ម្ចាស់ជំនួយត្អូញពីភាពយឺតយ៉ាវ និងសំណុំបែបបទច្រើនជ្រុលរបស់អាជ្ញាធរនេប៉ាល់
គ្រោះរញ្ជួយដីដ៏កាចសាហាវ ដែលបានកើតឡើងក្នុងប្រទេសនេប៉ាល់ កាលពីថ្ងៃ ទី ២៥ មេសាកន្លងទៅ បានសម្លាប់មនុស្ស ចំនួន ជាង៧ពាន់នាក់ហើយ បើយោងតាមតួលេខបណ្តោះអាសន្ន គិតត្រឹមថ្ងៃអាទិត្យទី ៣ឧសភានេះ។ ចាប់ពីនេះតទៅ អាជ្ញាធរនេប៉ាល់ បានផ្តល់អាទិភាព ដល់ការបញ្ជូនជំនួយស្បៀងអាហារ ដល់ប្រជាជនដែលបាត់បង់ផ្ទះសម្បែងនិងរងរបួសវិញ។ តែទោះជាយ៉ាងណា ក្រុមអង្គការអន្តរជាតិ ដែលបានបញ្ជូនជំនួយយ៉ាងសន្ធឹកសន្ធាប់ ទៅជួយនេប៉ាល់ បានត្អូញត្អែរថា ជំនួយទាំងអស់ ត្រូវកកស្ទះនៅក្នុងព្រលានយន្តហោះ ដោយសារតែអាជ្ញាធរនេប៉ាល់ ធ្វើការត្រួតពិនិត្យយឺតយ៉ាវ និងត្រូវបំពេញសំណុំបែបបទ ច្រើនជ្រុលហួសហេតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៧
ឈប់រកអ្នកបាត់ខ្លួន មកជួយអ្នករបួសនិងអ្នកគ្មានផ្ទះសម្បែងវិញម្តង៖
កាលពីភ្លាមៗ ក្រោយហេតុការណ៍រញ្ជួយដី អ្វីដែលត្រូវធ្វើជាបន្ទាន់ គឺជួយកកាយយកមនុស្សដែលជាប់ក្នុងគំនរបាក់បែក មុននឹងវាយឺតពេល។ ប៉ុន្តែមកដល់ពេលនេះ គេគ្មានសង្ឃឹមថាអ្នកដែលនៅជាប់ក្នុងគំនរអាគារ នៅមានជីវិតរស់ទៀតទេ។ ហេតុដូចនេះហើយ បានជា អាជ្ញាធរនេប៉ាល់ បានផ្លាស់ប្តូរទិសដៅ គឺធ្វើយ៉ាងណា ប្រមូលកម្លាំង ដើម្បីដឹកជញ្ជូនជំនួយទៅជួយអ្នកដែលនៅរស់វិញ។
អ្នករបួសមានច្រើនណាស់ គឺជាង ១ម៉ឺន៤ពាន់នាក់។ ផ្ទះដែលរលំបាក់ខ្ទេចតែម្តងនោះ មានចំនួន១៦ម៉ឺនខ្នង ឯណោះ។ ដូច្នេះ អ្នកដែលគ្មានផ្ទះសម្បែងគឺច្រើនមែនទែន។ មួយវិញទៀត នៅតាមភូមិដាច់ស្រយ៉ាល លើភ្នំខ្ពស់ៗ នៅមិនទាន់មានក្រុមសង្រ្គោះទៅដល់ទេ ដោយសារផ្លូវថ្នល់ត្រូវខូចខាត ហើយមានភ្លៀងធ្វើឲ្យរអិលទៀត។ ដូច្នេះ ប្រជាជននេប៉ាល់ ទាំងអ្នករបួស ទាំងអ្នកមិនរបួស កំពុងរងចាំជំនួយ ជាបន្ទាន់។
ការងារបន្ទាន់មានពីរ ក្នុងពេលនេះ គឺ ទីមួយព្យាបាលអ្នករបួស ដែលមានចំនួន ជាង ១ម៉ឺន៤ពាន់នាក់ ហើយទីពីរ គឺបញ្ជូនស្បៀងអាហារ ដំបូលតង់ត៍ និងទឹកស្អាត ដល់អ្នកដែលបាត់បង់ផ្ទះសម្បែង បើសរុបទាំងអស់ មានច្រើនលាននាក់ណាស់។ អ្នកខ្លះផ្ទះមិនបានរលំមែន ប៉ុន្តែ គ្មាននរណាហ៊ាននៅក្នុងផ្ទះទេ ដោយសារវាមានស្នាមប្រេះ អាចរលំសង្កត់គ្រប់ពេលវេលា។ ដូច្នេះហើយហើយ បានជាគ្រប់គ្នា នាំគ្នា មកនៅតាមផ្លូវ តាមទីវាល ហាលភ្លៀងហាលខ្យល់។
បញ្ហាទឹកស្អាត និងបង្គន់អនាម័យ គឺជារឿងបន្ទាន់សំខាន់ណាស់ ព្រោះថា បើគ្មានទឹកស្អាត និងបង្គន់អនាម័យប្រើប្រាស់ ប្រជាជនដែលរស់នៅតាមទីវាលទាំងអស់នេះ ជាពិសេសគឺក្មេងៗតែម្តង នឹងប្រឈមមុខនឹងជំងឺឆ្លង ដូចជាជំងឺអាសន្នរោគជាដើម។ ហេតុដូច្នេះហើយបានជា ជំនួយសង្រ្គោះដល់ប្រជាជនទាំងនោះ ត្រូវតែធ្វើឲ្យបានឆាប់រហ័សជាទីបំផុត។ ប៉ុន្តែបើតាមយើងសង្កេតមើលទៅ អាជ្ញាធរនេប៉ាល់ ចាត់ចែងកិច្ចការទាំងនេះ មានភាពយឺតយ៉ាវនិងត្រដាបត្រដួសណាស់។
គយនេប៉ាល់ឆែកឆេរជំនួយយ៉ាងតឹងរឹង ធ្វើការយឺត ហើយត្រូវបំពេញឯកសារច្រើនជ្រុល៖
ជំនួយបរទេស ដែលមានជាអាទិ៍ស្បៀងអាហារ ថ្នាំពេទ្យជាដើម មួយចំនួនធំត្រូវកកកុញ ក្នុងព្រលានយន្តហោះ មិនទាន់ត្រូវបានគេបញ្ជូន ទៅចែកចាយនៅឡើយទេ។ លោកស្រី វ៉ាឡេរី អាម៉ូស ប្រធានចាត់ចែងក្រុមបេសកកម្មមនុស្សធម៌ របស់អង្គការសហប្រជាជាតិ បានសម្តែងការព្រួយបារម្ភថា បើនៅតែអញ្ចឹងទៀត ប្រជាជនដែលកំពុងតែរងចាំជំនួយ ច្បាស់ជាត្រូវដាច់ពោះស្លាប់ជាមិនខានទេ។ លោកស្រី បានបញ្ជាក់ថា ជំនួយបរទេស ដែលមកដល់តាមយន្តហោះ ត្រូវបានគយនេប៉ាល់ឆែកឆេរ យ៉ាងតឹងរឹង ហើយត្រូវបំពេញសំណុំបែបបទ និងឯកសារច្រើនណាស់ ដែលទាំងអស់នេះហើយ ត្រូវចំណាយពេលយូរ ព្រោះថា ជំនួយមានមកពីសឹងតែគ្រប់ប្រទេស ហើយមានច្រើនតោនណាស់។
ខាងអង្គការសហប្រជាជាតិ រួមទាំងអង្គការក្រៅរដ្ឋាភិបាលផ្សេងទៀត ដែលកំពុងតែធ្វើការនៅនេប៉ាល់ បានសំណូមពរទៅលោកនាយករដ្ឋមន្រ្តីនេប៉ាល់ ថា សុំឲ្យជួយសម្រួលបញ្ហានេះ ដើម្បីធ្វើយ៉ាងណាឲ្យជំនួយឆាប់បានទៅដល់ដៃ ប្រជាជនរងគ្រោះ។ ខាងរដ្ឋាភិបាលនេប៉ាល់ បានសន្យាថានឹង កែរលម្អបញ្ហានេះដែរ តែគេកំពុងចាំសង្កេតមើលថា តើអាជ្ញាធរនេប៉ាល់ នឹងធ្វើបានដូចសម្តីខ្លួន រឺយ៉ាងណា។
បន្ថែមពីការងារយឺតយ៉ាវរបស់អាជ្ញាធរនេប៉ាល់ នៅព្រលានយន្តហោះ លោកនាយកព្រលានយន្តហោះ ទើបតែបានហាមនៅថ្ងៃអាទិត្យនេះ ថាយន្តហោះដែលមានទំងន់លើស ១៩៦តោន គឺមិនឲ្យចុះចតទេ ព្រោះខ្លាចធ្វើឲ្យខូចវាលចុះឡើងរបស់យន្តហោះ ដែលកំពុងតែមិនសូវមាំស្រាប់ទៅហើយ ដោយសារការរញ្ជួយដី។
អ្នកទេសចរណ៏បរទេសស្លាប់ និងបាត់ខ្លួនច្រើន៖
គ្រាន់តែភ្លាមៗ មួយថ្ងៃក្រោយថ្ងៃរញ្ជួយដី គេបានផ្តល់ដំណឹងថា មានអ្នកឡើងភ្នំទឹកកក ១៨នាក់បានស្លាប់ ដោយសារផ្ទាំងទឹកកករមៀសសង្កត់លើ។ នៅថ្ងៃនេះដែរ គេបានរកឃើញសាកសពមនុស្ស ចំនួន ៥១នាក់ទៀត ក្នុងតំបន់ភ្នំមួយ ឈ្មោះថា តំបន់ Langtang។ ក្នុងចំណោមនោះ មាន៦នាក់ ជាជនបរទេស តែគេមិនទាន់បានកំណត់អត្តសញ្ញាណ ឈ្មោះ និងសញ្ជាតិនោះទេ។ អ្នកផ្សេងទៀត អាចជាអ្នកភូមិ និងក្រុមមគុទេសទេសចរណ៍ ដែលនាំភ្ញៀវទៅលេងម្តុំនោះ។
តំបន់ Langtang នេះ ជាតំបន់នៅក្បែរចំណុចស្នូលកណ្តាល ដែលផែនដីប្រេះរញ្ជួយ កាលពីថ្ងៃ២៥មេសា។ ហេតុដូច្នេះហើយ ទើបបានការខូចខាត អាចធ្ងន់ធ្ងរជាងតំបន់នានា។ បញ្ហាលំបាកត្រង់ថា តំបន់នេះ ជាតំបន់ភ្នំ ដែលមានកំពស់ ពី ៣ពាន់ ទៅ ៥ពាន់ម៉ែត្រឯណោះ។ អ្នកទេសចរណ៍បរទេស ដែលជាអ្នកចូលចិត្តដើរឡើងភ្នំ គេចូលចិត្តតំបន់នេះណាស់។ នៅកន្លែងដែលគេរកឃើញសាកសពមនុស្សទាំង ៥១នាក់ នៅមានបរទេសជាងមួយរយនាក់ទៀតបាត់ខ្លួន។ ក្រៅពីនោះ គេបានជួយសង្គ្រោះមនុស្ស ៣៥០នាក់ ដែលពាក់កណ្តាល សុទ្ធសឹងជាពួកទេសចរណ៍អ្នកដើរភ្នំ។
គិតមកត្រឹមពេលនេះ មានអ្នកទេសចរណ៍បរទេស ចំនួន៥៤នាក់ ដែលបានស្លាប់នៅនេប៉ាល់ ហើយដែលត្រូវគេកំណត់អត្តសញ្ញាណបានត្រឹមត្រូវ។ ប៉ុន្តែ នៅមានពួកទេសចរណ៍អ្នកដើរភ្នំ ច្រើននាក់ណាស់ដែលបាត់ខ្លួន។ ភាគច្រើន ជាជនជាតិអឺរ៉ុប ដែលតាមការស្មាន ប្រហែលជាជាង១ពាន់នាក់។ គ្រាន់តែជាជនជាតិបារាំង ដែលបាត់ខ្លួននៅនេប៉ាល់ មាន១៥៩នាក់។ ជនជាតិបារាំងដែលគេដឹងថាស្លាប់ប្រាកដនោះ មានបួននាក់ហើយ ប៉ុន្តែចំនួននេះ អាចកើនឡើងទៀត ព្រោះថា ពួកគេបាត់ខ្លួន ជិត១០ថ្ងៃហើយ ដូច្នេះសង្ឃឹមរស់ មានតិចណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ