Mike Pompeo ថាអាមេរិក ត្រូវតែហ៊ានប្រឈមតតាំងជាមួយបក្សកម្មុយនីស្តចិន
កាលពីយប់ថ្ងៃពុធ ទី៣០តុលា នៅក្នុងកម្មវិធីរាត្រីស្រមោលសមួយ រៀបចំដោយ Hudson Institute នៅទីក្រុងញូយ៉ក លោក Mike Pompeo រដ្ឋមន្ត្រីការបរទេសអាមេរិក បានលើកឡើងថា គណបក្សកុម្មុយនីស្តចិន មានមហិច្ឆតាធំណាស់ គឺចង់គ្រប់គ្រងពិភពលោក ហើយអាមេរិក ត្រូវតែហ៊ានប្រឈមមុខ តតាំងជាមួយចិន ដើម្បីការពារតម្លៃនៃលិទ្ធិសេរីនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
វិទ្យាស្ថានHudson ដែលជាបណ្តុំនៃអ្នកស្រាវជ្រាវវិភាគ មានទំនោរអភិរក្សនិយមនៅអាមេរិក បានរៀបចំកម្មវិធីរាត្រីស្រមោលសប្រចាំឆ្នាំរបស់ខ្លួន ដោយបានអញ្ជើញលោក Mike Pompeo រដ្ឋមន្ត្រីការបរទេសអាមេរិក ទៅចូលរួមផងដែរ។ នៅក្នុងសន្ទរកថា របស់លោក Pompeo លោកបាននិយាយសង្កត់ខ្លាំង រិះគន់រដ្ឋាភិបាល និងបក្សកម្មុយនីស្តចិន។
លោក Mike Pompeo លើកឡើងថា អាមេរិក មានសមានចិត្តស្រលាញ់រាប់អានប្រជាជនចិនណាស់ ក៏ប៉ុន្តែអាមរិក ត្រូវតែប្រយ័ត្នជាមួយនឹង រដ្ឋាភិបាលចិន ដែលស្ថិតក្រោមការកាន់កាប់ របស់គណបក្សកុម្មុយនីស្តចិន ព្រោះបក្សនេះជាបក្សដែលដើរតាមទ្រឹស្តី ម៉ាក្ស-ឡេនីន ហើយដែលមានមហិច្ឆតាត្រួតត្រាពិភពលោក។
រដ្ឋមន្ត្រីការបរទេសអាមេរិក បន្ថែមថា បក្សកម្មុយនីស្តចិនស្អប់សហរដ្ឋអាមេរិកណាស់ ហើយបានប្រើប្រាស់គ្រប់វិធី ដើម្បីបង្កបញ្ហា ប្រជែងជាមួយអាមេរិក ក៏ដូចជាបង្កបញ្ហាលំបាកផ្សេងៗ ឲ្យដល់ពិភពលោក។ ដូច្នេះ យើងទាំងអស់ ត្រូវតែរួមគ្នា ហ៊ានតតាំង ប្រឈមមុខជាមួយអំណាចបក្សកុម្មុយនីស្តចិន។ លោកបន្តថា អំណេះតទៅ យើងមិនអាចបដិសេធ មិនទទួលស្គាល់បានទេ ថាប្រព័ន្ធដឹកនាំនយោបាយឬសេដ្ឋកិច្ច រវាងអាមេរិក និងចិន មានលក្ខណៈផ្ទុយគ្នាកម្រិតណា។ ហើយយើងក៏ត្រូវទទួលស្គាល់ដែរ ថាភាពផ្ទុយគ្នានេះ វាអាចជះផលអាក្រក់កម្រិតណា ដល់សន្តិសុខជាតិអាមេរិក។ ជាចុងក្រោយ លោក Mike Pompeo បានលើកឡើង ពីគ្រោះថ្នាក់ទាក់ទិន នឹងការបង្កើនសមត្ថភាពសព្វាវុធ របស់កងទ័ពចិន នារយៈពេល១០ឆ្នាំចុងក្រោយនេះ។
គួរកត់សំគាល់ថា សម្តីរិះគន់វាយប្រហារចិនដោយចំៗ របស់លោករដ្ឋមន្ត្រីការបរទេសអាមេរិកនេះ គឺធ្វើឡើងចំពេល ដែលអាមេរិក និងចិន កំពុងប្រុងប្រៀបចុះហត្ថលេខាជាមួយគ្នា លើកិច្ចព្រមព្រៀងមួយ ដើម្បីបិទបញ្ចប់សង្រ្គាមពាណិជ្ជកម្ម។ ចំណេកកាលពីសប្តាហ៍មុន លោក Mike Pence អនុប្រធានាធិបតីអាមេរិក ក៏បាននិយាយរិះគន់ចិនដែរ ទាក់ទិននឹងបញ្ហាគោរពសិទ្ធិមនុស្ស។ លោក Mike Pence បានរិះគន់ផងដែរ អំពីរបៀបធ្វើជំនួញស៊ីខ្សែលើរបស់ចិន ព្រមទាំងវិធីសាស្ត្ររបស់ចិន ក្នុងការច្បាម ពង្រីកឥទ្ធិពលនៅតាមប្រទេសនានា។
ដោយឡែក លោកCui Tiankai ឯកអគ្គរដ្ឋទូតចិន ប្រចាំសហរដ្ឋអាមេរិក ធ្លាប់បានព្រមានថា អាជ្ញាធរចិន មិនអាចអត់ឱនឲ្យមានការប្រមាថមើលងាយ ឬការរិះគន់មកលើគណបក្សកុម្មុយនីស្តចិនបានទេ ព្រោះគណបក្សកុម្មុយនីស្តចិន គឺជាស្ថាប័នកំពូល ដែលប្រជាជនចិនទាំងមូល គោរពជឿជាក់ដោយឥតងៀករេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ