មីយ៉ាន់ម៉ា សម្រេចចិត្តជួយជនអន្តោប្រវេសន៍តាមទូក
ជនអន្តោប្រវេសន៍រាប់រយនាក់ ត្រូវបានជួយសង្គ្រោះឲ្យឡើងលើគោក ក្នុងប្រទេសឥណ្ឌូនេស៊ី នៅថ្ងៃពុធនេះ បន្ទាប់ពីមីយ៉ាន់ម៉ា បានផ្តល់ជំនួយជាម្ហូបអាហារ និងទឹក ជាលើកដំបូង ដល់ពួកគេ។ ការប្រកាសខ្លួនក្នុងសកម្មភាពមនុស្សធម៌របស់មីយ៉ាន់ម៉ា ធ្វើឡើង ខណៈដែលប្រទេសមួយចំនួន ក្នុងតំបន់អាស៊ីអាគ្នេយ៍ បានជួបពិភាក្សាគ្នា និងក៏បន្ទាប់ពីអង្គការសហប្រជាជាតិ ទើបចេញមុខព្រមាន ពីវិបត្តិជនអន្តោប្រវេសន៍តាមទូកក្នុងតំបន់នេះ។ គួរជម្រាបថា មីយ៉ាន់ម៉ា ជាប្រទេសមួយ ដែលកន្លងមករងការរិះគន់ខ្លាំងជាងគេ ក្នុងការទទួលខុសត្រូវ ចំពោះរឿងជនអន្តោប្រវេសន៍ខុសច្បាប់នេះ។
ចុះផ្សាយនៅថ្ងៃ៖
ស្តាប់ - ០១:៥០
តាមរយៈសេចក្តីថ្លែងការណ៍ពីក្រសួងការបរទេសមីយ៉ាន់ម៉ា បានឲ្យដឹងថា មីយ៉ាន់ម៉ា នឹងចូលរួមជាមួយសហគមន៍អន្តរជាតិ ហើយបាននឹងកំពុងត្រៀមខ្លួន ក្នុងសកម្មភាពមនុស្សធម៌ ដើម្បីជួយជនអន្តោប្រវេសន៍ ដែលកំពុងអណ្តែតត្រសែត លើផ្ទៃសមុទ្រនោះ។ ការប្រកាសជួយនេះ គឺបន្ទាប់ពីអង្គការសហប្រជាជាតិ ទើបបានព្រមានពីការមិនយកចិត្តទុកដាក់ របស់ប្រទេសក្នុងតំបន់អាស៊ាន ចំពោះបញ្ហាចំនួនជនអន្តោប្រវេសន៍រាប់ពាននាក់ នៅលើសមុទ្រនោះ។ ប្រទេសក្នុងតំបន់អាស៊ាន កន្លងមក បានរុញទូកដឹកជនអន្តោប្រវេសន៍ឲ្យគ្នាទៅវិញទៅមក ដោយទុកបណ្តោយឲ្យពួកគេត្រូវប្រឈមមុខនឹងគ្រោះថ្នាក់ដល់អាយុជីវិត។
មីយ៉ាន់ម៉ា កន្លងមកមិនសូវជាចេញមុខអើពើ ចំពោះបញ្ហាដែលអាស៊ានកំពុងប្រឈមនេះទេ ទោះបីជាឬសគល់នៃជនអន្តោប្រវេសន៍មួយចំនួនធំ ចេញមកពីប្រទេសខ្លួនក៏ដោយ។ ជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម ប្រមាណជិត ៣ពាន់នាក់ ត្រូវបានគេឲ្យដឹងថា គឺចេញមកពីប្រទេសមីយ៉ាម៉ា និងបង់ក្លាដេស។ ចំណាកស្រុកផ្សងព្រេងដ៏គ្រោះថ្នាក់ ក្នុងសមុទ្រ បេហ្គាល របស់ពួកគេនេះ គឺដើម្បីគេចផុតពីភាពក្រីក្រ។ ពួកគេទាំងនោះ បានព្យាយាម ធ្វើដំណើរទៅកាន់ ប្រទេសឥណ្ឌូនេស៊ី ថៃ និងម៉ាឡេស៊ី។
គណបក្សរបស់លោកស្រីអ៊ុង សានស៊ូជី បានចេញមុខនៅថ្ងៃអង្គារ អំពាវនាវឲ្យមីយ៉ាន់ម៉ា គោរពសិទ្ធិជនជាតិភាគតិចរ៉ូហ៊ីងយ៉ា ដែលអ.ស.ប ចាត់ទុកថា ជាជនជាតិភាគតិច ដែលកំពុងទទួលរងនូវការធ្វើ ទុក្ខបុកម្នេញខ្លាំងជាងគេបំផុត នៅលើពិភពលោក។
គួរជម្រាបជូនថា អង្គការសហប្រជាជាតិ និងសហរដ្ឋអាមេរិក បានអំពាវនាវឲ្យប្រទេសក្នុងតំបន់អាស៊ាន បើកកំពង់ផែទទួលទូកអន្តោប្រវេសន៍ទាំងនោះសិន ជាជាងការផ្តល់តែម្ហូបអាហារ និងទឹក ឲ្យទៅឲ្យពួកគេនៅក្នុងសមុទ្រនោះ។ ជាមួយគ្នានោះ ឧត្តមស្នងការអ.ស.បទទួលបន្ទុកសិទ្ធិមនុស្ស និងជនភៀសខ្លួន ក៏បានចេញសេចក្តីថ្លែងការណ៍រួមគ្នាមួយ អំពាវនាវឲ្យថៃ ម៉ាឡេស៊ី ឥណ្ឌូណេស៊ី ក៏ដូចជាអាស៊ានទាំងមូល ផ្តោតអាទិភាពទៅលើការជួយសង្រ្គោះជនអន្តោប្រវេសន៍ ដែលកំពុងរសាត់ តាមទូកនេះសិន រួចហើយចាំពិនិត្យមើលថាតើពួកគេគួរទទួលបានសិទ្ធិជាជនភៀសខ្លួនដែរឬអត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ