ប៉ាគីស្ថានកាន់ទុក្ខទូទាំងប្រទេសបន្ទាន់ពីរងភេរវកម្មដ៏ធ្ងន់ធ្ងរលើបុព្វជិតអ៊ីស្លាមឈីអ៊ីត
ក្រុងហ្ស៊ីកាពួ ភាគខាងត្បូងប្រទេសប៉ាគីស្ថាន បានរងការវាយប្រហារភេរវកម្មយ៉ាងធ្ងន់ធ្ងរ កាលពីថ្ងៃសុក្រទី ៣០ មករា។ ភេរវកម្មបានកើតឡើង នៅក្នុងវិហារអ៊ីស្លាមនិកាយឈីអ៊ីត ក្នុងពេលដែលកំពុងមានមនុស្សជាច្រើន កំពុងសូត្រធម៌ ហើយបានសម្លាប់ជីវិតមនុស្សចំនួន ៦១នាក់។ ក្រោយហេតុការណ៍នេះ ប្រជាជនប៉ាគីស្ថាននិកាយឈីអ៊ីត បាននាំគ្នាដើរតាមផ្លូវ កាន់ទុក្ខដល់អ្នកស្លាប់ ព្រមទាំង ថ្កោលទោស ដល់ក្រុមភេវករអ៊ីស្លាមជ្រុលនិយម។
ចុះផ្សាយនៅថ្ងៃ៖
ស្តាប់ - ០២:១៧
ថ្ងៃសុក្រ ពេលល្ងាច គឺជាពេលដែលបុព្វជិតកាន់សាសានាអ៊ីស្លាម ជួបជុំគ្នានៅតាមបណ្តាវិហារម៉ូស្កេ ដើម្បីធ្វើពិធីសូត្រធម៌។ ពូកភេរវករបានជ្រើសយកពេលវេលានេះ ដើម្បីដាក់បំផ្ទុះគ្រាប់បែក ដែលធ្វើឲ្យមានអ្នករងគ្រោះ ច្រើនបំផុត។ ថ្ងៃសុក្រ ទី៣០ មករា វិហារម៉ូស្កេ អ៊ីម៉ាំបាហ្កា នៅក្រុង ហ្ស៊ីកាពួ ចំងាយប្រមាណជា៤៧០ គីឡូមែត្រ ពីក្រុងការ៉ាឈី ភាគខាងត្បូង ប្រទេសប៉ាគីស្ថាន បានរងការវាយប្រហារគួរឲ្យតក់ស្លុត។
ភេរវករម្នាក់ បានបន្លំខ្លួនចូលទៅក្នុងវិហារម៉ូស្កេអ៊ីស្លាមនិកាយឈីអ៊ីត ដោយមានពាក់ខ្សែក្រវ៉ាត់ រុំទៅដោយគ្រាប់បែក ជាច្រើនគ្រាប់។ ក្នុងគ្រាប់បែកនោះទៀតសោត គឺបង្កប់ទៅដោយ អម្បែង និងកំទេចដែកជាច្រើន។ មនុស្ស៦១ នាក់បានស្លាប់បាត់បង់ជីវិត និងជាច្រើននាក់ផ្សេងទៀត បានរងរបួសធ្ងន់។ ចាប់តាំងពីថ្ងៃសៅរ៍ ម្សិលមិញមក ប្រទេសប៉ាគីស្ថានទាំងមូល បានស្ថិតនៅក្រោមការកាន់ទុក្ខ។ សាលារៀន ទីផ្សារ និងការិយាល័យជាច្រើន ត្រូវបិទទ្វារមួយរយៈ ដើម្បីចូលរួមកាន់ទុក្ខនេះ។ ប្រជាជនប៉ាគីស្ថាន ដែលកាន់សាសនាអ៊ីស្លាមនិកាយឈីអ៊ីត បានថ្កោលទោសការវាយប្រហារនេះ ហើយបានដើរតាមផ្លូវ ទាមទារឲ្យកម្ទេចក្រុមភេរវករ ដែលនៅពីក្រោយ ការវាយប្រហារ ដ៏សាហាវនេះ។
ភ្លាមៗ ក្រោយហេតុការណ៏នេះ ក្រុមភេរវកម្មនិយម ឈ្មោះជុនឌូឡាហ(Jundullah) បានចេញមុខ មកទទួលស្គាល់ថា ពួកវាជាអ្នកបញ្ជា ឲ្យធ្វើភេរវកម្មអត្តឃាតនេះ។ ក្រុមនេះ ជាក្រុមភេរវនិយមអ៊ីស្លាមនិកាយស៊ុនីត ដែលកន្លងមកមិនសូវមានគេស្គាល់ទេ ហើយពួកនេះ បានករកើតឡើង តាមរយៈបណ្តាញ របស់ពួកតាលីបង់។ អ្នកនាំពាក្យរបស់ក្រុមនេះ បានថ្លែងឲ្យដឹងថា ពួកវាបានធ្វើការវាយប្រហារទៅលើ អ្នកកាន់សាសនាអ៊ីស្លាមនិកាយឈីអ៊ីត ព្រោះថាពួកឈីអ៊ីត បានដើរខុសគន្លង ផ្ទុយពីច្បាប់របស់សាសនាអ៊ីស្លាម។ ទោះបីជាយ៉ាងណា លោកនាយករដ្ឋមន្រ្តី ប៉ាគីស្ថាន ណាវ៉ាហ្ស ឆារីហ្វ បានថ្លែងថា លោកប្តេជ្ញា ត្រូវកម្ទេចពួកភេរវករ ឲ្យបាន ទោះបីជាត្រូវចំណាយប៉ុន្មានក៏ដោយ។
សូមបញ្ជាក់ផងដែរថា ប៉ាគីស្ថានមានប្រជាជនជាង២០០លាននាក់ ដែលក្នុងនោះ ភាគច្រើនលើសលប់ ជាអ្នកកាន់សាសនាអ៊ីស្លាម និកាយស៊ុនីត។ អ្នកកាន់សាសនាអ៊ីស្លាមនិកាយឈីអ៊ីត មានត្រឹម២០ភាគរយប៉ុណ្ណោះ។ កន្លងមក មិនថា ប្រជាជនប៉ាគីស្ថាន ដែលកាន់សាសនា កាតូលិក រឺអ៊ីស្លាមឈីអ៊ីត តែងតែរងការវាយប្រហារភេរវកម្មជានិច្ច។ ពួកភេរវករអ៊ីស្លាមស៊ុនីត តែងតែធ្វើការបំផ្ទុះគ្រាប់បែក ស្ទើរមិនលោះថ្ងៃឡើយ។ បើនិយាយពីការកាន់ទុក្ខ ទូទាំងប្រទេស ក្រោយហេតុការណ៍ភេរវកម្មវិញ ប៉ាគីស្ថាន កាន់ទុក្ខស្ទើរតែរៀងរាល់ថ្ងៃទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ