កូរ៉េខាងជើងបានបាញ់គ្រាប់មីស៊ីលជាថ្មី ទោះបីទទួលទ័ណ្ឌកម្មអន្តរជាតិ
កូរ៉េខាងជើងបន្តផ្គើនសហគមន៍អន្តរជាតិដោយបានធ្វើការបាញ់សាកល្បងជាថ្មីនូវគ្រាប់មីស៊ីលចម្ងាយជិតចំនួន ៥គ្រាប់នៅថ្ងៃចន្ទ ទី២១ មីនានេះ។ សេនាធិការដ្ឋានកូរ៉េខាងត្បូងបានប្រកាសឲ្យដឹងនៅក្នុងសេចក្តីជូនដំណឹងរបស់ខ្លួនថា គ្រាប់មីស៊ីលទាំងនោះត្រូវបានបាញ់ចេញពីប៉ែកខាងត្បូងនៃស្រុកហាំហ៊ុង និងហោះបានចម្ងាយ ២០០គីឡូម៉ែត្រ មុននឹងធ្លាក់ចូលក្នុងសមុទ្រជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ជារឿងមួយច្រំដែល តែការដែលកូរ៉េខាងជើងបាន និងកំពុងបន្តធ្វើការសាកល្បងនុយក្លេអ៊ែរ ឬមួយក៏បាញ់សាកល្បងគ្រាប់មីស៊ីលចម្ងាយជិត ឆ្ងាយបានបង្កឲ្យបរិយាកាសនៅក្នុងឧបទ្វីបកូរ៉េមិនល្អទាល់តែសោះ។ គ្រាន់តែនៅ ៣ខែដើមឆ្នាំ ២០១៦ នេះ របបក្រុងព្យុងយ៉ាងបានធ្វើការសាកល្បងនុយក្លេអ៊ែរ និងបាញ់គ្រាប់មីស៊ីលចំនួន ៤ដង ក្នុងថ្ងៃទី៦ មករា ថ្ងៃទី៧ កុម្ភៈ ថ្ងៃទី១៨ មីនា និងនៅថ្ងៃចន្ទ ទី២១ មីនានេះ។ គ្រាប់មីស៊ីលបាញ់ថ្ងៃនេះត្រូវបានគេដឹងថាជាគ្រាប់មីស៊ីលចម្ងាយជិត តែគេនៅមិនទាន់ដឹងពីប្រភេទគ្រាប់មីស៊ីលនោះនៅឡើយទេ។
យ៉ាងណាក៏ដោយ ទង្វើផ្គើនសហគមន៍អន្តរជាតិរបស់របបក្រុងព្យុងយ៉ាងប្រហែលជាមិនមែនចប់ត្រឹមនេះទេ ព្រោះមនុស្សខ្លាំងគឹម ជុនអ៊ុនធ្លាប់បានប្រកាសឲ្យដឹងពីគម្រោងធ្វើការបំផ្ទុះសាកល្បងនូវគ្រាប់ក្បាលនុយក្លេអ៊ែរនាពេលឆាប់ៗខាងមុខ។ ជាការពិត លើកណាក៏ដូចជាលើកណាដែរ ទង្វើផ្គើនសហគមន៍អន្តរជាតិរបស់កូរ៉េខាងជើងតែងតែទទួលបានការថ្កោលទោស និងដាក់ទ័ណ្ឌកម្មពីប្រទេសបស្ចិមលោកក៏ដូចពីសហគមន៍អន្តរជាតិ។ ជាក់ស្តែងនៅដើមខែមីនានេះ ក្រុមប្រឹក្សាសន្តិសុខអង្គការសហប្រជាជាតិបានដាក់ទ័ណ្ឌកម្មចាស់ដៃ ដោយរឹតត្បិតពាណិជ្ជកម្មផ្លូវសមុទ្រ និងការនាំចេញផលិតផលរ៉ែ។
នៅក្នុងការបាញ់សាកល្បងគ្រាប់មីស៊ីលជាថ្មីថ្ងៃនេះ ក្រុមប្រឹក្សាសន្តិសុខបានថ្កោលទោសជាថ្មី ដោយចាត់ទុកជាការរំលោភបំពានលើសេចក្តីសម្រេចចិត្តរបស់អន្តរជាតិ តែនៅមិនទាន់មានវិធានការថ្មីអ្វីទេ។ នៅកូរ៉េខាងត្បូងវិញ លោកស្រីប្រធានាធិបតីប៉ាក់ គុនហេដែលបានរួមប្រជុំក្រុមទីប្រឹក្សារបស់លោកស្រីថ្ងៃនេះបាននិយាយពីពេលវេលាស្លាប់រស់នៅក្នុងឧបទ្វីបកូរ៉េ។ ចំណែកអ្នកនាំពាក្យក្រសួងបង្រួបបង្រួមកូរ៉េនៅក្រុងសេអ៊ូលបានបញ្ជាក់ថា រដ្ឋាភិបាលក្រុងសេអ៊ូលបានត្រៀមខ្លួនគ្រប់បែបយ៉ាងដើម្បីប្រឈមទប់នឹងការសាកល្បងនុយក្លេអ៊ែរជាថ្មីរបស់កូរ៉េខាងជើងនាពេលឆាប់ៗខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ