កាសែត៖ ចិននឹងមានសិទ្ធិវេតូ នៅក្នុងធនាគារវិនិយោគហេដ្ឋារចនាសម្ព័ន្ធអាស៊ី
កាសែតអាមេរិកាំង Wall Street journal របស់អាមេរិកបានចុះផ្សាយ នៅថ្ងៃអង្គារទី ៩មិថុនា ថា ប្រទេសចិន ដែលជាមេគំនិតបង្កើតធនាគារវិនិយោគហេដ្ឋារចនាសម្ព័ន្ធអាស៊ី នឹងមានសិទ្ធិវេតូ នៅក្នុងការសម្រេចចិត្តសំខាន់ៗរបស់ធនាគារ។ តាមគម្រោង លក្ខន្តិកៈរបស់ធនាគារ នឹងត្រូវសរសេរចប់រួចរាល់ និងចុះហត្ថលេខាយល់ព្រមពី សមាជិកទាំង៥៧ ប្រទេស នៅចុងខែមិថុនានេះ។ តាមក្រសួងសេដ្ឋកិច្ចចិន ធនាគារអាស៊ី វិនិយោគ ហេដ្ឋារចនាសម្ព័ន្ធ នឹងអាចចាប់ដំណើរការ នៅមុនដំណាច់ឆ្នាំ ២០១៥នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥០
តាម កាសែត អាមេរិកាំង Wall Street journal ដែលបានដកស្រង់សំដីរបស់អ្នកស្និទ្ធនឹងឯកសារ គឺ នៅក្នុងលក្ខន្តិកៈរបស់ធនាគារ ការសម្រេចចិត្តធំៗ នៅក្នុងធនាគារ វិនិយោគហេដ្ឋារចនាសម្ព័ន្ធអាស៊ី នឹងផ្តល់អាទិភាពទៅឲ្យចិន រួមទាំងសិទ្ធិធ្វើវេតូ ដើម្បីប្រឆាំងនឹងការសម្រេចណាមួយ របស់ក្រុមប្រឹក្សារដ្ឋបាល។
ចិនដាក់ទុនវិនិយោគ ៣០ពាន់លានដុល្លារ គឺស្មើ ៣០ភាគរយ នៃទុនសរុបរបស់ធនាគារវិនិយោគហេដ្ឋារចនាសម្ព័ន្ធអាស៊ី។ កន្លងមក ក្នុងគោលដៅ ទាក់ទាញប្រទេសផ្សេងទៀត ឲ្យចូលរួមវិនិយោគក្នុងធនាគាររបស់ខ្លួន ទីក្រុងប៉េកាំង បានប្រកាសហើយថា ខ្លួនមិនចង់បានសិទ្ធិធ្វើវេតូនោះទេ។ គឺនយោបាយបើកចំហរ និងការមិនចង់បានសិទ្ធិផ្តាច់មុខ របស់ចិន នៅក្នុងស្ថាប័នធនាគារថ្មីនោះហើយ ដែលបានទាក់ទាញ ប្រទេសដល់៥៧ប្រទេស ជាពិសេស បណ្តាប្រទេសអឺរ៉ុប ឲ្យទៅចូលរួមបោះទុនវិនិយោគក្នុងធនាគារចិន។
បើសិន ជាដំណឹងចុះផ្សាយ នេះជារឿងពិត គេនឹងអាចចោទសំណួរថា តើចិនមានធ្វើអ្វីខុសប្លែកពីអាមេរិក ទៅ? ចិនធ្លាប់រិះគន់ពីអាមេរិក ដែលតែងតែប្រើសិទ្ធិវេតូ នៅក្នុងការសម្រេចរបស់ធនាគារពិភពលោក និងមូលនិធិរូបិយវត្ថុអន្តរជាតិ ដែលអាមេរិកមានទុនវិនិយោគច្រើនជាងគេ។
ចិន និងប្រទេសដែលមានសេដ្ឋកិច្ចទើបរីកលូតលាស់ ធ្លាប់បានទាមទារជាច្រើនលើក ដើម្បីឲ្យគេធ្វើកំណែទម្រង់ នៅក្នុងស្ថាប័នហិរញ្ញប្បទាន ពិភពលោកទាំងពីរ ជាពីសេស នៅមូលនិធិរូបិយវត្ថុអន្តរជាតិ ពោលគឺចិនចង់ឲ្យមានការចែករំលែកអំណាច មិនមែនមានតែអាមេរិក ជាអ្នកមានសិទ្ធិផ្តាច់មុខតែម្នាក់ឯង នោះទេ។ ប៉ុន្តែ ការទាមទាររាល់របស់ចិន ទទួលបរាជ័យ ដោយសារតែសភារបស់អាមេរិក តែងតែបោះឆ្នោត ប្រឆាំងមិនឲ្យគេធ្វើកំណែទម្រង់ នៅក្នុងស្ថាប័នអន្តរជាតិ ទាំងពីរដែលរហូតមកដល់ពេលនេះ ស្ថិតនៅក្នុងកណ្តាប់ដៃ គ្រប់គ្រងរបស់អាមេរិក។
ទីក្រុងប៉េកាំងធ្លាប់បានអះអាងថា គេបង្កើតធនាគារវិនិយោគហេដ្ឋារចនាសម្ព័ន្ធអាស៊ី មិនមែនបង្កើតឡើង ដើម្បី ធ្វើជាសត្រូវ ប្រកួតប្រជែងជាមួយធនាគារពិភពលោក ឬធនាគារអភិវឌ្ឍន៍អាស៊ី ដែលមានរួចស្រាប់ ហើយ ដែលដឹកនាំដោយអាមេរិកនិងជប៉ុននោះទេ។ ប៉ុន្តែ សម្រាប់ជួយបំពេញការខ្វះខាតទុនវិនិយោគ ខាងផ្នែកហេដ្ឋារចនាសម្ព័ន្ធ ដែលអាស៊ីកំពុងជួបប្រទះ។ នេះជាដំណឹងល្អ ព្រោះថា អាស៊ី នៅខ្វះខាតទុនវិនិយោគច្រើនណាស់។ តាមធនាគារអភិវឌ្ឍអាស៊ី អាស៊ីត្រូវការទុន ប្រមាណ ៨ពាន់ ពាន់លានដុល្លារ សម្រាប់វិនិយោគលើហេដ្ឋារចនាសម្ព័ន្ធ ទូរគមនាគមន៍ និងថាមពលពីឆ្នាំ ២០១០ ដល់ឆ្នាំ ២០២០។ ធនាគារអភិវឌ្ឍន៍អាស៊ី ដែលមានទុនវិនិយោគផ្តាច់មុខរបស់ជប៉ុន និងអាមេរិក តែម្នាក់ឯងមិនអាចឆ្លើយតបនឹងតម្រូវការនៅអាស៊ីបានទេ។
ព្រួញមួយ បាញ់បានសត្វពីរ
តាំងពីដំបូងទី អាមេរិកមើលឃើញថា ចិនចង់ប្រើធនាគារទើបបង្កើតថ្មី ដើម្បី ប្រជែងនឹងស្ថាប័នអន្តរជាតិដែលមានស្រាប់ ដែលដឹកនាំដោយអាមេរិក និងជប៉ុន ដូចជាធនាគារពិភពលោក មូលនិធិរូបិយវត្ថុអន្តរជាតិ និងធនាគារអភិវឌ្ឍន៍អាស៊ីជាដើម។ ទីក្រុងវ៉ាស៊ីនតោន អាមេរិកធ្លាប់បានព្រមានទុកមុនថា ធនាគារដែលចិន បង្កើតថ្មី នឹងខ្វះតម្លាភាព ហើយនិងផ្តល់ទុនដោយមិនខ្វល់ មិនទាមទារដាក់គំនាបឲ្យរដ្ឋាភិបាលប្រទេសកូនបំណុល ដោះស្រាយបញ្ហារំលោភសិទ្ធិមនុស្ស ដូចដែលធនាគារពិភពលោកតែងតែធ្វើនោះទេ។ ប៉ុន្តែ ការព្រមានរបស់អាមេរិកនៅតែមិនអាចទប់ស្កាត់សម្ព័ន្ធមិត្តរបស់អាមេរិក ដូចជាអង់គ្លេស អាល្លឺម៉ង់ កូរ៉េខាងត្បូង ឬអូស្ត្រាលី ដែលបានប្រកាសជាបន្តបន្ទាប់ ចូលរួមដាក់ទុនវិនិយោគក្នុងធនាគាររបស់ចិន។
ក្រៅតែពីប្រកួតប្រជែងនឹងធនាគាររបស់ពិភពលោក អាមេរិកផ្ទាល់បារម្ភថា ចិននឹងអាចយកធនាគារវិនិយោគហេដ្ឋារចនាសម្ព័ន្ធ ទៅបម្រើផលប្រយោជន៍ភូមិសាស្រ្តនយោបាយរបស់ខ្លួន។ ចិនកំពុងធ្វើនយោបាយ ពង្រីកឥទ្ធិពលរបស់ខ្លួន ដោយបានផ្តើមសាងសង់ផ្លូវគមនាគមន៍ ពីរ មួយ ឆ្ពោះទៅភ្ជាប់ អឺរ៉ុប និងមួយទៀត សំដៅអាស៊ីខាងលិច។ តាមការគន់គូររបស់អ្នកជំនាញសេដ្ឋកិច្ច ចិន នឹងអាចអូសទាញយកទុនវិនិយោគរបស់ធនាគារ ដែលទើបបង្កើតថ្មី ទៅបម្រើនយោបាយសាងសង់ ផ្លូវសូត្រ Silk road ដែលចិន ចង់ភ្ជាប់ទៅអឺរ៉ុប និងអាស៊ីខាងលិចនោះឯង។ មួយវិញទៀត បើទោះបីជាធនាគារវិនិយោគ ហេដ្ឋារចនាសម្ព័ន្ធ នឹងត្រូវផ្តល់ទៅឲ្យអាស៊ីពិតមែន ប៉ុន្តែ ចិន ក្នុងនាមជាអ្នកដាក់ទុនច្រើនជាងគេនៅក្នុងធនាគារ នឹងមានសិទ្ធិច្រើន អាចដាក់កំណត់ ទាមទារឲ្យអ្នកមកខ្ចីទុន ត្រូវតែទទួលយក ទាំងបច្ចេកវិទ្យា វត្ថុធាតុដើម ឬរួមទាំងមនុស្សធ្វើការរបស់ចិន សម្រាប់គម្រោងសាងសង់ហេដ្ឋារចនាសម្ព័ន្ធ។ ធ្វើដូច្នេះ គឺជួយដល់សេដ្ឋកិច្ចរបស់ចិនច្រើនណាស់ ព្រោះថា ចិនបាននាំចេញទាំងធនធានមនុស្ស និងវត្ថុធាតុដើមរបស់ចិន ដូចជាស៊ីម៉ង់ ដែក ដែលចិន កំពុងមានច្រើនលើសតម្រូវការក្នុងស្រុក។
ជារួម តាមរយៈ ធនាគារវិនិយោគ ហេដ្ឋារចនាសម្ព័ន្ធអាស៊ីនឹងអាចឲ្យចិនចំណេញនយោបាយពីរ គឺមួយដើម្បីប្រកួតប្រជែងដណ្តើមឥទ្ធិពលពីអាមេរិកដែលធ្លាប់តែដើរតួនាទីផ្តាច់មុខ នៅក្នុងស្ថាប័នអន្តរជាតិ និងមួយទៀត ចិនអាចយកធនាគារថ្មីទៅបម្រើផលប្រយោជន៍ សេដ្ឋកិច្ចផ្ទាល់របស់ចិន។ អាចនិយាយបានថា វិនិយោគ ហេដ្ឋារចនាសម្ព័ន្ធអាស៊ី គឺវិនិយោគ លើហេដ្ឋារចនាសម្ព័ន្ធរបស់ចិននេះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ