ម៉ាឡេស៊ី ថៃ និងឥណ្ឌូណេស៊ី សន្យាជួបគ្នាដើម្បីដោះស្រាយបញ្ហាជនភៀសខ្លួន
រដ្ឋមន្រ្តីការបរទេសម៉ាឡេស៊ី ថៃ និង ឥណ្ឌូណេស៊ី បានបញ្ជាក់ឲ្យដឹងនៅថ្ងៃនេះថា ប្រទេសទាំងបី នឹងជួបពិភាក្សាគ្នា ក្នុងរយៈពេលប៉ុន្មានថ្ងៃទៀត ដើម្បីស្វែងរកដំណោះស្រាយ ជុំវិញបញ្ហាជនភៀសខ្លួនមកពីភូមា និងបង់ក្លាដែស។ ជនភៀសខ្លួនដែលបន្តនាំគ្នាមកតាមទូក មានចំនួន ៣ពាន់នាក់ដែលបានមកដល់គោក តាមឆ្នេរប្រទេសថៃ និងម៉ាឡេស៊ី បន្តែនៅមានចំនួនជាច្រើនទៀត ដែលកំពុងតែអណ្តែតត្រសែតក្នុងសមុទ្រ ខ្វះស្បៀងអាហារ និង ទឹកសាបបរិភោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ជនភៀសខ្លួន ដើមកំណើតរ៉ូហ៊ីងយ៉ាស មកពីប្រទេសភូមា និងប្រទេសបង់ក្លាដែស បានបន្តផ្សងជីវិតតាមទូក ឆ្លងមកកាន់ភាគខាងត្បូងប្រទេសថៃ នឹងប្រទេសម៉ាឡេស៊ី។ គិតមកត្រឹមពេលនេះ មានជនភៀសខ្លួនចំនួនប្រហែល ៣ពាន់នាក់ហើយ ដែលត្រូវបានស្រង់មកដល់ដីគោក និងអ្នកខ្លះ បានហែលទឹកសមុទ្រមកដល់ឆ្នេរ។ ប៉ុន្តែនៅមានជនភៀសខ្លួន រាប់ពាន់នាក់ផ្សេងទៀត ដែលកំពុងតែរស់យ៉ាងវេទនាបំផុត នៅលើទូក ដែលរសាត់អណ្តែតតាមរលកសមុទ្រ គ្មានម្ហូបអាហារ និងទឹកសាបបរិភោគ អស់ជាច្រើនសប្តាហ៍មកហើយ។
បន្ទាប់ពីរងការរិះគន់ជាច្រើនថា នៅឈរទ្រឹងអោបដៃមើល ប្រទេសថៃ ម៉ាឡេស៊ី និងឥណ្ឌូណេស៊ី ទើបបានផ្លាស់ប្តូរឥរិយាបថ ដោយរដ្ឋមន្រ្តីការបរទេសប្រទេសទាំងបី បានសន្យាថានឹងជួបនិយាយគ្នា ដើម្បីរកដំណោះស្រាយ។ តាមការផ្តល់ដំណឹង ជាបឋម រដ្ឋមន្រ្តីការបរទេសម៉ាឡេស៊ី និងជួបជាមួយរដ្ឋមន្ត្រីការបរទេសឥណ្ឌូណេស៊ី នៅថ្ងៃចន្ទស្អែក ហើយនឹងជួបរដ្ឋមន្រ្តីការបរទេសថៃ នៅថ្ងៃពុធ ទី ២០ឧសភា។ នេះជាដំណឹងល្អមួយ សម្រាប់ជនភៀសខ្លួនដ៏អភ័ព្វ ដែលកំពុងតែស្វែងរកទីជ្រកកោន។ គួររំលឹកដែរថា កាលពីប៉ុន្មានថ្ងៃមុននេះ ថៃនិង ម៉ាឡេស៊ី បានប្រកាសព្រមគ្នាថា គេនឹងរុញទូកចេញ មិនឲ្យជនភៀសខ្លួនទាំងនោះ ឡើងគោកលើទឹកដីគេទេ។
សូមបញ្ជាក់ថា ជនភៀសខ្លួន រ៉ូហ៊ីងយ៉ាស ដែលមកពីភូមា គឺជាអ្នកកាន់សាសនាអ៊ីស្លាម ដែលត្រូវបានក្រុមជ្រុលនិយមកាន់សាសនាព្រះពុទ្ធនៅភូមា ធ្វើទុក្ខបុកម្នេញ ជាច្រើនឆ្នាំមកហើយ។ ក្នុងចំណោមក្រុមជនជាតិភាគតិចនេះ ក៏មានលាយឡំផងដែរ នូវជនជាតិបង់ក្លាដែស ដែលក្រីក្រលំបាក ហើយប៉ងប្រាថា្នទៅរស់នៅលើទឹកដីម៉ាឡេស៊ី ដែលជាប្រទេសធូរធាជាងគេក្នុងតំបន់ និងកាន់សាសនាអ៊ីស្លាមដូចគ្នា។ បន្ទាប់ ពីអាជ្ញាធរថៃ បានចេញយុទ្ធនាការប្រមាញ់ក្រុមឈ្មួញដែលរកស៊ី ដឹកជញ្ជូន និងឃុំឃាំងជនភៀសខ្លួន បានធ្វើឲ្យពួកជនទុច្ចរិតទាំងនោះ រត់បែកខ្ចាត់ខ្ចាយ ទុកឲ្យជនភៀសខ្លួនផ្សងវាសនាតាមទូក ដែលគ្មាននរណាបើកបរ។
ភូមាដែលជាប្រទេសដើម នៃទុរគ៌តជនទាំងនោះ បានប្រកែកដោយឥតអៀនខ្មាសថា គេមិនទទួលដឹងឮរឿងនេះទេ។ ជនភៀសខ្លួនរត់ទៅដល់ស្រុកណា ស្រុកនោះជាអ្នកដោះស្រាយ។ មិនត្រឹមតែប៉ុណ្ណោះ ភូមាបានប្រកាសថា បើប្រទេសផ្សេងទៀត នៅតែទាមទារ ចង់ឲ្យភូមាដោះស្រាយបញ្ហានេះ ភូមានឹងមិនមកចូលរួមប្រជុំអាស៊ាន ដែលនឹងធ្វើឡើងនៅប្រទេសថៃ នៅចុងខែឧសភានេះ ជាដាច់ខាត៕
{{ scope.legend }}
© {{ scope.credits }}ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ