប់ដែរ។ តែមានការលើកឡើងនូវហេតុផលចំនួន ៣ ទី១ អាចថាលោកស្រីមិនត្រូវបានគេអញ្ជើញឲ្យចូលរួម និងទី២ លោកស្រីត្រូវបានគេអញ្ជើញឲ្យចូលរួមដែរ តែមិនអាចទៅបាន ដោយជាប់រវល់ និងទី៣ អាចថាលោកស្រីអ៊ុង សានស៊ូជីហាក់ដូចជានៅមិនទាន់អាចបន្សាំបានទៅនឹងស្ថានការណ៍ផ្លាស់ប្តូរនៅភូមាដែលស្គាល់តែការដឹកនាំដោយអំណាចផ្តាច់ការយោធាជាងកន្លះសតវត្សកន្លងទៅ។
អ្វីដែលលោកស្រីអ៊ុង សានស៊ូជីពិបាកបំភ្លេចបាននោះ គឺអនុស្សវរីយ៍ដ៏ល្វីងជូរចត់ដែលលោកស្រីត្រូវបានរបបសឹកជាប់ឃុំក្នុងគេហដ្ឋានអស់រយៈពេលជិត ២ទសវត្ស។ គួររម្លឹកជូនថា គឺទើបតែនៅក្នុងខែវិច្ឆិកា ឆ្នាំ ២០១០ ទេដែលលោកស្រីទទួលបានសេរីភាពពេញលេញឡើងវិញ និងដែលការតស៊ូរបស់លោកស្រីបានរុញគណបក្សសម្ព័ន្ធជាតិដើម្បីលទ្ធិប្រជាធិបតេយ្យឲ្យទទួលបានជោគជ័យយ៉ាងភ្លូកទឹក ភ្លូកដីនាការបោះឆ្នោតសភាកន្លងទៅ។ នៅថ្ងៃទី១ មេសាខាងមុខ គណបក្សសម្ព័ន្ធជាតិដើម្បីលទ្ធិប្រជាធិបតេយ្យនឹងចូលកាន់អំណាច ហើយរូបលោកស្រីអ៊ុងសានស៊ូជីដែលកំពុងមានតួនាទីជាតំណាងរាស្រ្តនឹងត្រូវក្លាយជារដ្ឋមន្រ្តីក្រសួងការបរទេស។
កងទ័ពបន្តដើរតួនាទីសំខាន់នៅក្នុងឆាកនយោបាយភូមា
អ្វីជាការកត់សម្គាល់នៅក្នុងទិវាកងទ័ពថ្ងៃនេះ គឺការថ្លែងរបស់មេទ័ពដ៏មានឥទ្ធិពលឧត្តមសេនីយមីន អ៊ុងឡាង។ លោកមីន អ៊ុងឡានបានថ្លែងនាឱកាសនោះដោយសន្យាថា នឹងចូលរួមរក្សាស្ថិរភាពរបស់ប្រទេសនៅក្នុងដំណើរផ្លូវឆ្ពោះទៅកាន់លទ្ធិប្រជាធិបតេយ្យ។ នៅក្នុងប្រទេសណាមិនដឹងទេ តែនៅក្នុងប្រទេសភូមា កងទ័ពកំពុងបន្តមានតួនាទីសំខាន់ណាស់នៅក្នុងឆាកនយោបាយ។
ពិតណាស់ថា ទោះបីជាអំណាចប្រធានាធិបតី និងអំណាចរដ្ឋាភិបាលស្ថិតក្នុងកណ្តាប់ដៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជីក៏ដោយ ក៏រដ្ឋាភិបាលថ្មីត្រូវការសម្លេងគាំទ្រពីស្ថាប័នកងទ័ពដោយចៀសមិនរួច។ ចូរកុំភ្លេចថា នៅក្នុងចំនួនអសនៈទំាង ៤៤០ ដែលមាននៅក្នុងសភាភូមា មានអសនៈ ១ភាគ៤ស្ថិតក្នុងកណ្តាប់ដៃកងទ័ពជាស្វ័យប្រវត្តិដោយគ្មានឆ្លងកាត់ការបោះឆ្នោតទេ។
មួយវិញទៀត មានក្រសួងសំខាន់ចំនួន ៣ គឺក្រសួងមហាផ្ទៃ ក្រសួងការពារជាតិ និងក្រសួងទទួលបន្ទុកកិច្ចការព្រំដែនស្ថិតក្រោមការកាន់កាប់របស់កងទ័ព មានន័យថា ស្ថាប័នកងទ័ពជាអ្នកជ្រើសរើសរដ្ឋមន្រ្តីក្រសួងទាំង ៣ នេះ។ ដូច្នេះនៅក្នុងកាលៈទេសសព្វថ្ងៃ រដ្ឋាភិបាលថ្មីដឹកនាំដោយគណបក្សសម្ព័ន្ធជាតិដើម្បីលទ្ធិប្រជាធិបតេយ្យគ្មានជម្រើសអ្វី ក្រៅពីរួមសហការណ៍ជាមួយកងទ័ព។
ការជ្រៀតជ្រែកពីកងទ័ព ជាឧបសគ្គក្នុងសម័យអន្តរកាល
យ៉ាងណាក៏ដោយ ការបន្តលូកដៃរបស់កងទ័ពនៅជាឧបសគ្គនៅក្នុងដំណើរផ្លូវឆ្ពោះទៅកាន់លទ្ធិប្រជាធិបតេយ្យរបស់ភូមា។ កងទ័ពគួរតែស្ថិតឲ្យឆ្ងាយពីឆាកនយោបាយ តែប្រហែលជាពិបាកបន្តិចសម្រាប់ភូមាដែលឥទ្ធិពល និងចំហាយកងទ័ពបានចាក់ឫសយ៉ាងជ្រៅនៅក្នុងសង្គមអស់ជាច្រើនទសវត្ស។ សូមជម្រាបជូនថា គឺទើបតែនៅក្នុងឆ្នាំ ២០១១ ទេដែលរបបសឹកបានប្រកាសរំលាយខ្លួនឯង ដោយបង្កើតរដ្ឋាភិបាលស៊ីវិលជំនួសវិញ។ តែថ្នាក់ដឹកនាំក្នុងរដ្ឋាភិបាលស៊ីវិលនោះ រួមទាំងលោកប្រធានាធិបតីថេន សេនផង គឺជាថ្នាក់ដឹកនាំក្នុងរបបសឹក ឬអាចនិយាយបែបម្យ៉ាងទៀតថា ដូរតែរដ្ឋាភិបាល តែអ្នកដឹកនាំជាមនុស្សដដែល។
នៅក្នុងទិវាកងទ័ពថ្ងៃនេះ មេទ័ពដ៏មានឥទ្ធិពលឧត្តមសេនីយមីន អ៊ុងឡាងបានថ្លែងសារភាពពីឧបសគ្គដែលជាគ្រោះថ្នាក់សម្រាប់ភូមានៅក្នុងសម័យអន្តរកាលឆ្ពោះទៅកាន់លទ្ធិប្រជាធិបតេយ្យ។ មានឧបសគ្គចម្បងចំនួនពីរដែលលោកមីន អ៊ុងឡាងបានលើកឡើង ទី១ ការមិនគោរពនិតិរដ្ឋ និងទី២ ការលូកដៃជ្រៀតជ្រែកពីកងទ័ព។ មេទ័ពដ៏មានឥទ្ធិពលរូបនេះបានបញ្ជាក់ច្បាស់ៗថា បើគេមិនអាចកំចាត់ឧបសគ្គទាំងពីរនេះបានទេ នោះដំណើរផ្លូវឆ្ពោះទៅកាន់លទ្ធិប្រជាធិបតេយ្យក៏ពិបាកនឹងសម្រេចបានដែរ។
តាមរយៈពាក្យសម្តីរបស់ឧត្តមសេនីយមីន អ៊ុងឡាងនាំឲ្យគេសន្និដ្ឋានបានថា លោកពិតជាមានបំណងឲ្យស្ថាប័នកងទ័ពដកខ្លួនឲ្យឆ្ងាយពីឆាកនយោបាយ។ យ៉ាងណាក៏ដោយកន្លងមក គ្រប់គ្នា រួមទាំងរូបលោកស្រីអ៊ុងសានស៊ូជីផងមានការប្រយ័ត្នប្រយែងខ្លាំងចំពោះការលើកឡើងរបស់គ្រប់ឥស្សរជនកងទ័ពដែលកំពុងមានអំណាច ឬបានចូលនិវត្តន៍។ ការប្រយ័ត្នប្រយែង ដោយសារតែមានមេរៀនជូរចត់ជាច្រើននៅអតីតកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ