តុលាការប៉ាគីស្ថានដោះលែងជនសង្ស័យជាមេក្លោងភេរវកម្មម្នាក់
មេក្លោងភេរវកម្មម្នាក់ ដែលត្រូវគេសង្ស័យថា ជាអ្នកបញ្ជាឲ្យធ្វើភេរវកម្មនៅក្រុងបុមបៃ កាលពីខែវិច្ឆិកា ឆ្នាំ២០០៨ ត្រូវបានតុលាការជាន់ខ្ពស់ក្រុង ឡាហរ របស់ប៉ាគីស្ថាន ធ្វើការដោះលែងឲ្យនៅក្រៅឃុំ ក្រោមការបង់ប្រាក់ធានា។ រឿងក្តីដ៏ចម្រូងចម្រាសនេះ ជាប្រភពដែលបានបន្ថែមការគំគួននឹងគ្នា កាន់តែខ្លាំងរវាងរដ្ឋាភិបាលប៉ាគីស្ថាន និងឥណ្ឌា ដែលកន្លងមក ឥណ្ឌាបានចោទប៉ាគីស្ថានថា ព្យាយាមការពារភេរវករ ដែលធ្លាប់បានធ្វើការវាយប្រហារនៅក្រុងបុមបៃ ប្រទេសឥណ្ឌា ហើយដែលធ្វើឲ្យមានមនុស្សស្លាប់ ជិត២០០នាក់។
ចុះផ្សាយនៅថ្ងៃ៖
ស្តាប់ - ០២:១០
ជនឈ្មោះ Zakiur Rehman Lakhvi អាយុ៥៥ឆ្នាំ ជាជនជាតិប៉ាគីស្ថាន។ ជននេះ ត្រូវជាប់ជាជនសង្ស័យ ថាជាមេក្លោង ដែលនៅពីក្រោយការធ្វើភេរវកម្មនៅក្រុងបុបបៃ ប្រទេសឥណ្ឌា កាលពីថ្ងៃទី ២៦ ខែវិច្ឆិកា ឆ្នាំ២០០៨។ ភេរវកម្មដ៏កាចសាហាវនេះ បានសម្លាប់ជិវិតមនុស្ស១៦៦នាក់ និងជាច្រើននាក់ទៀត រងរបួសធ្ងន់។
ឥណ្ឌាដែលជាប្រទេសរងគ្រោះ បានដាក់ការសង្ឃឹមយ៉ាងខ្លាំង ទៅលើតុលាការប៉ាគីស្ថាន ក្នុងការរកយុត្តិធម៌ជូនជនរងគ្រោះ។ ប៉ុន្តែនៅថ្ងៃព្រហស្បតិ៍ ទី ៩ មេសា តុលាការជាន់ខ្ពស់ប្រចាំក្រុងឡាហរ ភាគខាងកើតប៉ាគីស្ថាន បានធ្វើការដោះលែង ជនជាប់ចោទ ឲ្យនៅក្រៅឃុំ ដោយតម្រូវឲ្យជនជាប់ចោទ បង់ប្រាក់ធានាពីរលើក ដែលគិតជាសរុបមានចំនួន ប្រមាណជា ២ម៉ឺនដុល្លារ។
តាមពិតទៅ រឿងក្តីរបស់ជនសង្ស័យនេះ ត្រូវបានតុលាការប៉ាគីស្ថាន រុញចុះរុញឡើង ម្តងចាប់ដាក់ឃុំ ម្តងដោះលែង ជាច្រើនដងណាស់មកហើយ។ ជាក់ស្តែងកាលពីខែធ្នូឆ្នាំទៅ តុលាការបានសម្រេចដោះលែងជននេះ ប៉ុន្តែអាជ្ញាធរមូលដ្ឋាន បានសម្រេចមិនព្រមដោះលែង ដោយសារជននេះ មានប្រវត្តិជាមេក្រុមភេរវកម្មជ្រុលនិយម។ បន្ទាប់ពីមានអន្តរាគមន៍ពីរដ្ឋាភិបាលឥណ្ឌា សុំឲ្យចាប់ជននេះដាក់ឃុំ តុលាការប៉ាគីស្ថាន បានសម្រេចឃុំជនសង្ស័យទុក ហើយបន្ទាប់មក ក៏ដោះលែងវិញសាជាថ្មី។
សូមបញ្ជាក់ផងដែរថា ជនជាប់ចោទឈ្មោះ Zakiur Rehman Lakhvi ត្រូវបានឥណ្ឌាចោទថា ជាសមាជិកសកម្ម ក្នុងក្រុម Lashkar-e-Taïba ដែលជាផ្នែកមួយរបស់ក្រុមគេញសម្ងាត់ របស់ប៉ាគីស្ថាន។ ឥណ្ឌាសង្ស័យថា ក្រុមនេះ ជាអ្នកនៅពីក្រោយការធ្វើភេរវកម្ម ជាច្រើនលើកនៅឥណ្ឌា ដូចជាករណីភេរវកម្ម នៅក្រុងបុមបៃជាដើម។ ប៉ុន្តែតុលាការប៉ាគីស្ថានបានឆ្លើយតបមកវិញថា ឥណ្ឌាគ្មានភស្តុតាងណាច្បាស់លាស់ ដើម្បីធ្វើការដាក់កំហុស លើជនសង្ស័យនេះទេ។
ទោះបីជាយ៉ាងណា លោក Naveed Rasool អគ្គរដ្ឋអាជ្ញាប៉ាគីស្ថាន បានថ្លែងប្រាប់អ្នកយកព័ត៌មាន AFP ថា ក្រុមការងារលោក កំពុងតែស្វែងរកវិធី ដើម្បីចាត់សេចក្តីសម្រេចរបស់តុលាការទុកជាមោឃៈ។ គេមិនអាច ទុកមនុស្សដែលគេដឹងយ៉ាងច្បាស់ ថាធ្លាប់ចូលរួមជាមួយក្រុមភេរវកម្មដ៏សាហាវ ឲ្យនៅក្រៅឃុំដូច្នេះបានទេ។ ដោយឡែក រដ្ឋាភិបាលឥណ្ឌាបានសម្តែងការខកចិត្តយ៉ាងខ្លាំង ចំពោះសេចក្តីសម្រេចរបស់តុលាការប៉ាគីស្ថាន ហើយសេចក្តីសម្រេចនេះ នឹងរិតតែអុជកំហឹងរវាងប៉ាគីស្ថាននិងឥណ្ឌា ឲ្យនៅឆេះក្តៅងំតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ