នាយករដ្ឋមន្រ្តី ឥណ្ឌា និងប៉ាគីស្ថានព្រមព្រៀង រួមគ្នា ប្រយុទ្ធប្រឆាំងនឹងអំពើភេរវកម្ម
ឥណ្ឌា និងប៉ាគីស្ថាន ដែលជាបងប្អូនសត្រូវនឹងគ្នា អស់រាប់ទសវត្សរ៍មកហើយ បានបើកធ្វើជំនួបទ្វេភាគី នៅក្រៅក្របខ័ណ្ឌនៃជំនួបកំពូល នៅក្នុងទឹកដីរុស្ស៊ី។ នៅថ្ងៃសុក្រទី ១០ កក្កដា នាយករដ្ឋមន្រ្តីឥណ្ឌា លោកណារិនដ្រា ម៉ូឌី បានឆ្លើយយល់ព្រមទៅចូលរួម ក្នុងកិច្ចប្រជុំប្រទេសអាស៊ីខាងត្បូង ដែលប៉ាគីស្ថានរៀបចំធ្វើ នៅ ឆ្នាំ២០១៦។
ចុះផ្សាយនៅថ្ងៃ៖
ស្តាប់ - ០៦:១៦
ប្រមុខដឹកនាំឥណ្ឌា និងប៉ាគីស្ថាន បានជួបពិភាក្សា ទ្វេភាគី នៅក្រៅ ក្របខ័ណ្ឌ កិច្ចប្រជុំកំពូលនៃអង្គការសហប្រតិបត្តិការសៀងហៃ ដែលបើកធ្វើ នៅថ្ងៃសុក្រនេះ នៅទីក្រុងអ៊ូហ្វារ ប្រទេសរុស្ស៊ី។ កិច្ចប្រជុំកំពូលឆ្នាំនេះ កត់សំគាល់ដោយការចូលជាសមាជិករបស់ប្រទេសឥណ្ឌា និងប៉ាគីស្ថានទៅក្នុងអង្គការសហប្រតិបត្តិការសៀងហៃ ដែលបង្កើតឡើងដោយចិន និងរុស្ស៊ី និងប្រទេសអាស៊ីកណ្តាល៤ទៀត ក្នុងគោលដៅរក្សាសន្តិសុខនៅតាមព្រំដែនរវាងប្រទេសជិតខាង។
នាយករដ្ឋមន្រ្តីឥណ្ឌា លោកណារិនដ្រា ម៉ូឌីបានជួបនាយករដ្ឋន្រ្តីប៉ាគីស្ថាន ជាលើកទី១ នៅឆ្នាំ ២០១៤ នៅពេល នាយករដ្ឋមន្រ្តីប៉ាគីស្ថាន លោកណាវ៉ា ស្ហារីហ្វ ត្រូវបានអញ្ជើញ ឲ្យចូលរួម នៅក្នុងពិធីស្បថចូលកាន់តំណែងរបស់លោក ក្នុងក្រុងញូវដេលី។
តាមសេចក្តីថ្លែងការណ៍រួមគ្នា ដែលចេញផ្សាយ នៅក្រោយជំនួបទ្វេភាគី នៅថ្ងៃសុក្រ នាយករដ្ឋមន្រ្តីឥណ្ឌា បានយល់ព្រម ទៅតាមការអញ្ជើញ របស់នាយករដ្ឋមន្រ្តីប៉ាគីស្ថាន ទៅចូលរួមនៅក្នុងកិច្ចប្រជុំកំពូលប្រទេសអាស៊ីខាងត្បូង ដែលត្រូវរៀបចំធ្វើ នៅទីក្រុងអ៊ីស្លាម៉ាបាដ នៅឆ្នាំ២០១៦។ បើសិនលោកនាយករដ្ឋមន្រ្តីឥណ្ឌា ធ្វើដំណើរពិតមែនទៅប៉ាគីស្ថាន នោះវាជាលើកទីមួយ ក្នុងប្រវត្តិសាស្រ្ត ដែលនាយករដ្ឋមន្រ្តីឥណ្ឌា ធ្វើដំណើរទៅជាន់ទឹកដីប៉ាគីស្ថាន ដែលធ្លាប់ និងនៅតែជាប្រទេស សត្រូវ គ្រោះថ្នាក់របស់ឥណ្ឌា។
នៅក្នុងសេចក្តីថ្លែងការណ៍ រួមគ្នា ឥណ្ឌា និងប៉ាគីស្ថានបានព្រមព្រៀងគ្នា នឹងដោះស្រាយរាល់បញ្ហាខ្វែងគំនិតគ្នា ជាពិសេស ជម្លោះប្រដាប់អាវុធ នៅតាមព្រំដែនរវាងប្រទេសទាំងពីរ។ តាមអនុរដ្ឋមន្រ្តីការបរទេស ឥណ្ឌា ដែលជាអ្នកអានសេចក្តីថ្លែងការណ៍រួម លោកនាយករដ្ឋមន្រ្តីឥណ្ឌា និងប៉ាគីស្ថានបានយល់ស្របគ្នា ឲ្យមានកិច្ចប្រជុំថ្នាក់ក្រុមប្រឹក្សាសន្តិសុខជាតិ របស់ប្រទេសទាំងពីរ នៅទីក្រុងញូវដេលី ដើម្បីនិយាយពីការប្រយុទ្ធប្រឆាំងរួមគ្នានឹងអំពើភេរវនិយម។ ដើម្បីបង្ហាញសមានចិត្តនឹងគ្នា ទៅវិញ ទៅមក ឥណ្ឌា និងប៉ាគីស្ថាន បានប្រកាសថា នៅក្នុង១៥ទៀត គេនឹងដោះលែង ឲ្យមានសេរីភាព អ្នកនេសាទ ដែលប្រទេសទាំងពីរបានចាប់ដាក់ឃុំ រៀងខ្លួន ជាយូរមកហើយនោះ។
ក្នុងរយៈពេល ៦០ឆ្នាំ ឥណ្ឌា និងប៉ាគីស្ថាន មហាអំណាច នុយក្លេអ៊ែរ ធ្វើសង្រ្គាមបង្ហូរឈាមនឹងគ្នា បីដង និងនៅតែប្រឈមមុខដាក់គ្នា ដោយសារតំបន់ដ៏ចម្រូងចម្រាស់ កាស្មៀរ។
ឥណ្ឌាបានលុបចោលជំនួបជាច្រើន ជាមួយប៉ាគីស្ថាន ដោយសារតែបញ្ហាចម្រូងចម្រាសនៅតំបន់កាស្មៀរ។ នៅខែសីហា ឆ្នាំ២០១៤ រដ្ឋមន្រ្តីការបរទេសឥណ្ឌា បានលុបចោលដំណើរទស្សនកិច្ចទៅប៉ាគីស្ថាន បន្ទាប់ពីឥណ្ឌា រិះគន់ មិនពេញចិត្ត នឹងការដែលប្រមុខយោធាប៉ាគីស្ថាន ធ្វើដំណើរទៅជួបក្រុមឧទ្ទាមបះបោរ អ៊ីស្លាមជ្រុលនិយម ដែលឥណ្ឌា ចោទប្រកាន់ថា ជាក្រុមទាមទារផ្តាច់ទឹកដី នៅតំបន់កាស្មៀរ។
កាលពីថ្ងៃ ព្រហស្បតិ៍នេះទៀត គឺនៅមួយថ្ងៃ មុនដែលនាយករដ្ឋមន្រ្តីឥណ្ឌាជួបជាមួយនាយករដ្ឋមន្រ្តីប៉ាគីស្ថាន ការប្រយុទ្ធបានផ្ទុះឡើង នៅតំបន់កាស្មៀរ ដោយឥណ្ឌាបានចោទខ្មាន់កាំភ្លើង ប៉ាគីស្ថានថា ជាអ្នកបាញ់សម្លាប់ទាហានយាមព្រំដែនឥណ្ឌាម្នាក់។
ទំនាក់ទំនងការទូត ឥណ្ឌា និងប៉ាគីស្ថាន ត្រូវបានកាត់ផ្តាច់ នៅក្រោយ ព្រឹត្តិការណ៍ភេរវកម្ម សម្លាប់មនុស្ស ជាង ១៦០នាក់ នៅទីក្រុងប៊ុមបៃ ដែលភាគច្រើន ជាប្រជាជនឥណ្ឌា។ ឥណ្ឌាចោទ ទីភ្នាក់ងារស៊ើបការណ៍សម្ងាត់ប៉ាគីស្ថាន ថា ជាអ្នកនៅពីក្រោយក្រុមប្រដាប់អាវុធ ដែលធ្វើភេរវកម្ម នៅប៊ុមបៃ។ ប៉ាគីស្ថានបានបដិសេធ និងបានបង្ហាញភាពស្អាតស្អំរបស់ខ្លួន តាមរយៈ ការចាប់ឃុំខ្លួន មេគំនិត រៀបចំភេរវកម្មនៅប៊ុមបៃ Zaki ur-Rehman Lakhvi។ ឥណ្ឌា បានទាមទារឲ្យប៉ាគីស្ថានធ្វើបត្យាប័ន មេគំនិតធ្វើភេរវកម្ម ប៉ុន្តែ ប៉ាគីស្ថានវិញបដិសេធ ហើយមិនតែប៉ុណ្ណោះ នៅខែមេសាកន្លងទៅ តុលាការប៉ាគីស្ថានទើបបានសម្រេចដោះលែង មេភេរវជនZaki ur-Rehman Lakhvi ឲ្យនៅក្រៅឃុំ ដោយមានលក្ខខណ្ឌទៀត។ ជំហរមិនច្បាស់លាស់របស់ប៉ាគីស្ថាន ធ្វើឲ្យឥណ្ឌា លែងជឿទុកចិត្តលើការស្មោះត្រង់របស់ប៉ាគីស្ថាន។
លើសពីនោះ ទំនាក់ទំនងស្អិតល្មួត ប៉ាគីស្ថាន និងចិនដែលជាគូប្រជែងឥទ្ធិពល របស់ឥណ្ឌា នៅតំបន់អាស៊ី រឹតតែធ្វើឲ្យឥណ្ឌា នៅមិនស្រណុក ទាល់តែសោះ។ ថ្មីៗនេះ កងទ័ពឥណ្ឌាមិនលាក់ទេ ការព្រួយបារម្ភរបស់ខ្លួន បន្ទាប់ពីឃើញប៉ាគីស្ថានអនុញ្ញាតឲ្យនាវាមុជទឹក ចិនចូលចតជាងមួយសប្តាហ៍ ក្នុងដែនទឹករបស់ខ្លួន។ សម្រាប់ឥណ្ឌា វត្តមាននាវាមុជទឹកចិន នៅក្បែរចុងច្រមុះរបស់ឥណ្ឌាយ៉ាងដូច្នេះ គឺបញ្ជាក់ការគំរាមកំហែងរបស់ចិន យ៉ាងប្រាកដ ទៅលើសន្តិសុខជាតិឥណ្ឌា។
ប៉ាគីស្ថានវិញ ក៏មិននៅសុខស្រួលដែរ នៅពេលឃើញ មេដឹកនាំឥណ្ឌា ចេះតែទៅធ្វើទស្សនកិច្ច ផ្តល់ជំនួយ ដល់អាហ្វហ្កានីស្ថាន ដែលជាប្រទេសជិតខាងរបស់ប៉ាគីស្ថាន និងដែលប៉ាគីស្ថានចាត់ទុកថា ជាសំបុក ក្រុមភេរវជន ដែលគំរាមកំហែងសន្តិសុខប៉ាគីស្ថាន។
កាលៈទេសៈ ភូមិសាស្រ្តនិយោបាយ រុញបាគីស្ថាន និងឥណ្ឌា ឲ្យចូលតុចរចា
តាមអ្នកជំនាញខ្លះ បើគ្មានចិន និងអាមេរិក នោះ ឥណ្ឌា និងប៉ាគីស្ថាន នឹងមិនអាចត្រលប់មកនិយាយចរចានឹងគ្នាទេ។ ចិន ទោះជាកំពុងប្រជែងជាមួយឥណ្ឌា ប៉ុន្តែ ចង់ចាប់ដៃ ប៉ាគីស្ថាន ដែលស្ថិតនៅក្រោមឥទ្ធិពល ជំនួយរបស់ខ្លួន ឲ្យទៅត្រូវរ៉ូវជាមួយឥណ្ឌា ដើម្បី ហេតុផលសន្តិសុខក្នុងតំបន់ ជាពិសេស ដើម្បី ទប់ទល់នឹងការកើនឡើង នៃក្រុមភេរវនិយម ដែលចិនបារម្ភថា នឹងអាចធ្វើដំណើរចេញពីអាហ្វហ្កានីស្ថាន ចូលទៅខេត្តស៊ីនជាំងរបស់ចិននោះ។ ចិនចង់ឲ្យប៉ាគីស្ថាន ស្រុះស្រួលជាមួយឥណ្ឌា ក៏ព្រោះតែដឹងថា ឥណ្ឌា នេះ មានឥទ្ធិពល ទំនាក់ទំនងល្អជាមួយរដ្ឋាភិបាលអាមេរិក និងអាហ្វហ្កានីស្ថាននេះឯង។ អាមេរិកវិញ បានជំរុញឥណ្ឌា សម្ព័ន្ធមិត្ត ឲ្យទៅត្រូវរ៉ូវជាមួយប៉ាគីស្ថាន ដើម្បីអូសទាញប៉ាគីស្ថាន កុំឲ្យទៅនៅក្រោមឥទ្ធិពលរបស់ចិនខ្លាំងពេក។
ឥណ្ឌាផ្ទាល់ ដឹងច្បាស់ថា មិនងាយនឹងជានា ដោយស្រួល ជាមួយប៉ាគីស្ថាន ដោយសារជម្លោះទឹកដី នៅកាស្មៀរ។ ប៉ុន្តែ ចងមិត្ត ជាជាងចងសត្រូវ។ ចរចាជាមួយប៉ាគីស្ថាន នឹងជួយសម្រាលភាពតានតឹង នៅព្រំដែន ដែលនឹងធ្វើឲ្យឥណ្ឌាឈប់ឈឺក្បាល និងដកឃ្លាមកគិតសម្រុកតែបោះពួយផ្នែកសេដ្ឋកិច្ច និងបង្កើន យុទ្ធសាស្រ្តពង្រីកដែនឥទ្ធិពលរបស់ឥណ្ឌា នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ