ជប៉ុន៖គម្រោងកំណែទម្រង់ទីផ្សារការងារកំពុងក្លាយជាប្រធានបទតស៊ូមតិយ៉ាងខ្លំាងនៅក្នុងសភា
ចុះផ្សាយនៅថ្ងៃ៖
ស្តាប់ - ០៤:៣០
នៅក្នុងប្រទេសជប៉ុន សភាបានផ្តើមជជែកលើគម្រោងកំណែទម្រង់ទីផ្សារការងារដ៏ចម្រូងចម្រាស។ នៅក្នុងសេចក្តីព្រាងច្បាប់ថ្មីស្តីពីទីផ្សារការងារ រដ្ឋាភិបាលមានគម្រោងលប់ចោលការងារបន្ថែមម៉ោងចំពោះអ្នកធ្វើការងាររូបណាដែលទទួលបានប្រាក់ខែច្រើនជាង ៨៧ ០០០ដុល្លារក្នុងមួយឆ្នំា។ នៅក្នុងប្រទេសជប៉ុន អត្រានៃចំនួនអ្នកធ្វើការងារដែលទទួលបានប្រាក់ខែជាង ៨៧ ០០០ដុល្លារក្នុងមួយឆ្នំាមានប្រមាណជា ៣,៩% នៃប្រជាជនសកម្មជប៉ុនទំាងអស់។ តើវិធានការរបស់រដ្ឋាភិបាលជប៉ុនមានគោលដៅអ្វីខ្លះ?
« ធ្វើការច្រើន បានលុយច្រើន » នេះជាសុភាសិតទូទៅសម្រាប់មនុស្សគ្រប់ប្រទេសទំាងអស់ក្នុងលោក មិនថានៅអាស៊ី ឬមួយក៏នៅអឺរ៉ុបទេ។ តែពីប្រទេសមួយទៅប្រទេសទៀត ចំនួនម៉ោងធ្វើការប្រចំាសប្តាហ៍កំណត់ដោយច្បាប់ និងម៉ោងបន្ថែមក្រៅពិតជាមិនដូចគ្នាទេ។ ជាក់ស្តែងនៅក្នុងប្រទេសបារំាង ចំនួនម៉ោងធ្វើការប្រចំាសប្តាហ៍ផ្លូវការមាន ៣៥ម៉ោង ចំណែកនៅក្នុងប្រទេសជប៉ុន គឺមានដល់ទៅ ៤០ម៉ោងឯណោះក្នុងមួយសប្តាហ៍។ នៅអឺរ៉ុប និយោជិកមានទំនៀមទម្លាប់ឲ្យតែដល់ម៉ោងភ្លាម ចេញទៅផ្ទះភ្លែត ទោះបីជាការងារដែលខ្លួនកំពុងធ្វើមិនទាន់ចប់សព្វគ្រប់ក៏ដោយ។ រីឯទំនៀមទម្លាប់វប្បធម៌នៅអាស៊ីវិញ និយោជិកសុខចិត្តបន្តថែមម៉ោងបន្តិចបន្តួចដោយមិនគិតលុយ ព្រោះការដល់ម៉ោងភ្លាម ងើបចេញភ្លែតជារឿងមិនល្អមើល និងអាចត្រូវបានចៅហ្វាយសម្គាល់ទុក។
តាមតួលេខផ្តល់ដោយអង្គការសហប្រតិបត្តិការ និងអភិវឌ្ឍន៍សេដ្ឋកិច្ចឲ្យដឹងថា មាននិយោជិកជប៉ុនប្រមាណជា ២២,៣% ពោលមាន ១នាក់ក្នុងចំណោម៥នាក់បានធ្វើការលើសពី ៥០ម៉ោង ឬមួយក៏ច្រើនជាងនេះក្នុងមួយសប្តាហ៍។ នៅក្នុងសេចក្តីព្រាងច្បាប់ថ្មីស្តីពីការងារ រដ្ឋាភិបាលរបស់លោកនាយករដ្ឋមន្រ្តីស្ហ៊ីនហ្សូ អាបេមានគម្រោងលប់ចោលប្រាក់ខែសម្រាប់ការងារបន្ថែមម៉ោងចំពោះនិយោជិកណាដែលទទួលបានប្រាក់ខែលើសពី ៨៧ ០០០ដុល្លារក្នុងមួយឆ្នំា។ គោលនយោបាយរបៀបនេះត្រូវបានរដ្ឋាភិបាលលើកយកហេតុផលទៅពន្យល់ថា គឺដើម្បីបង្កើនប្រសិទ្ធិភាពការងារ និងអនុញ្ញាតឲ្យនិយោជិកគ្រប់គ្រងបានល្អនូវពេលវេលាធ្វើការរបស់ខ្លួន ពោលរហ័សរហួនបញ្ចប់ការងារដើម្បីអាចចេញទៅផ្ទះមុនម៉ោង។
គំនិតផ្តួចផ្តើមរបៀបនេះរបស់រដ្ឋាភិបាលអាចនឹងទទួលបានការគំាទ្រពីសហព័ន្ធនិយោជក់ដែលចង់បង្វែរលុយពីការងារបន្ថែមម៉ោងទៅបំពេញឲ្យនិយោជិកណាដែលបំពេញការងារបានល្អ ប្រកបដោយគុណភាព និងស្វិតស្វាញ ជាជាងឲ្យនិយោជិកណាដែលចំណាយពេលច្រើននៅកន្លែងធ្វើការ តែគ្មានសាច់ការ។ ទន្ទឹមគ្នានេះ សម្រាប់និយោជិកណាដែលមិនជាប់ពាក់ព័ន្ធនឹងវិធានការថ្មីនេះ ហើយអាចបន្តធ្វើការងារបន្ថែមម៉ោងដើម្បីទទួលបានប្រាក់បន្ថែមនោះ សហព័ន្ធនិយោជក់ក៏ចង់ឲ្យរដ្ឋាភិបាលចាត់វិធានការកម្រិតតម្លៃប្រាក់ធ្វើការបន្ថែមម៉ោងដែរ។ ក៏ប៉ុន្តែ និងអ្វីដែលក្រុមសហជីព និងក្រុមគណបក្សប្រឆំាងកំពុងសម្តែងក្តីព្រួយបារម្ភរបស់ខ្លួនជាពន់ពេកនោះ គឺខ្លាចតែទៅថ្ងៃខាងមុខ ការងារបន្ថែមម៉ោងនឹងលែងទទួលបានប្រាក់ថ្នូរទៀតឡើយ ពោលគឺធ្វើឲ្យថៅកែទទេតែម្តង។ ក្រុមសហជីព និងក្រុមគណបក្សប្រឆំាងបានរម្លឹកប្រាប់ជាថ្មីពីប្រភពកំណើតនៃការងារបន្ថែមម៉ោងដែលជាសំណូមពរចង់ឲ្យមានយ៉ាងទទូចពីថៅកែ។
នៅជប៉ុន ច្បាប់ការងារបានកំណត់ឲ្យមានថ្ងៃឈប់សម្រាកប្រចំាឆ្នំាសម្រាប់និយោជិកម្នាក់ៗចំនួន ១៨ថ្ងៃ។ តែជាទូទៅគេសង្កេតឃើញថា ប្រជាជនជប៉ុនកម្រនឹងឈប់សម្រាកណាស់ ព្រោះចង់ធ្វើការដើម្បីបានលុយបន្ថែម។ ជាក់ស្តែងក្នុងឆ្នំា ២០១៣ មាន ១៦% នៃនិយោជិកធ្វើការពេញម៉ោងមិនបានយកថ្ងៃឈប់សម្រាកទាល់តែសោះ ទោះបីជា ១ថ្ងៃក៏គ្មានដែរ ពោលសុខចិត្តយកពេលទៅធ្វើការដើម្បីបានលុយបន្ថែម។ គឺផ្តើមចេញពីទង្វើនេះហើយដែលបានបង្កឲ្យមានកំណើនបញ្ហាសុខភាព រហូតដល់ស្លាប់ជីវិតដោយសារតែធ្វើការហួសកម្លំាង។ ជាក់ស្តែងក្នុងឆ្នំា ២០១៣ មានមនុស្សស្លាប់ដោយធ្វើការច្រើនជ្រុលចំនួន ១៩៦នាក់។
តែចំនួនអ្នកស្លាប់អាចមានច្រើនជាងនេះ ព្រោះគេពិបាកនឹងធ្វើការផ្ទៀងផ្ទាត់ដើម្បីរកភស្តុតាងដែលបញ្ជាក់ថា អ្នកស្លាប់នោះបានស្លាប់ដោយធ្វើការច្រើនពេក។ អ៊ីចឹងហើយបានជានៅក្នុងសេចក្តីព្រាងច្បាប់ស្តីពីការងារដែលសភាជប៉ុនកំពុងជជែកគ្នាពេលនេះ មានវិធានការតឹងតែងចំាបាច់មួយចំនួនត្រូវបានដាក់ចេញ រួមមាន ចំនួនម៉ោងការងារបន្ថែមត្រូវកំណត់ក្នុងមួយខែៗ ឬមួយក៏និយោជិកត្រូវតែយកថ្ងៃឈប់សម្រាកប្រចំាឆ្នំាដែលច្បាប់បានកំណត់យ៉ាងតិច ៥ថ្ងៃក្នុងមួយឆ្នំា។ យ៉ាងណាក៏ដោយ នយោជិកមានសិទ្ធិក្នុងការជ្រើសយកប្រព័ន្ធថ្មីស្តីពីការងារ ឬមួយក៏បន្តរក្សាទុកប្រព័ន្ធចាស់សព្វថ្ងៃ។
អ្វីជាការកត់សម្គាល់ ពិតមែនតែគណបក្សរបស់លោកអាបេមានសម្លេងភាគច្រើននៅសភាក៏ដោយ ក៏គេមិនប្រាកដថាសេចក្តីព្រាងច្បាប់ថ្មីស្តីពីការងារនឹងអាចអនុម័តបានដែរ។ នៅពេលកាន់អំណាចចន្លោះពីឆ្នំា ២០០៥-២០០៦ លោកអាបេធ្លាប់បានស្នើឡើងនូវសេចក្តីព្រាងច្បាប់ស្រដៀងគ្នានេះម្តងហើយ តែដោយមានការជំទាស់ខ្លំាងពេកពីក្រុមប្រឆំាង លោកអាបេក៏បានបោះចោលបាត់ទៅ។ តំាងពីការវិលត្រឡប់មកកាន់អំណាចជាថ្មីក្នុងឆ្នំា ២០១២ លោកអាបេក៏បានស្នើគម្រោងនេះចំនួនពីរលើកហើយដែរ។ នៅលើកនេះទៀត ក៏នៅមិនទាន់ដឹងចេញរួច ឬក៏អត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ