ហេតុអ្វីបានជាប៉ាគីស្ថានបន្តអល់អែកក្នុងការគំាទ្រផ្លូវយោធាដល់អារ៉ាប៊ីសាអូឌីតនៅយេម៉ែន?
នៅប្រទេសប៉ាគីស្ថាន សភាបានផ្តើមជជែកក្នុងថ្ងៃចន្ទ ទី៦ មេសានេះលើសំណើរបស់ប្រទេសអារ៉ាប៊ីសាអូឌីតដែលបានសុំឲ្យរដ្ឋាភិបាលប៉ាគីស្ថានផ្តល់ជំនួយយោធានៅក្នុងអន្តរាគមន៍វាយប្រហារផ្លូវអាកាសលើក្រុមឧទ្ទាមហ៊ូទី្សក្នុងប្រទេសយេម៉ែន។ គឺជាអន្តរាគមន៍យោធាផ្លូវអាកាសដែលដឹកនំាដោយប្រទេសអារ៉ាប៊ីសាអូឌីតរួមជាមួយនឹងកម្លំាងសម្ព័ន្ធមិត្តអារ៉ាប់ចំនួន ១០ប្រទេសផ្សេងទៀត។ អ្វីជាការកត់សម្គាល់ អន្តរាគមន៍យោធារបស់សម្ព័ន្ធអារ៉ាប់ជាង ១០ថ្ងៃកន្លងទៅបានបណ្តាលឲ្យស្លាប់ជនស៊ីវិលកាន់តែច្រើន រីឯក្រុមឧទ្ទាមហ៊ូទី្សក៏កាន់តែមានឥទ្ធិពលកាន់តែខ្លំាងឡើងទៅវិញ។ ដោយឡែក អារ៉ាប៊ីសាអីឌីតទើបបានអនុញ្ញាតឲ្យអង្គការកាកបាទក្រហមអន្តរជាតិអាចដឹកជំនួយមនុស្សធម៌ទៅផ្គត់ផ្គង់ជនស៊ីវិលនៅយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៦
ការកោះប្រជុំសភាប៉ាគីស្ថាននៅថ្ងៃចន្ទនេះ គឺជាការកោះប្រជុំពិសេសមួយតាមសំណើរបស់លោកនាយករដ្ឋមន្រ្តីណាវ៉ា ស្ហារី្វដើម្បីជជែកដេញដោលជុំវិញសំណួរដែលថា តើប៉ាគីស្ថានគួរ ឬមិនគួរចូលរួមជាមួយកម្លំាងសម្ព័ន្ធមិត្តអារ៉ាប់ដឹកនំាដោយប្រទេសអារ៉ាប៊ីសាអូឌីតនៅក្នុងប្រតិបត្តិការវាយប្រហារលើក្រុមឧទ្ទាមហ៊ូទី្សនិកាយឈីអ៊ីតនៅក្នុងប្រទេសយេម៉ែន។ លោករដ្ឋមន្រ្តីក្រសួងការពារជាតិប៉ាគីស្ថានបានថ្លែងនៅក្នុងសភាថា អារ៉ាប៊ីសាអូឌីតបានសុំជំនួយយោធាជាកម្លំាងទ័ពថ្មើរជើង នាវាចម្បំាង និងយន្តហោះចម្បំាងពីប៉ាគីស្ថាន។ សភានៅមិនទាន់សម្រេចយ៉ាងណាទេ តែលោករដ្ឋមន្រ្តីការពារជាតិប៉ាគីស្ថានបានបង្ហើបឲ្យដឹងថាក្នុងកាលៈទេសៈសព្វថ្ងៃ ទីក្រុងអ៊ីស្លាម៉ាបាតចង់បានដំណោះស្រាយឲ្យវិបត្តិយេម៉ែនតាមផ្លូវនយោបាយ និងសន្តិវិធីជាជាងតាមផ្លូវយោធា។
ក្រៅពីប៉ាគីស្ថាន ប្រទេសតួកគីក៏កំពុងខ្នះខ្នែងស្វែងរកដំណោះស្រាយតាមផ្លូវនយោបាយឲ្យវិបត្តិយេម៉ែនដែរ។ នៅក្នុងបរិបទនេះ លោកប្រមុខការទូតអ៊ីរ៉ង់បានទៅទស្សនកិច្ចនៅតួកគី និងគ្រោងទៅប៉ាគីស្ថាននៅថ្ងៃពុធ ទី៨ មីនា។ ចំណែកលោកប្រធានាធិបតីតួកគីគ្រោងនឹងទៅអ៊ីរ៉ង់នៅថ្ងៃអង្គារ ទី៧ មីនា។ គួរបញ្ជាក់ជូនថា អ៊ីរ៉ង់ដែលជាប់ចោទពីបទគំាទ្រពួកឧទ្ទាមហ៊ូទី្សបានប្រឆំាងនឹងអន្តរាគមន៍យោធាដឹកនំាដោយអារ៉ាប៊ីសាអូឌីតនៅយេម៉ែន។ ដូច្នេះ ប៉ាគីស្ថាន និងតួកគីកំពុងចេញមុខយ៉ាងសកម្មក្នុងការស្វែងរកដំណោះស្រាយនយោបាយឲ្យវិបត្តិនៅយេម៉ែនសព្វថ្ងៃ។ តែប៉ាគីស្ថានបានប្តេជ្ញាចិត្តរួចហើយថា ខ្លួនស៊ូស្លាប់ដើម្បីជួយការពារបូរណភាពដែនដីអារ៉ាប៊ីសាអូឌីត បើសម្ព័ន្ធមិត្តរបស់ខ្លួនមួយនេះទទួលការគំរាមកំហែង។
ហេតុផលអ្វីបានជាប៉ាគីស្ថានចេញមុខការពារអារ៉ាប៊ីសាអូឌីតយ៉ាងផ្កាប់មុខរបៀបនេះ?
មានហេតុផលសំខាន់ពីរ ទី១ គឺជាការដឹងគុណ ឬនិយាយដោយសាមញ្ញថា ជាការសងគុណឲ្យគ្នាទៅវិញ ទៅមក។ គួររម្លឹកជូនថា ប៉ាគីស្ថានជាប្រទេសអ៊ីស្លាមតែមួយគត់លើលោកដែលមានបំពាក់អាវុធបរមាណូ និងក៏ជាប្រទេសមួយដែលមានចំនួនទ័ពច្រើនជាងគេ ពោលមានប្រមាណជា ១លាន ៥សែននាក់។ ប៉ាគីស្ថានជាអ្នកដែលបានផ្តល់បទពិសោធន៍ និងជំនាញយោធាឲ្យអារ៉ាប៊ីសាអូឌីតជាយូរលង់មកហើយ។ នៅក្នុងទសវត្សឆ្នំា ៦០ ប៉ាគីស្ថានបានជួយហ្វឹកហ្វឺនកងពីឡុតអារ៉ាប៊ីសាអូឌីត។ ក្នុងទសវត្សឆ្នំា ៨០ អារ៉ាប៊ីសាអូឌីតបានជួយចិញ្ចឹមចលនាម៉ូយ៉ៃឌីនដែលមានមូលដ្ឋានក្នុងទឹកដីប៉ាគីស្ថានដើម្បីប្រឆំាងនឹងការឈ្លានពានរបស់សហភាពសូវៀតនៅអាហ្វហ្កានីស្ថាន។ នៅក្នុងទសវត្សឆ្នំា ៩០ ប៉ាគីស្ថានបានចូលប្រឡូកក្នុងសង្រ្គាមនៅឈូងសមុទ្រពែរ្សដើម្បីការពារអារ៉ាប៊ីសាអូឌីតពីការឈ្លានពានជាយថាហេតុពីអ៊ីរ៉ាក់។
រហូតមកដល់សព្វថ្ងៃ អារ៉ាប៊ីសាអូឌីតបានបន្តលក់ប្រេងទៅឲ្យប៉ាគីស្ថានក្នុងតម្លៃថោកជាងគេ និងបានជួយលុយកាក់យ៉ាងច្រើនសម្បើមជារៀងរាល់ឆ្នំាដើម្បីជួយចិញ្ចឹមសេដ្ឋកិច្ចប៉ាគីស្ថាន។ គ្រាន់តែឆ្នំា ២០១៤ កន្លងទៅ ទីក្រុងរីយ៉ាដបានផ្តល់លុយឲ្យទីក្រុងអ៊ីស្លាម៉ាបាតដល់ទៅ ១ ៥០០លានដុល្លារ។ ចំណែកលោកនាយករដ្ឋមន្រ្តីប៉ាគីស្ថានណាវ៉ា ស្ហារី្វបច្ចុប្បន្ន ក៏ត្រូវបានអារ៉ាប៊ីសាអូឌីតទទួលឲ្យជ្រកកោនដែរ បន្ទាប់លោកស្ហារី្វត្រូវបានឧត្តមសេនីយប៉ាគីស្ថាន Pervez Musharraf ធ្វើរដ្ឋប្រហារយោធាទម្លាក់ពីអំណាចក្នុងឆ្នំា ១៩៩៩។
ចំណែកហេតុផលទី២ អាចថាជាហេតុផលសាសនា ព្រោះប៉ាគីស្ថានក៏ដូចជាអារ៉ាប៊ីសាអូឌីត គឺជាប្រទេសដែលសម្បូរដោយអ្នកកាន់សាសនាអ៊ីស្លាមនិកាយស៊ុយនីតរស់នៅ។ នៅក្នុងចំណោមប្រជាជនប៉ាគីស្ថានជិត ២០០លាននាក់ មាន ៨០% ជាអ្នកកាន់សាសនាអ៊ីស្លាមនិកាយស៊ុយនីត និង ២០% ជាអ្នកកាន់សាសនាអ៊ីស្លាមនិកាយឈីអ៊ីត។ ដូច្នេះ ប៉ាគីស្ថាន ជាប្រទេសកាន់សាសនាអ៊ីស្លាមនិកាយស៊ុយនីតលំដាប់ទី២ បន្ទាប់ពីអារ៉ាប៊ីសាអូឌីត និងក៏ជាប្រទេសកាន់សាសនាអ៊ីស្លាមនិកាយឈីអ៊ីតលំដាប់ទី២ បន្ទាប់ពីអ៊ីរ៉ង់។
ប៉ាគីស្ថានកំពុងស្ថិតលើស្ពានមួយដែលម្ខាងជាអ្នកជិតខាង និងម្ខាងជាអ្នកមានគុណលើខ្លួន
ទោះបីជាប៉ាគីស្ថាននៅមិនទាន់បានសម្រេចចិត្តជាផ្លូវការយ៉ាងណាចំពោះសំណើរបស់អារ៉ាប៊ីសាអូឌីតពេលនេះក៏ដោយ ក៏ទីក្រុងអ៊ីស្លាម៉ាបាតធ្លាប់បានចេញមុខប្រកាសជាផ្លូវការការពារ និងគំាទ្រអន្តរាគមន៍របស់អារ៉ាប៊ីសាអូឌីតនៅយេនម៉ែនតំាងតែពីថ្ងៃដំបូងមកម្ល៉េះ។ តែការដែលប៉ាគីស្ថានមិនទាន់សម្រេចចិត្តបញ្ជូនទ័ពទៅចូលរួមជាមួយអារ៉ាប៊ីសាអូឌីតពេលនេះមកពី ទី១ ខ្លួនត្រូវគិតពីផលវិបាកផ្ទែក្នុងដែលអាចទទួល នៅពេលដែលខ្លួនសម្រេចបញ្ជូនទ័ពទៅជួយអារ៉ាប៊ីសាអូឌីតដើម្បីកំចាត់ពួកឧទ្ទាមហ៊ូទី្សនិកាយឈីអ៊ីតនៅយេម៉ែន។ ផលវិបាកផ្ទៃក្នុងនោះ គឺកំណើនជម្លោះរវាងសហគមន៍អ្នកកាន់សាសនាអ៊ីស្លាមនិកាយស៊ុយនីត និងសហគមន៍អ្នកកាន់សាសនាអ៊ីស្លាមនិកាយឈីអ៊ីត។ ពួកឈីអ៊ីតនៅប៉ាគីស្ថានពិតជាមិនឃើញទាហានប៉ាគីស្ថានទៅសម្លាប់ពួកឈីអ៊ីតនៅយេម៉ែនទេ។
ជាទូទៅ សហគមន៍អ្នកកាន់សាសនាអ៊ីស្លាមនិកាយស៊ុយនីត និងឈីអ៊ីតនៅប៉ាគីស្ថានហាក់ដូចជាបានរស់នៅដោយសុខដុមរវាងគ្នា តែភាពតានតឹងក៏ច្រើនផ្ទុះឡើងនៅតាមតំបន់មួយចំនួន និងទី២ ប៉ាគីស្ថានក៏មិនចង់ធ្វើឲ្យអ៊ីរ់ង់ដែលជាប្រទេសជិតខាងខ្លួនអាក់អន់ស្រពន់ចិត្តដែរ។ ចូរកុំភ្លេចថា អ៊ីរ៉ង់កំពុងប្រឆំាងនឹងការវាយប្រហាររបស់អារ៉ាប៊ីសាអូឌីតនៅយេម៉ែន។ ដូច្នេះឃើញថា ប៉ាគីស្ថានកំពុងស្ថិតនៅលើស្ពានមួយដែលនៅម្ខាងជាអ្នកជិតខាង និងនៅម្ខាងទៀតជាសម្ព័ន្ធមិត្តដែលមានគុណច្រើនលើខ្លួន និងដែលខ្លួនត្រូវសងគុណវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ